Ipisu 3:10 - Manobo Western Bukidnon

¹⁰ Umba wazà heini zengan ipezayag su wey g̵untaan pinaag̵i zà te menge tumutuu ki Jesus, ibpaahà te Megbevayà diyà te menge kedesenan wey menge egalen diyà te langit ke hengkey kezekelà is ketau zin he wazè med-iring-iring.

Ipisu 3:10 Кръстосани препратки

Ruma 11:33

Utew zekelà is gag̵ew te Megbevayà; kenà egketegkad is ketau zin wey kedsavut din. Kenà egkesavut te etew is menge ulaula zin ne kenà egkeseysey te minsan hentei is ed-ul-ulahan din.

Ruma 8:38

Ne netuenan ku he wazà minsan hengkey he ebpekepesuwey kenita ziyà te zekelà he g̵ag̵ew kenita he impaahà te Megbevayà pinaag̵i te Nengazen tew he si Jesu Kristu. Su minsan kayi te uuyag ki pa wey ke ebpatey ki en be, ne kenà egkeawà is gag̵ew zin kenita. Kenà egkeawà te menge velinsug̵uen din wey te menge mezaat he mulin-ulin. Kenà egkeawà te minsan hengkey he egkeulaula g̵untaan wey egkeulaula keuzemà. Kenà daan egkeawà te minsan hengkey he kedesenan. Is menge kedesenan he ziyà te utew metikang wey is menge kedesenan he ziyà te utew mezalem, wey is minsan hengkey he linimbag, ne kenè dan ebpekepesuwey kenita ziyà te g̵ag̵ew kenita te Megbevayà he ibpeehè din kenita pinaag̵i ki Jesu Kristu he iyan Nengazen tew.

1 Kurintu 1:24

Iyan, is minsan hentei, Hudiyu se Gerisyahanen, emun ebpemineg dan te Megbevayà dutun te kebpetuuwa zin kandan, netuenan dan he pinaag̵i te kedrensanga ki Kristu impezayag te Megbevayà is gehem din wey ketau zin.

1 Kurintu 2:7

Heini is ketau he egkeg̵iyen ku, ne iyan kes in-eles he edhimuwen te Megbevayà he wazà metueni zengan te menusiyà. Dengan dà te wazè pa limbag̵a is minsan hengkey, daan he mid-isip te Megbevayà heini is edhimuwen din su wey kiw tulusa.

Ipisu 1:21

Ne zutun utew lavew si Kristu kenà is minsan hentei he hadì, wey egalen, wey minsan hentei he zuen din keg̵ehem wey kebayàbayà. Lavew pa is inggerar ki Kristu te minsan hengkey he g̵erar te minsan hentei g̵untaan wey te wazè din pidtemanan.

Ipisu 1:23

Sikitew is edsarig ki Kristu, ne iring kiw te lawa zin ne iyan sikandin ulu tew. Ne sikitew is lawa zin, ne wazà kurang te ked-ulini zin kenitew su ziyà sikandin te minsan hendei te tivuuk he kelimbag̵an.

Ipisu 1:3

Dekelà utew is kebpeselemati tew te Megbevayà he Amey te Nengazen tew he si Jesu Kristu su tenged te kebpekidsevaha tew ki Kristu, intuvad din kenitew ziyà te langit is minsan hengkey he meupiya pinaag̵i te ked-ulini kenitew te Wag̵as he Mulin-ulin.

Ipisu 1:8

Kenà pinaag̵i te sukud is kegkeg̵eg̵awi zin kenitew, kekenà, utew subra is gag̵ew zin kenita. Ne imbeg̵ey zin daan kenita is kedsavut wey ketau su wey tew metueni ke hengkey is paag̵i zin.

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

Kulusas 1:16

su pinaag̵i kandin te Anak te Megbevayà midlimbag te Megbevayà is minsan hengkey ziyà te langit wey zini te tanà, sikan is egkeahà te etew wey is kenà egkengeahà he kedesenan he zuen dan keg̵ehem, wey kebayàbayà, wey kedhadì. Is Anak, mibpeveelan kandin te Amey zin he Megbevayà is minsan hengkey su wey zin meg̵amit heini is minsan hengkey he linimbag din.

Kulusas 2:10

Ne sikiyu zaan, pinaag̵i te kebpekidsevaha niw ki Kristu, nekepurung kew en mekeazen te untung he imbeg̵ey keniyu ni Kristu. Ne iyan si Kristu sikan is edhadì te minsan hentei he kedesenan he zuen din keg̵ehem wey kebayàbayà.

Kulusas 2:15

Ne haazà is menge kedesenan he mezaat he mulin-ulin he zuen dan keg̵ehem te kebayàbayà, in-awà te Megbevayà is keg̵ehem dan, ne pinaag̵i te kedsulituwa zin kandan pinaag̵i te kebpatey ni Kristu ziyà te krus, impeehè din he wazè dan en kebpekesukul.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

1 Pedro 1:12

Impezayag kandan te Megbevayà he kenà kandan he ibmeupiya haazà is netagnè dan dutun, kekenà, kenitew g̵untaan. Ne g̵untaan impesavut en keniyu is tutuu mehitenged dutun te netagnè dan. Duen menge etew he midsug̵ù te Megbevayà su wey zan metudtul keniyu is Meupiya he Tudtulanen. Mid-ulinan sikandan te Wag̵as he Mulin-ulin he midsug̵ù te Megbevayà. Ne heini is impesavut dan keniyu, minsan is menge velinsug̵uen te Megbevayà ziyà te langit, egkesuatan dan he mesavut dan heini.

1 Pedro 3:22

Diyà si Jesus med-ulì te langit ne g̵untaan diyà sikandin ebpimpinuu te zapit te egkekewanan te Megbevayà tuus te utew lavew sikandin. Iyan sikandin ebayàbayà te langun he menge velinsug̵uen te Megbevayà wey te menge kedesenan wey te minsan hentei ziyà te langit he zuen din gehem.