Ipisu 2:2 - Manobo Western Bukidnon

² Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

Ipisu 2:2 Кръстосани препратки

Mateo 11:19

Ne siak is Kakey te Menusiyà, wazà a medsalang megkaan ne mid-inum a mulà te vinu ne neinuinu kew ne migkag̵i niw he vuleg̵uk a wey pereinum te vinu. Ne ke sikiyu zaan he emig̵u a te menge lalung he etew iring te menunukut te vuhis wey menge mesinupaken. Iyan,” ke si Jesus, “egketuusan ta he utew metau is Megbevayà pinaag̵i te egkeveelan din.”

Mateo 13:22

Ne sikan is benì he ziyà mengeulug te tanà he zug̵iyen is menge sagbet dutun, iyan is Lalag te Megbevayà he iyan nemekezineg duen is menge etew he ebpemineg, iyan, egkelipatan dan tenged te menge seeng dan kayi te kelibutan wey tenged te kegkesuat dan te selapì. Ne tenged kayi is Lalag te Megbevayà, kenà ebpulus diyà te kandan.

Mateo 13:38

Haazà is pemuleey, ne iyan heini is kelibutan; ne haazà is menge meupiya he pinemula, ne iyan heini is menge etew he ebpahadì te Megbevayà; ne sikan is menge mezaat he pinemula, ne iyan is menge sakup ni Setanas.

Marcos 4:19

iyan, egkelipatan dan tenged te menge seeng dan kayi te kelibutan wey te kegkesuat dan te selapì wey te mezakel pa he menge azen, ne kenà ebpulus diyà te kandan is Lalag te Megbevayà.

Lucas 16:8

Ne zutun,” ke si Jesus, “hein nezineg haazà dutun te egalen din ke hengkey is mid-ulaula zutun te sulug̵uen din, ne nekekag̵i te, ‘Hey, utew metau sikandin su ebpeneg̵ane en sikandin he zaan te keuyag̵an din keuzemà.’ ” Ne ke si Jesus te, “Is menge etew he kenà ebpemineg te menge lalag te Megbevayà, utew metau te paag̵i te kegkezeyzey zan. Iyan, is menge etew he sakup te Megbevayà, kenè dan bes mulà utew metau te paag̵i wey mezeyzey sikandan keuzemà diyà te langit.

Lucas 22:31

Ne migkag̵i si Jesus diyà te ki Simon Pedro te, “He Simon, duen egkeg̵iyen ku kenikew. Midtug̵utan si Setanas te Megbevayà he ebpenggezam keniyu te langun. Is kebpenggezam din ne iring te ked-ukap te parey su kela ke iring te ukap is kedtuu niw.

Juan 12:31

Is Megbevayà, puun guntaan edhukuman din te silut is tivuuk he menusiyà he kuntada zin, ne egkezaag din en si Setanas, sikan is ebayàbayà dini te kelibutan.

Juan 13:2

Si Jesus wey is menge sumusundan din, ne edlavung dan dutun. Ne si Hudas he tigKeriyuti he anak ni Simon, daan en he impeseled ni Setanas diyà te isip din is ked-ekali zin ki Jesus.

Juan 13:27

Ne hein nezawat ni Hudas haazà is supas, ne mid-ehukan sikandin ni Setanas ne migkeg̵iyan ni Jesus te, “Gègaani nu is ebeelan nu!”

Juan 14:30

Mevavè dà utew is menge lalag ku keniyu su meg̵aan en ebpekeuma si Setanas is egalen te menge etew zini te kelibutan he kuntada ku. Wazè din keg̵ehem kediey,

Juan 15:19

Emun duma kew te menge kuntada te Megbevayà ebmahalen kew zan, iyan, geina te kenè kew zan duma ne egkuntedahan kew zan su mibpilì ku sikiyu wey kew mekesuwey ziyà te kandan.

Juan 16:11

Ibpesavut din is kedsiluti kandan te Megbevayà su si Setanas he egalen dan te menge kuntada te Megbevayà, midhukuman en te silut.

Juan 7:7

Kenè kew egkepeukan te menge etew he kuntada te Megbevayà, iyan, siak, egkepeukan e zan mulà su pinaag̵i te ibpenurù ku egketuenan he mezaat is menge ulaula zan.

Juan 8:23

Ne migkag̵i en maan si Jesus te, “Meg̵inged kew zini te kelibutan; siak, meg̵inged a ziyà te langit. Dini kew ebpuun te tanà, iyan, siak, diyà a ebpuun te zivavew.

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

Nengeulaula 19:35

Ne hein neug̵et en, is sikritaryu zutun te inged dan, ingkepeengked din haazà is kedsinamuk te menge etew. Ke sikandin te, “Menge zuma ku he tig-Ipisu, netuenan en te minsan hentei he sikitew is menge tig-Ipisu, insarig kenitew is simbahan te lavew he ziwata he si Diana wey is edselilayen he vatu he neulug he ebpuun te langit.

Nengeulaula 5:3

Ne migkeg̵iyan sikandin ni Pedro te, “Eneniyas, maan is ebpevayàbayè ka ki Setanas su edlimbungan niw is Wag̵as he Mulin-ulin su kenè niw id-amin is selapì.

Ruma 12:2

Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

1 Kurintu 5:10

Ne kenè ku iyan egkeg̵iyen is menge etew he wazà medtuu te Megbevayà he meremerik is ulaula zan, wey menge leg̵ezen, wey menge tulisan, wey menge ed-azap te kenà tutuu he megbevayà, su emun iyan en haazà migkag̵i ku ne utew mereg̵en he edlikayan su wey kiw zà ebpekelikey te iring dutun ke ed-awè kiw kayi te kelibutan. Iyan egkeg̵iyen ku he edlikayan is etew he egkag̵i he tumutuu sikandin, iyan, mezaat is ulaula zin iring te meremerik is baal zin, wey ke leg̵ezen sikandin, ed-azap te kenà tutuu he megbevayà, ed-ulug̵an din te salà is duma he etew, lelenguten be, wey tulisan sikandin. Ne minsan is kegkaan dà duma kandin ne kenè kew medtampu.

1 Kurintu 6:11

Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

Gelasya 1:4

Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

Ipisu 1:21

Ne zutun utew lavew si Kristu kenà is minsan hentei he hadì, wey egalen, wey minsan hentei he zuen din keg̵ehem wey kebayàbayà. Lavew pa is inggerar ki Kristu te minsan hengkey he g̵erar te minsan hentei g̵untaan wey te wazè din pidtemanan.

Ipisu 2:11

Sikiyu is menge etew he kenà menge Hudiyu, isipa niw is daan he kebpekesavuk niw. Is menge Hudiyu, ne ebpesirkunsidar sikandan, ne egngezanan kew zan te menge etew he kenà ebpesirkunsidar, he ke và dà egkeg̵iya, kenè niw ebpetuusan is lawa niw sumalà is kesug̵uan he imbilinbilin ni Moises.

Ipisu 2:13

Iyan, guntaan, tenged te nekidsevaha kew en ki Jesus, sikiyu is menge etew he utew meziyù te Megbevayà dengan, impeuvey kew zin en tenged te kebpelisi keniyu te lengesa ni Jesus dutun te kebpehimatey zin.

Ipisu 2:3

Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.

Ipisu 4:17

Tenged te sug̵ù a te Nengazen, ebpeketelteleenan ku sikiyu he engkezi niw en is menge mezaat he ulaula he iyan ed-ul-ulahan te menge etew he kenà edtuu te Nengazen wey wazà pulus te ed-isipen dan.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Ipisu 5:6

Su tenged kayi he menge ulaula, utew egkepeuki te Megbevayà keuzemà is menge etew he kenà ebpemineg te menge sug̵ù din. Ne tenged dutun, kenè niw itug̵ut he meketuu kew te tarù he penurù te minsan hentei he etew pinaag̵i te menge ketezengan dan he kenà tutuu.

Ipisu 5:8

Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà.

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

Kulusas 1:21

Kenè kew zengan menge emig̵u te Megbevayà, kekenà, menge kuntada kew zin su layun mezaat is menge isip niw wey ulaula niw.

2 Timoteo 4:10

su mid-ewaan a ni Dimas tenged te iyan egkenug̵unan din is untung din dini te kelibutan. Midhendiyà sikandin te Tiselunika. Ne si Krisinti, midhendiyà te Gelasya, ne si Tito zaan, midhendiyà te Delmasya.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.

Santiago 1:7

Is etew he iring kayi, kinahanglan he kenè din isipa he ibeg̵ey kandin te Megbevayà is ebuyuen din

Santiago 4:4

Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

1 Pedro 1:14

Geina te menge anak ki te Megbevayà, kinahanglan he edtumanen ta is menge sug̵ù din; kenè ta iyan ebpezumdumahan is mezaat he kebayè ta he edtumanen ta layun dengan hein wazè te pa metueni is tutuu he tuluuwen.

1 Pedro 4:3

Su kinahanglan he kenè niw en maan ul-ulaha sikan is mezaat he ed-ul-ulahan he egkesuatan te menge etew he wazà medtuu te Megbevayà. Su zengan meremerik is ulaula niw; mezaat is egkesuatan te lawa niw; lelenguten kew ne mezaat is kelenganan he ibpelepew niw ziyà te menge keemuran he zutun kew ebpenginum. Utew kew egkeepesi te Megbevayà su kenà tutuu he megbevayà is ed-ezapen niw.

2 Pedro 2:14

Egkeerig̵an dan te minsan hentei he vahi; kenà egkepenù is suat dan te mezaat he ulaula. Ebpeeyatan dan is menge etew he kenè pa ebpekesavut te hustu. Utew zan leg̵ezen, iyan, kenà egkehimu he kenà sikandan egkesilutan te Megbevayà.

1 Juan 3:10

Ne ke zuen etew he kenà metazeng is menge ulaula zin, tuus heini he kenà sikandin anak te Megbevayà. Ne kenà daan anak te Megbevayà is minsan hentei he kenè din ebmahalen is duma zin. Pinaag̵i kayi egketuusan ta ke hentei is menge anak te Megbevayà wey ke hentei is menge sakup ni Setanas.

1 Juan 3:8

Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.

1 Juan 4:4

Sikiyu, menge anak ku, gaked kew en te Megbevayà ne nezaag niw en is menge teruen he mulin-ulin su lavew pa he mekeg̵eg̵ehem is Megbevayà he ziyà ed-ubpà te kenitew, kenà si Setanas he ziyà ed-ubpà te menge etew zini te kelibutan he kuntada te Megbevayà.

1 Juan 5:19

Netuenan tew he menge anak kiw te Megbevayà, iyan, is langun he menge kuntada te Megbevayà dini te kelibutan, ebeyveyaan sikandan ni Setanas.

1 Juan 5:4

su sikitew is langun he nehimu en he menge anak te Megbevayà, egkezaag tew en si Setanas he iyan ebayàbayà dini te kelibutan; ne iyan ibpekezaag tew kandin is kedtuu tew ki Jesus.

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

Impezayag 13:14

Ne pinaag̵i te menge egkein-inuwan he intug̵ut kandin he ibpeulaula ziyà te etuvangan dutun te nehuna he langgam, ed-ekalan din is tivuuk he menusiyà dini te kelibutan. Ne zutun edsug̵uen din is menge etew he veeli zan is ledawan dutun te nehuna he langgam ne ezapa zan. Haazà is nehuna he langgam, midtibas duen te sundang, iyan, wazà mebpatey.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 16:17

Ne zutun, is ikepitu he velinsug̵uen, mid-ulaan din diyà te keramag is lediyà he ziyà te kandin ne nezineg ku is egkag̵i he ziyà ebpuun te pinuuwà te edhadì he ziyà te simbahan, ke sikandin te, “Netapus en!”

Impezayag 20:2

Ne midakep din sikan is dekelà he uled he deragun he iyan ded sikan is uled dengan he iyan daan kes mezaat he mulin-ulin he si Setanas ne mibpusasan din. Ne kenà ibpaawà haazà seled te nengkelibu he tuig.