Ipisu 2:16 - Manobo Western Bukidnon

¹⁶ Pinaag̵i te kebpehimatey ni Kristu ziyà te krus in-awè din is kebpekunkuntedehè tew te Hudiyu wey te kenà Hudiyu, ne midhimu kiw zin he sevaha he kelasi te etew su wey tew melikui is ked-ezapa te tutuu he Megbevayà.

Ipisu 2:16 Кръстосани препратки

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 6:6

Su netuenan tew he is daan he mesinupaken he kegkeetew tew, ne iring te inransang duma ki Kristu ziyà te krus su wey mebpatey. Ne tenged kayi, egkeawà is layun tew kebpekesalà ne human dutun kenè kiw en egkeuripen te ked-ulaula te mezaat.

Ruma 8:3

Wazà tavang he egkekuwà ta pinaag̵i te kedtumana ta te kesug̵uan geina te wazè ta mehimu te edtuman, iyan, is Megbevayà mulà, ne iyan neketavang kenita. Su midsug̵ù din sikan is Anak din he si Jesus he nehimu he etew. Ne si Jesus, duen lawa zin he iring te lawa ta su wey zin meseg̵azi ziyà te lawa zin is silut te Megbevayà tenged te menge salè tew. Ne pinaag̵i te kedsiluti zin ki Jesus, in-awè din is gehem te mezaat he kebayè ta.

Ruma 8:7

Emun ebeyveyaan is isip te etew te menge mezaat he kebayà te lawa zin, kuntada sikandin te Megbevayà su kenè din edtumanen is menge sug̵ù te Megbevayà. Ne kenà duen dà taman su kenà egkehimu he egketuman din.

1 Kurintu 10:17

Ne g̵eina te sevaha zà is supas he iyan si Kristu, minsan pa ke mezakel kiw, nesevaha kiw g̵ihapun su pudu kiw ebpekekaan dutun te sevaha he supas.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Ipisu 2:15

Pinaag̵i te kebpehimatey zin, in-awè din is kebpetumana tew te kesug̵uan he imbilinbilin ni Moises ragkes is menge tulumanen su wey sikitew is dezuwa he kelasi te etew, mehimu zin he veg̵u en he kelasi te etew pinaag̵i te kebpekidsevaha tew kandin, ne tenged kayi naawè en is kegkekuntada tew.

Ipisu 3:6

Ibpesavut ku keniyu heini is in-eles dengan he sikiyu is kenà menge Hudiyu, pinaag̵i te kedtuuwi niw te Meupiya he Tudtulanen, edtuvazan kew zaan te Megbevayà te langun he meupiya he idtuvad din te menge Hudiyu. Ne idragkes kew zaan dutun te lawa ni Kristu. Ne egkezawat niw is menge penaad te Megbevayà tenged te kebpekidsevaha niw ki Jesu Kristu.

Ipisu 4:4

Su sikitew is langun he menge tumutuu, sevaha kiw zà he lawa, ne sevaha zà is Wag̵as he Mulin-ulin he ed-ulin kenitew, ne sevaha zà daan is ebperetengen tew he ketulusan tenged te midhimu kiw he menge tumutuu.

Kulusas 2:14

Ne minsan pa te wazè kiw medtuman te insurat he kesug̵uan din, pinaag̵i te kebpatey ni Kristu ziyà te krus, in-awè din is kesug̵uan ne tenged kayi wazè en igkesiluti zin kenitew.

Kulusas 3:15

Ne kinahanglan daan, he iyan niw ipelavi ziyà te g̵ehinawa niw is kelinew he ibeg̵ey ni Kristu su umba midhimu kiw he tumutuu te Megbevayà su wey kiw mebmelinawen su nesevaha kiw is menge tumutuu. Ne layun niw peselemati te Megbevayà is gag̵ew zin keniyu.