Ipisu 1:7 - Manobo Western Bukidnon

⁷ Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 1:7 Кръстосани препратки

Mateo 20:28

Su iring te siak, is Kakey te Menusiyà, kenà iyan inhendini ku te kelibutan is wey a metevangi te menge etew, kekenà, wey a meketavang ne wey a zaan mekepehimatey wey ku mevelukasi is mezakel he menge etew.”

Mateo 26:28

Su lengesa ku heini he ibpetig̵is wey mepelisi is mezakel he menge etew wey mepesaylu is menge salè dan. Tuus heini te paag̵i te kegkelibri he midtukud te Megbevayà.

Mateo 6:12

peseyluwa key te menge salè dey iring te nekepesaylu key te nekesalà kenami.

Marcos 14:24

Ne migkag̵i si Jesus te, “Iyan heini lengesa ku he ibpetig̵is wey mepelisi is mezakel he menge etew. Tuus heini te paag̵i te kegkelibri he midtukud te Megbevayà.”

Lucas 1:77

Ibpesavut nu kandan he egkeveg̵ayan sikandan te untung he wazà pidtemanan emun ebuyù dan te pesaylu ziyà te Megbevayà.

Lucas 24:47

Ne ibpesavut daan dutun he kinahanglan he edsug̵uen ku sikiyu te kebpenudtul te Meupiya he Tudtulanen. Ebpuunan niw is kebpenudtul niw zini te Hiruselim ne ieneb niw heini ipesavut te tivuuk he kelibutan. Ipesavut niw he kinahanglan he ed-iniyug̵an te menge etew is memezaat he ulaula ne human dan ebpeseyluwa te Megbevayà.

Juan 20:23

Ne tenged kayi emun ebpeseyluwen niw is minsan hentei he nekesalà, ebpeseyluwen daan te Megbevayà, ne emun kenè niw ebpeseyluwen, kenà daan ebpeseyluwen te Megbevayà.”

Nengeulaula 10:43

Netagnà si Jesu Kristu te langun he ebpemeneuven dengan te Megbevayà ne migkag̵i zan he pinaag̵i te g̵ehem te ngazan din, is langun he edsarig kandin, ebpeseyluwen din sikandan te menge mezaat he ulaula zan.”

Nengeulaula 2:38

Ne midtavak si Pedro te, “Kada sevaha keniyu, iniyug̵i zin is mezaat he ulaula zin ne mebpebewtismu wey metueni he ebpekidsevaha sikandin ki Jesu Kristu. Ne human egkepesaylu is menge salè din ne is Wag̵as he Mulin-ulin, ibeg̵ey kandin te Megbevayà.

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

Nengeulaula 3:19

Ne g̵untaan kinahanglan he ed-iniyug̵an tew en is memezaat he ulaula. Ed-empuan tew is Nengazen ne ebpeseyluwen kiw zin te menge salè tew. Ne zutun duen timpu he ebeg̵ayan is gehinawa tew te zesen he ziyà ebpuun te kandin.

Ruma 2:4

Kunaan nu vuwa ke g̵eina te utew mepelevayen wey metulanged is Megbevayà, ne kenè en kinahanglan he ebpezumdumahan nu is menge lalag din. Iyan, iyan ketezengan ke maan is utew velig̵eg̵awen is Megbevayà su ed-eg̵aken ke zin su wey nu meiniyug̵i is mezaat he ulaula.

Ruma 3:24

Iyan, tenged dà te g̵ag̵ew kenitew te Megbevayà ed-isipen kiw zin gihapun he metazeng he henduen be te wazè kiw mekeulaula te mezaat su midlibri kiw ni Jesu Kristu.

Ruma 3:25

Midsug̵ù sikandin te Megbevayà wey mehimu sikandin he pemuhat he elili kenitew, ne tenged te kegkepelisi kenitew te lengesa zin ebpeseyluwen te Megbevayà is menge salè tew emun edtuuwan tew sikandin. Midhimu heini te Megbevayà su wey tew mesavut he metazeng is hukum din, minsan pa zengan tenged te meinentusen sikandin, wazè din dè pa siluti is menge etew tenged te menge salè dan.

Ruma 9:23

Ne iyan heini mid-ulaula zin su wey sikita is egkehizuwan din, ikepesavut din kenita ke hengkey is utew meupiya he kebpekesavuk din su midteg̵enahan ki zin wey ki zin keuzemà metulus.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

2 Kurintu 8:9

Netuenan ta ke hengkey is kezekelà te g̵ag̵ew kenita te Nengazen tew he si Jesu Kristu. Su tenged te hizu zin kenita, minsan te utew sikandin sepian diyà te langit, midhimu zin he utew sikandin ayuayu pinaag̵i te kebpeetew zin wey kebpehimatey zin. Ne tenged kayi te kegkeayuayu zin egkehimu ki he utew sepian.

Ipisu 1:14

Is ked-ulini kenitew te Wag̵as he Mulin-ulin, ne iyan tuus kenitew he keuzemà ibeg̵ey zin kenitew te menge sakup din is langun he impenaad din kenitew. Ne pinaagi kayi egketuenan tew he keuzemà edhimesazen din is kedlibriya kenitew te kebpekesalè tew. Edelig̵en tew sikandin is mekeg̵eg̵ehem!

Ipisu 1:18

Id-ampù ku he iveg̵ey zin daan keniyu is kebpurung kedsavut su wey niw metueni ke hengkey is langun he meupiya he egkeperateng tew keuzemà tenged te midhimu kiw en he menge tumutuu zin, ne wey niw zaan metueni he utew mezakel zutun is menge meupiya he idtuvad din kenitew.

Ipisu 1:6

Edelig̵en tew is Megbevayà tenged te utew zekelà he mekeg̵eg̵ehem he g̵ag̵ew zin he intuvad din kenitew pinaag̵i te kebpekidsevaha tew te mahal he Anak din he si Jesus.

Ipisu 1:8

Kenà pinaag̵i te sukud is kegkeg̵eg̵awi zin kenitew, kekenà, utew subra is gag̵ew zin kenita. Ne imbeg̵ey zin daan kenita is kedsavut wey ketau su wey tew metueni ke hengkey is paag̵i zin.

Ipisu 2:4

Ne minsan pa te iyan en haazà, utew zekelà is hizu te Megbevayà kenitew ne utew kiw mahal ziyà te g̵ehinawa zin.

Ipisu 2:7

Umba mid-ulaula zin heini su wey ikepeehè din kenitew is utew lavew he kezekelà te g̵ag̵ew zin wey kedtavang din kenitew pinaag̵i ki Jesu Kristu te wazè din pidtemanan.

Ipisu 3:16

Ne edhengyuan ku sikandin he puun te utew zekelà he g̵ehem din, beg̵ayi kew zin te utew melig-en he kedtuu pinaag̵i te ked-ulini keniyu te Wag̵as he Mulin-ulin,

Ipisu 3:8

Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

Pilipus 4:19

Ne is Megbevayà, iyan daan ebeg̵ey keniyu te langun he kinahanglan niw tenged te kebpekidsevaha niw ki Jesu Kristu su utew zekelà is ketig̵eyunan din.

Kulusas 1:14

Ne pinaag̵i kayi te Anak din, nevelukasan kiw zin te kegkeuripen kenitew ni Setanas ne mibpesaylu kiw zin te menge ulaula tew he mezaat.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

Kulusas 2:13

Ne sikiyu, wazè niw pa zengan untung he wazè din pidtemanan tenged te memezaat is menge ulaula niw te kenà menge Hudiyu wey tenged te midtuman niw is memezaat he kebayà te lawa niw. Ne minsan pa zutun, mibeg̵ayan kew te Megbevayà te untung he wazè din pidtemanan ne nevanhew kew en duma ki Kristu. Mibpesaylu kiw te Megbevayà te langun he menge salè tew.

Kulusas 2:2

Iyan idhag̵ù ku su wey melig-eni is kedtuu niw te Megbevayà pinaag̵i te kegkeupakat niw wey pinaag̵i te kebmahala niw te uman sevaha keniyu. Egkesuatan ku he meheg̵et is kegkesavut niw te impenurù keniyu he iyan kes impezayag te Megbevayà keniyu mehitenged ki Kristu.

1 Timoteo 2:6

Imbelavag din is untung din ne mibpehimatey su wey zin mevelukasi is langun he menge etew. Ne pinaag̵i kayi, dutun te hustu he timpu, impeehè din he egkesuatan te Megbevayà he melibri te silut is tivuuk he menusiyà.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Tito 3:6

Midhimu te Megbevayà he mepurung ki meulini te Wag̵as he Mulin-ulin pinaag̵i te kebpehimatey ni Jesu Kristu he Menluluwas tew.

Hibriyuhanen 9:22

Impenurù te kesug̵uan he kinahanglan he ebpelisan te lengesa is hapit minsan hengkey he egemiten dan te ked-azap. Ne iring din ded daan wey zà egkepesaylu is menge salà te menge etew ke zuen ibpelengesa.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Juan 2:12

Ebpesuratan ku sikiyu, menge anak ku, su nengepesaylu en is menge salè niw tenged ki Kristu.

1 Juan 2:2

Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.

1 Juan 4:10

Is tutuu he g̵ag̵ew, kenà iyan is kebmahala tew te Megbevayà, kekenà, iyan is kebmahala zin kenitew wey is kebpehendiniya zin te Anak din su wey pinaag̵i te kebpehimatey zin mepesaylu is menge salè tew.

Impezayag 14:4

Iyan haazà he menge maama he wazè dan mekesalà pinaag̵i te kedhilavet te kenè dan esawa su utew lumpiyu is menge ulaula zan ne wazè dan suwayi sikan is nati he kerehidu te minsan hendei sikandin ebpevayà. Mibelukasan sikandan puun duen te perayan he iyan is tivuuk he menusiyà wey zan mehimu he iyan nepengilizan dutun wey ikeveg̵ey sikandan diyà te Megbevayà wey ziyà te nati he kerehidu.

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.