Ipisu 1:18 - Manobo Western Bukidnon

¹⁸ Id-ampù ku he iveg̵ey zin daan keniyu is kebpurung kedsavut su wey niw metueni ke hengkey is langun he meupiya he egkeperateng tew keuzemà tenged te midhimu kiw en he menge tumutuu zin, ne wey niw zaan metueni he utew mezakel zutun is menge meupiya he idtuvad din kenitew.

Ipisu 1:18 Кръстосани препратки

Mateo 13:15

Su heini he menge etew, midmezesen is isip dan. Edsebpengen dan is telinga zan, edlipezengen dan is menge mata zan. Su emun kenà, ebpekeehè dan ne ebpekezineg dan, ne egkesavut dan is hustu ne edsarig dan kedì ne edlibriyen ku sikandan.’ ”

Marcos 10:17

Ne zutun te edlaus en edhipanew ensi Jesus, nekesaut kandan is sevaha he maama ne midluhud haazà diyà te etuvangan ni Jesus. Ne ke sikandin te, “He Menunudlù, utew meupiya is menge ulaula nu. Hengkey is ed-ul-ulahan ku wey a meveg̵ayi te untung he wazà pidtemanan?”

Lucas 24:45

Ne zutun impesavut din human kandan is langun te impemesurat he Lalag te Megbevayà.

Nengeulaula 16:14

Is sevaha zutun te menge vahi, ne egngezanan ki Lydia he tigTiyetira he zutun ed-ubpà te inged he Pilipus. Iyan petig̵ayun din is ebpemelegyà te manggad he merudtem. Edsimba sikandin te Megbevayà. Midtuvazan sikandin te Megbevayà wey mekezawat te ibpesavut ni Pablo.

Nengeulaula 26:18

Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

Ruma 11:29

Su kenà egkehalinhalin is ed-isipen te Megbevayà, kekenà, is ebpilien din he menge etew, ne iyan daan edtuvazan din te meupiya.

Ruma 2:4

Kunaan nu vuwa ke g̵eina te utew mepelevayen wey metulanged is Megbevayà, ne kenè en kinahanglan he ebpezumdumahan nu is menge lalag din. Iyan, iyan ketezengan ke maan is utew velig̵eg̵awen is Megbevayà su ed-eg̵aken ke zin su wey nu meiniyug̵i is mezaat he ulaula.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

2 Kurintu 4:6

Su zutun te kedlimbag̵a te Megbevayà te langun migkag̵i sikandin te, “Maawà is kerusireman ne mehimu is kerayag.” Ne iyan daan sikandin kes midtayew te isip dey su wey zey mesavut ke hengkey is gehem te Megbevayà he impezayag pinaag̵i ki Jesu Kristu.

Gelasya 5:5

Iyan, sikami mulà, pinaag̵i te g̵ehem te Wag̵as he Mulin-ulin wey tenged te kedtuu zey kandin, iyan ebpeebuten dey is kedhimuwa kenami he metazeng te Megbevayà.

Ipisu 1:11

Is langun he ed-ul-ulahan te Megbevayà, ne iyan kedtumana te tuyù din wey egkesuatan din. Ne tenged te iyan tuyù din, mibpilì key zin is menge tumutuu he Hudiyu wey key mehimu he menge sakup din he ebpekidsevaha ki Kristu. Iyan heini tuyù din he zaan he mid-isip din. Ne sikami is menge Hudiyu he nengehuna he nemeketuu ki Kristu, umba mibpilì key zin su iyan egkesuatan din he pinaag̵i kenami edelig̵en sikandin he utew mekeg̵eg̵ehem.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 2:12

Netuenan niw he zengan wazè niw upakat ki Kristu ne wazè kew iragkes te menge etew he pinilì te Megbevayà. Wazè kew zaan mekeambit duen te menge meupiya he impenaad te Megbevayà kandan. Wazà egkepaabut niw he tavang te Megbevayà ne kenà duen dà taman su wazè niw metueni ke hentei is tutuu he Megbevayà dini te kelibutan.

Ipisu 3:16

Ne edhengyuan ku sikandin he puun te utew zekelà he g̵ehem din, beg̵ayi kew zin te utew melig-en he kedtuu pinaag̵i te ked-ulini keniyu te Wag̵as he Mulin-ulin,

Ipisu 3:8

Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Ipisu 4:4

Su sikitew is langun he menge tumutuu, sevaha kiw zà he lawa, ne sevaha zà is Wag̵as he Mulin-ulin he ed-ulin kenitew, ne sevaha zà daan is ebperetengen tew he ketulusan tenged te midhimu kiw he menge tumutuu.

Ipisu 5:8

Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà.

Pilipus 3:14

Ebpenigudu e pa wey ku mekuwa is suhul te Megbevayà su iyan heini ketezengan ke maan is mid-umew kiw zin te ked-angken te untung he wazà pidtemanan pinaag̵i te kebpekidsevaha tew ki Jesu Kristu.

Kulusas 1:12

Ne kenà duen dà taman su zekelà dutun is kebpeselemat niw te Amey tew he Megbevayà tenged te kedhimuwa zin keniyu he zait he mekeambit kew zutun te langun he ibeg̵ey zin diyà te keniyu te menge g̵aked din he midteyawan is isip dan.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

Kulusas 1:5

Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

Kulusas 2:2

Iyan idhag̵ù ku su wey melig-eni is kedtuu niw te Megbevayà pinaag̵i te kegkeupakat niw wey pinaag̵i te kebmahala niw te uman sevaha keniyu. Egkesuatan ku he meheg̵et is kegkesavut niw te impenurù keniyu he iyan kes impezayag te Megbevayà keniyu mehitenged ki Kristu.

Kulusas 3:15

Ne kinahanglan daan, he iyan niw ipelavi ziyà te g̵ehinawa niw is kelinew he ibeg̵ey ni Kristu su umba midhimu kiw he tumutuu te Megbevayà su wey kiw mebmelinawen su nesevaha kiw is menge tumutuu. Ne layun niw peselemati te Megbevayà is gag̵ew zin keniyu.

1 Tiselunika 2:12

Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

2 Tiselunika 1:11

Tenged kayi layun dey sikiyu id-ampù. Ed-ampù key he himuwa te Megbevayà is menge ulaula niw he zait te kedtuu niw kandin. Ed-ampù key he pinaag̵i te g̵ehem din himuwa zin he tumana niw is minsan hengkey he meupiya he ulaula he iyan en tuyù niw tenged te midtuu kew kandin.

2 Tiselunika 2:16

Berakat he lipaya kew wey lig-eni kew te Nengazen tew he si Jesu Kristu wey te Amey tew he Megbevayà su wey meupiya is langun he menge vaal niw wey is langun he menge lalag niw. Mahal kiw layun diyà te g̵ehinawa zin ne pinaag̵i te g̵ag̵ew zin kenitew zuen tew igkelipey he wazè din pidtemanan wey zuen tew zaan utew meupiya he ebperetengen.

1 Timoteo 6:12

Penigudu ka he meupiya is kedlumbè nu, he ke và egkeg̵iya, is kedtumana nu te langun he ebpeveelan kenikew tenged te neketuu ka. Hemeni nu is untung he wazè din pidtemanan su umba midhimu ka te Megbevayà he tumutuu kandin su wey nu heini maangken. Nekepenudtul ka ziyà te mezakel he menge etew he neketuu ka te tutuu he tuluuwen.

Tito 2:13

Su zuen edteg̵azan ta he andew he zutun ibpeg̵awag̵awa is lavew he Megbevayà he iyan Menluluwas tew he si Jesu Kristu he utew zekelà is gehem din. Iyan sikandin ebperetengen ta.

Tito 3:7

Umba mid-ulaula zin heini su wey tenged te g̵ag̵ew zin kenita meisip ki zin he metazeng ne maangken ta is untung he wazà pidtemanan he iyan ebperetengen ta.

Hibriyuhanen 10:32

Isipa niw is timpu zengan hein sikan kew pa meteyawi te tutuu he tuluuwen ne midtuuwan niw. Utew mezakel is kemereg̵enan he nengeeg̵iyan niw, iyan, nekeantus kew ne wazà haazà ikeawà te kedtuu niw.

Hibriyuhanen 6:4

Su penenglitan duen menge etew he neteyawan te Megbevayà is isip dan. Nesavut dan en ke hengkey is ibeg̵ey kenitew ziyà te langit, ne nekeambit dan en te g̵ehem te Wag̵as he Mulin-ulin, ne netuenan dan en is meupiya he impesavut te Megbevayà, ne neehè dan daan is egkehimu te g̵ehem he ibpaahà te Megbevayà keuzemà te ketepusan he timpu. Ne emun ed-iniyug̵an dan heini kenè en egkehimu he ibpelikù dan ibpeuman wey zan meiniyug̵i is mezaat he menge ulaula zan. Henduen be te in-uman dan iransang diyà te krus is Anak te Megbevayà ne edhimuwen dan he sumpelita sikandin te menge etew.

1 Pedro 1:3

Utew zekelà is kebpeselemati tew te Megbevayà he iyan Amey te Nengazen tew he si Jesu Kristu. Su tenged te zekelà is hizu zin kenitew, mibeg̵ayan kiw zin te veg̵u en he untung. Ne g̵untaan ebpekeperateng kiw he egkevanhew kiw keuzemà su mibanhew zin si Jesu Kristu.

1 Pedro 3:9

Ke zuen ebpesipala keniyu kenè niw velesi te mezaat. Ke zuen edrawak keniyu kenè niw zaan penrewaki, kekenà, belesi niw te meupiya. Su umba midhimu kew te Megbevayà he menge tumutuu su wey kew zin metuvazi te meupiya.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.