Ipisu 1:17 - Manobo Western Bukidnon

¹⁷ Is Megbevayà te Nengazen tew he si Jesu Kristu he iyan daan Amey tew he zait he ebentug̵en, edhengyuan ku layun sikandin he pinaag̵i te Wag̵as he Mulin-ulin, ne iveg̵ey zin keniyu is ketau wey ipeg̵awag̵awa zin keniyu is kegketueni niw te menge ulaula zin.

Ipisu 1:17 Кръстосани препратки

Mateo 11:25

Ne zutun mid-ampù si Jesus he egkag̵i te, “Amey ku he Nengazen te langit wey tanà, dekelà is kebpeselemati ku kenikew su is in-eles nu wey kenà mesavut te menge uluwanen wey uvag en memetau, impesavut nu en diyà te menge etew he wazè dan menge hanew.

Mateo 11:27

Ne mid-uman megkag̵i si Jesus diyà te menge etew te, “Is minsan hengkey, insarig kediey te Amey ku he Megbevayà. Wazà nesayud kedì te Anak te Megbevayà, kekenà, iyan dà is Amey ku he Megbevayà. Ne wazà daan nesayud te Amey ku he Megbevayà, kekenà, iyan e zà is Anak din wey sikan is menge etew he mibpengelinteuwan ku he mesayud dan kandin.

Mateo 16:17

Ne migkag̵i si Jesus te, “Simon, anak ni Juan, midtuvazan ka te Megbevayà su wazè nu metueni heini pinaag̵i te etew, kekenà, impinted kenikew te Amey ku he ziyà te langit.

Mateo 20:33

Ne midtavak dan te, “Datù, iyan kinahanglan dey is mekeehè key.”

Mateo 6:13

Ipekeziyù key kenikew te mezesen he penuley ne ilikey key kenikew ki Setanas.’

Lucas 12:12

Su is Wag̵as he Mulin-ulin, iyan ebpenurù keniyu zutun he timpu; ne egketag̵ù diyà te g̵ehinawa niw is ibpekag̵i zin keniyu.”

Lucas 2:14

ke sikandan te, “Edelig̵en tew is Megbevayà he ziyà te langit. Ne zini te lumpad te kelibutan mebmelinawen is kebpekesavuk te langun he menge etew he igkesuat te Megbevayà.”

Lucas 21:15

Su iyan e en metau te idtavak niw te menge insè dan. Ne ibeg̵ey ku zutun keniyu is ketau te ked-isip-isip wey kew meketavak. Ne zutun haazà is menge kuntada niw, kenè dan ebpeketavak te ketezengan niw ne kenè dan daan ebpekepeg̵intarù te tutuu he egkeg̵iyen niw.

Juan 14:17

Iyan sikandin sikan is Wag̵as he Mulin-ulin he tutuu is ibpenurù din. Kenà heini egkezawat te menge etew zini te kelibutan he kuntada te Megbevayà su kenè dan egkekilala sikandin ne kenè dan egkesavut ke hentei sikandin. Sikiyu mulà, nesavut niw en ke hentei sikandin su ziyà ed-ubpà te keniyu ne kenà daan ed-awà diyà te keniyu.

Juan 14:26

Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Juan 16:3

Umba ebeelan dan heini keniyu su siak wey is Amey ku, wazè key zan mekilala.

Juan 17:3

Ne iyan heini paag̵i he egkezawat dan is untung he wazà pidtemanan. Kinahanglan he egkesavut dan ke hentei ka is sevaha zà he tutuu he Megbevayà wey kinahanglan he egkesavut dan daan ke hentei a is Anak nu he si Jesu Kristu.

Juan 20:17

Ne migkag̵i kandin si Jesus te, “Kenè ka kepkep dini su wazè e pa vetuna pehendiyà te Amey ku. Beyai nu is menge suled ku ne keg̵iya nu te, ‘Edhendiyà a te Amey ku, diyà te Megbevayè ku. Iyan daan sikandin Amey niw wey Megbevayè niw.’ ”

Nengeulaula 6:10

Iyan, mibeg̵ayan si Esteban te ketau te Wag̵as he Mulin-ulin umba wazè dan igkelawan te ketezengan din.

Nengeulaula 7:2

Ne midtavak si Esteban te, “Sikiyu is menge ebmeg̵urangen wey menge suled ku, pemineg̵a niw is menge lalag ku keniyu. Dengan, kes kepuun tew he si Abraham, mibpaahà kandin is mekeg̵eg̵ehem he Megbevayà te kemulu pa ziyà si Abraham ed-ubpà te tanà he Misuputamya hein wazè pa sikandin medhalin diyà te inged he Haran.

Ruma 1:28

Ne g̵eina te egkeg̵iyen dan he wazè en pulus te kedtuuwi te Megbevayà, mid-iniyug̵an sikandan te Megbevayà ne tenged kayi iyan ebayàbayà kandan is kelelalung he netag̵ù diyà te isip dan ne ed-ul-ulahan dan is kenà hustu.

Ruma 15:6

Ne emun iyan haazà ne human egkesevaha is kedalig niw te Megbevayà tew wey Amey te Nengazen tew he si Jesu Kristu.

1 Kurintu 12:8

Ne ziyà te zuma ibeg̵ey pinaag̵i te Wag̵as he Mulin-ulin is ketau te kedseysey te tutuu he tuluuwen; ne ziyà te zuma pa ibeg̵ey pinaag̵i te g̵ehem te Wag̵as he Mulin-ulin is ketau te kedseysey te memezalem he ibpepenurù te Megbevayà.

1 Kurintu 14:6

Ne penenglitan, menge suled, ke ebpekeuma a ziyan ne iyan dà egkeg̵iyen ku keniyu is pinaag̵i zà te kineg̵iyan he kenè niw egketuenan, hengkey is pulus din? Deyzey ke idseysey ku keniyu is impesavut kedì te Megbevayà ne emun kenà haazà, ne kinahanglan he zuen ibpenurù ku keniyu he tuluuwen wey ke penurù be he impesavut kedì, ne human duen pulus te egkeg̵iyen ku.

1 Kurintu 2:10

Ne heini is in-eles din dengan, impesavut din en kenitew pinaag̵i te Wag̵as he Mulin-ulin. Su is Wag̵as he Mulin-ulin, egketuenan din is minsan hengkey, minsan is utew mezalem he in-eles he menge isip te Megbevayà.

1 Kurintu 2:8

Ne haazà is menge kelibutanen he pengulu, wazè dan mesuati te edsavut ke hengkey is edhimuwen te Megbevayà su ke nesavut dan, wazè dan pezem iransang te krus kes mekeg̵eg̵ehem he Nengazen te langun.

2 Kurintu 12:1

Minsan pa te wazà pulus te kedantal ku, edantal e zed gihapun. Ne g̵untaan egkeg̵iyen ku keniyu is impezayag wey is impaahà kedì te Nengazen.

Ipisu 1:3

Dekelà utew is kebpeselemati tew te Megbevayà he Amey te Nengazen tew he si Jesu Kristu su tenged te kebpekidsevaha tew ki Kristu, intuvad din kenitew ziyà te langit is minsan hengkey he meupiya pinaag̵i te ked-ulini kenitew te Wag̵as he Mulin-ulin.

Ipisu 3:5

Dengan wazà heini ipezayag diyà te minsan hentei he menusiyà, iyan, guntaan, pinaag̵i te Wag̵as he Mulin-ulin, impezayag en te Megbevayà diyà te menge epustul wey ebpemeneuven din.

Ipisu 4:13

Pinaag̵i kayi egkehimu human he egkesevaha kiw te kedtuu tew wey kegketueni tew te menge ulaula te Anak te Megbevayà. Ne zutun egkepurung egkeheg̵et is kedtuu tew ki Jesus ne zutun wazà kurang te menge ulaula tew iring te wazà daan kurang te menge ulaula ni Kristu.

Pilipus 3:15

Ne is langun te sikitew he meg̵urang en te kedtuu, kinahanglan he iring kayi zaan is isip tew wey g̵ehinawa tew. Iyan, emun kenè kew egkengeuyun ibpetuenan keniyu te Megbevayà is benar.

2 Timoteo 2:25

Emun menayù is kebpenurua zin te menge kuntada zin, kela ke mahalin te Megbevayà is gehinawa zan wey zan mesavut is tutuu he tuluuwen.

Tito 1:1

Sikew, Tito, ebpesuratan ku sikew. Iring ka te tutuu he anak ku su is kedtuu nu te Nengazen, ne iring daan te kedì he kedtuu kandin. Berakat he ikeg̵ag̵ew ka te Megbevayà wey te Menluluwas tew he si Jesu Kristu wey veg̵ayi ke zan te melinawen he kebpekesavuk. Iyan a si Pablo is sulug̵uen te Megbevayà wey is epustul, he ke và dà egkeg̵iya, sug̵ù ni Jesu Kristu. Iyan insug̵ua zin kedì su wey ku meheg̵et is kedtuu te menge etew he pinilì te Megbevayà, ne wey ku zaan meheg̵et is kedsavut dan te tutuu he tuluuwen he iyan edtuuwan ta. Elin daan insug̵ua zin kedì is wey zan mesavut he ebpekeperateng dan te untung he wazà pidtemanan. Dengan te wazè pa limbag̵a is minsan hengkey, migkag̵i te Megbevayà he ibeg̵ey zin kenitew heini is untung ne netuenan ta he kenà egkehimu he kenè din edtumanen is egkeg̵iyen din. Ne g̵untaan iyan en timpu te kebpetueni zin kayi te untung pinaag̵i te Meupiya he Tudtulanen. Ne heini he tudtulanen, insarig kediey te Megbevayà he menluluwas tew.

Santiago 2:1

Menge suled, geina te menge tumutuu ki ki Jesu Kristu, is mekeg̵eg̵ehem he Nengazen, kinahanglan he pedrerepenga ta is kedtehuza ta te langun he menge etew.

2 Pedro 1:3

Pinaag̵i te g̵ehem te Megbevayà edtevangan kiw zin te mezakel he paag̵i wey kiw meketuman te menge sug̵ù din kayi te ked-ubpè tew zini te kelibutan. Umba egkehimu heini su impekilala en kenitew si Jesu Kristu he iyan mibpetuu kenitew wey kiw mekeambit te ketazeng din wey te utew zin kegkelavew.

2 Pedro 3:18

Kinahanglan he pinaag̵i te kegkeg̵eg̵awi keniyu te Nengazen tew wey Menluluwas tew he si Jesu Kristu, med-iseg is kedsevuta niw te ibpesavut din. Berakat he iyan sikandin edelig̵en guntaan wey te wazà pidtemanan.

Impezayag 7:12

Ne migkag̵i zan te, “Benar iyan su zait is Megbevayè tew he edelig̵en wey ebentug̵en wey edtehuzen wey ebpeselematan su iyan dà sikandin lavew he metau, iyan sikandin mekeg̵eg̵ehem wey mezesen; delig̵a sikandin te wazà pidtemanan!”