Ipisu 1:13 - Manobo Western Bukidnon

¹³ Ne iring din ded daan diyan te keniyu su hein impesavut keniyu is tutuu he tuluuwen he iyan kes Meupiya he Tudtulanen mehitenged te kedlibriya kenitew te silut, nemeketuu kew ki Kristu, ne midhimu kew zaan te Megbevayà he menge sakup din pinaag̵i te kebeg̵aya zin keniyu te Wag̵as he Mulin-ulin he zaan he impenaad din.

Ipisu 1:13 Кръстосани препратки

Lucas 11:13

Ne sikiyu is menusiyà he kenà memetazeng, emun meupiya is ibeg̵ey niw ziyà te menge anak niw, iyan pe be is Amey tew he Megbevayà diyà te langit kenà mebeg̵ey keniyu te Wag̵as he Mulin-ulin ke ebuyuen niw.”

Lucas 24:49

Ne edsug̵uen ku zini te keniyu is Wag̵as he Mulin-ulin he impesarig te Amey ku he Megbevayà. Iyan, dini kew tag̵ad te inged he Hiruselim taman te kenè kew pa egkevulusan te g̵ehem din he ebpuun te langit.”

Juan 1:17

Ne pinaag̵i ki Moises imbulus te Megbevayà sikan is menge kesug̵uan, iyan, pinaag̵i ki Jesus imbulus te Megbevayà is gag̵ew zin kenitew wey is tutuu he tuluuwen.

Juan 14:26

Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Juan 15:26

Ne mid-uman megkag̵i si Jesus te, “Is Menenavang he ebpuun te Amey ku, edsug̵uen ku zini te keniyu. Iyan sikandin sikan is Wag̵as he Mulin-ulin he ebpenurù te tutuu he edtuuwan. Ne emun ebpekeuma en dini te kelibutan, ibpesavut din ke hentei a.

Juan 3:33

Iyan, is minsan hentei he edawat kayi ebpekepenistig̵us he tutuu is egkeg̵iyen te Megbevayà.

Juan 6:27

Kenè niw pen-ahaa is egkeenen he meg̵aan dà egkehanew, kekenà, hag̵ù kew wey niw mekuwa is egkeenen he ebpekeveg̵ey te untung he wazà pidtemanan. Siak is Kakey te Menusiyà, iyan heini egkeenen he igkeveg̵ey ku keniyu su impeehè en te Amey ku he Megbevayà he ingkesuat din is menge vaal ku.”

Nengeulaula 1:4

Ne sengeandew te netig̵um dan, migkag̵i zin kandan he, “Kenè kew med-awà dini te inged he Hiruselim, kekenà, medtag̵ad kew taman te kenè pa ibeg̵ey keniyu kes impenaad te Amey tew he Megbevayà. Nekag̵i ku en heini keniyu he zaan.

Nengeulaula 13:26

Ne menge suled,” ke si Pablo, “sikiyu is menge zuma ku he kevuwazan ni Israyil wey kevuwazan ni Abraham, wey sikiyu zaan is kenà Hudiyu he ed-azap daan te Megbevayà, iyan kiw kes mibpeuwitan te Megbevayà te Meupiya he Tudtulanen wey kiw melibri te kedsiluti kenitew.

Nengeulaula 2:33

Midtulus en si Jesus ne impepinuu en diyà te lavew he pinuuwà diyà te zapit te egkekewanan te Megbevayà, ne imbeg̵ey kandin te Amey tew he Megbevayà is Wag̵as he Mulin-ulin he impesarig din kandin. Umba nengeehè niw wey nengezineg niw g̵untaan heini is langun he egkein-inuwan su ebpuun te g̵ehem te Wag̵as he Mulin-ulin he imbeg̵ey te Megbevayà.

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

Ruma 4:11

Umba mibpesirkunsidar sikandin su nehimu is kedsirkunsidar he tuus diyà te lawa zin he mid-isip te Megbevayà sikandin he metazeng tenged te kedtuu zin dutun te wazè pa sikandin sirkunsidara. Ne nehimu si Abraham he kepuun tew, he ke và dà egkeg̵iya, egkeiringan te langun he edtuu, minsan te wazà sikandan sirkunsidara. Umba edtuu zan su wey isipa te Megbevayà sikandan he metazeng.

Ruma 6:17

Dengan iring te nengeuripen kew te mezaat he kebayà, iyan, guntaan utew zekelà is kebpeselemati ku te Megbevayà su mibpurungan niw te edtuman is tutuu he tuluuwen he impenurù keniyu.

2 Kurintu 1:22

ne mibeg̵ayan kiw zin te g̵ehem he tuus he menge g̵aked kiw zin, ne midhimu zin he ulini kiw te Wag̵as he Mulin-ulin he iyan tuus he edtumanen din is minsan hengkey he penaad din kenitew.

2 Kurintu 6:7

ibpenurù dey is tutuu he Lalag te Megbevayà ne edtevangan key te g̵ehem te Megbevayà. Pinaag̵i kayi te langun egketuusan he menge sulug̵uen key te Megbevayà. Iyan kelasag dey wey lembitan dey is metazeng he ulaula.

Gelasya 3:14

Ne umba mibpehimatey si Jesu Kristu te iring dutun su wey pinaag̵i kandin ikeveg̵ey zaan diyà te menge etew he kenà menge Hudiyu is ketazeng he intuvad te Megbevayà ki Abraham. Ne pinaag̵i zutun sikitew is langun he edtuu ki Jesus, ebeg̵ayan kiw zin te Wag̵as he Mulin-ulin he impenaad dengan te Megbevayà.

Ipisu 4:21

Tutuu iyan he impesavut keniyu is keag̵i ni Kristu ne impesavut daan keniyu is tutuu he tuluuwen he impenurù din.

Ipisu 4:30

Ne kenè niw ul-ulaha is minsan hengkey he kenà egkesuatan te Wag̵as he Mulin-ulin su iyan sikandin tuus diyan te keniyu he g̵aked kew te Megbevayà, wey tuus daan he keuzemà egkeuma is andew he zutun edhimesaza te Megbevayà is langun he nepuunan din en he vaal te kedlibriya zin keniyu te kebpekesalà.

1 Tiselunika 2:13

Ne elin daan layun dey ibpeselemati te Megbevayà is: hein impesavut dey keniyu is Lalag te Megbevayà, midawat niw su nesavut niw he Lalag te Megbevayà ne kenà lalag te etew zà duen. Su pinaag̵i te lalag din egkelig-enan is kedtuu tew te nemeketuu kandin.

2 Timoteo 2:15

Himuwa nu is taman te egkehimu nu su wey mesuati te Megbevayà ne wey kenè nu ikeeled is baal nu. Kinahanglan he utew hustu is kebpenurua nu te tutuu he tuluuwen.

2 Timoteo 2:19

Ne minsan pa zutun kenà egkehalin kes tuluuwen he midtukud te Megbevayà su zuen insurat he Lalag te Megbevayà he edhenduen te, “Egketuenan te Nengazen ke hentei is menge etew he g̵aked din,” wey zuen pa zaan lalag he edhenduen te, “Is minsan hentei he egkag̵i he g̵aked sikandin te Nengazen, ne kinahanglan he ed-iniyug̵an din is mezaat he ulaula.”

2 Timoteo 3:15

ne egketenuzan nu he zengan te vatè ke pa nesavut nu en is insurat he Lalag te Megbevayà. Dutun te lalag din ebpuun is kedsavut he iyan paag̵i te kedlibriya kenita te silut emun edtuu ki ki Jesu Kristu.

Tito 2:11

Impeg̵awag̵awa en guntaan is gag̵ew te Megbevayà su wey mehimu he melibri te silut is tivuuk he menusiyà.

Hibriyuhanen 2:3

Ne iring din ded daan, sikitew is menusiyà, kenè kiw zaan ebpekelikey te silut te Megbevayà emun ebey-anan tew, ne kenè tew edtumanen is impenurù kenitew mehitenged te mekeg̵eg̵ehem he kedlibriya zin kenitew te silut. Is nehuna he nekepenudtul kayi, ne iyan en is Nengazen tew he si Jesus. Ne is menge etew he nemekezineg kandin, edtistig̵usan dan dini te kenitew he tutuu heini.

Santiago 1:18

Tenged te iyan egkesuatan din midhimu kiw zin he menge anak din pinaag̵i te kebpesevuta zin kenitew te tutuu he tuluuwen. Egkesuatan din he iyan kiw edhimuwen din he lavew te langun he menge linimbag.

Santiago 1:21

Engkezi niw en is minsan hengkey he meremerik he ulaula wey is kelelalung. Pesakup kew te Megbevayà; hemeni niw is lalag din he impesavut en keniyu su iyan ebpekelibri keniyu te silut.

1 Pedro 2:10

Su zengan kenè kiw menge sakup te Megbevayà ne g̵untaan menge sakup kiw zin en. Dengan wazè tew hanew zutun te hizu te Megbevayà, iyan, guntaan impezayag din en kenitew.

Impezayag 7:2

Ne zutun neehè ku zaan is sevaha pa he velinsug̵uen he ziyà ebpuun te zapit te edsilaan ne igkulang din is tiyap te wazè din kemetayen he Megbevayà. Ne haazà is heepat he velinsug̵uen he insarig kandan is kedèdeeti te tanà wey zag̵at, migkeg̵iyan din sikandan.