Ipisu 1:1 - Manobo Western Bukidnon

¹ Iyan a si Pablo is teg̵isurat kayi. Nehimu a he epustul ni Jesu Kristu, he ke và dà egkeg̵iya, midsug̵ù e zin, tenged te iyan egkesuatan te Megbevayà. Ibpeuwit ku heini is surat diyan te inged he Ipisu, diyan te keniyu te menge tumutuu he menge metinumanen te menge sug̵ù ni Jesu Kristu.

Ipisu 1:1 Кръстосани препратки

Lucas 16:10

Benar is egkeg̵iyen ku keniyu he emun egkeserig̵an ka te zeisek he azen, egkeserig̵an ka zaan te zekelà he azen. Ne emun limbungan ka te minsan deisek dà, ne wey ke pe be kenà medlimbung duen te zekelè en he ebpeg̵ewezan kenikew.

Nengeulaula 16:15

Mibpebewtismu sikandin wey is menge emurè din dutun te valey zin. Ne migkeg̵iyan key zin te, “Emun ed-isipen a keniyu he tutuu is kedtuu ku te Nengazen, diyè kew pemenahik te valey ku.” Ne wazè din mehimuwa zutun he wazè key mekezuma kandin.

Nengeulaula 18:19

Nekeuma zan diyà te inged he Ipisu ne mid-ewaan ni Pablo si Ekilu wey si Priscila. Midhendiyà sikandin te simbahan te menge Hudiyu ne mibpekibpezeyag̵à sikandin te menge ketezengan.

Nengeulaula 18:21

Su ke sikandin dutun te kegenat din te, “Edlikù a zini ke edtug̵ut is Megbevayà.” Ne nekeuntud te barku ne mid-awà diyà te Ipisu.

Nengeulaula 9:13

Ne midtavak si Eneniyas te, “Nengazen, netuenan ku pinaag̵i te mezakel he etew is utew memezaat he mid-ulaula zin diyà te menge sumusundan nu ziyà te Hiruselim.

Ruma 1:1

Iyan a si Pablo is teg̵isurat kayi. Uripen a ni Jesu Kristu ne midhimu e zin daan he epustul. Impenaad dengan te Megbevayà pinaag̵i te impesurat din te menge ebpeneuven din he zuen timpu he zuen Meupiya he Tudtulanen he ibpesavut kenitew. Umba mibpilì a he epustul su wey a mekepenudtul kayi te Meupiya he Tudtulanen.

Ruma 1:7

Ne tenged kayi, ebpesuratan ku sikiyu is langun diyan te inged he Ruma he mahal ziyà te g̵ehinawa te Megbevayà he midhimu zin he menge sakup din. Is Amey tew he Megbevayà wey is Nengazen tew he si Jesu Kristu, berakat he ikeg̵ag̵ew kew zan wey iveg̵ey keniyu is melinawen he kebpekesavuk.

Ruma 8:1

Ne sikita is nekidsevaha ki Jesu Kristu, kenè ki en egkehukuman te silut.

1 Kurintu 4:12

Kinahanglan he edhag̵ù key su wey zey mekuwa is menge kinahanglan dey. Ne ke edrewakan key te menge etew kenè key edtavak, kekenà, id-ampù dey sikandan he tuvazi sikandan te Megbevayà. Ne emun ebpesipelahan key ne ed-entusen dey.

1 Kurintu 4:17

Umba, edsug̵uen ku ziyan te keniyu si Timoteo. Minahal ku sikandin he anak he utew metinumanen te menge sug̵ù te Nengazen. Ibpenurù din keniyu is menge ulaula ku, ne iyan heini meupiya he ed-ul-ulahan te tumutuu ki Kristu, ne iyan daan ibpenurù ku te menge tumutuu ziyà te minsan hendei he inged.

2 Kurintu 1:1

Siak si Pablo. Migeraran a he epustul ni Jesu Kristu tenged te iyan egkesuatan te Megbevayà. Siak wey si Timoteo he suled tew, ebpesuratan dey sikiyu is langun he menge tumutuu te Megbevayà diyan te inged he Kurintu wey is langun daan he menge etew he neg̵aked te Megbevayà seled te tivuuk he prubinsya he Gerisya.

Gelasya 1:1

Siak si Pablo is midsurat kayi. Ibpeuwit ku heini ziyan te keniyu te langun he menge tumutuu ziyan te menge inged te tivuuk he prubinsya he Gelasya. Siak wey is langun he menge tumutuu he menge zuma ku zini, ebpengemusta keniyu. Epustul a, iyan, wazà a g̵erari he epustul te etew zà duen, ne kenà daan pinaag̵i te etew zà duen is kedsug̵ua kedì, kekenà, migeraran a he epustul ni Jesu Kristu wey te Amey tew he Megbevayà he mibanhew ki Jesus, ne iyan sikandan midsug̵ù kedì.

Gelasya 3:26

Ne g̵eina te iyan haazà, nehimu kew en pudu he menge anak te Megbevayà tenged dà te kedtuu niw ki Jesu Kristu.

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Gelasya 3:9

Ne midtuu si Abraham dutun te Lalag te Megbevayà, ne tenged dutun midtuvazan sikandin te Megbevayà; ne iring din ded daan ke edtuu is minsan hentei te Lalag te Megbevayà, edtuvazan daan sikandin te Megbevayà.

Ipisu 1:15

Ne tenged kayi, menge suled, geina te netudtulan a he mezesen is kedtuu niw te Nengazen tew he si Jesus wey zekelà is gag̵ew niw te minsan hentei he tumutuu kandin,

Ipisu 2:10

Su is kedlimbag̵a kenita he veg̵u, ne iyan baal te Megbevayà. Pinaag̵i te kebpekidsevaha ta ki Jesus midlimbag ki zin su wey ta meulaula is meupiya he midteg̵ana zin en he zaan wey ta meveeli.

Ipisu 2:13

Iyan, guntaan, tenged te nekidsevaha kew en ki Jesus, sikiyu is menge etew he utew meziyù te Megbevayà dengan, impeuvey kew zin en tenged te kebpelisi keniyu te lengesa ni Jesus dutun te kebpehimatey zin.

Ipisu 2:6

Ne is Megbevayà, tenged te nekidsevaha kiw ki Kristu, dutun te kebenhawa zin ki Kristu, mibanhew kiw zin daan wey kiw mekehadì duma ki Kristu ziyà te langit.

Ipisu 6:21

Si Tikiku is minahal tew he suled wey metinumanen he sulug̵uen te Nengazen tew, iyan ebpeketudtul keniyu mehitenged te kebpekesavuk ku wey ke hengkey is egkeulaula ku kayi.

Kulusas 1:2

Ebpesuratan ku sikiyu is menge g̵aked te Megbevayà diyan te inged he Kulusas he menge metinumanen te lalag ni Kristu. Berakat he ikeg̵ag̵ew kew te Amey tew he Megbevayà wey veg̵ayi kew zin te melinawen he kebpekesavuk.

Impezayag 17:14

Edtebeken dan sikan is nati he kerehidu ne egkezaag sikandan dutun te nati su egalen sikandin te minsan hentei he egalen wey hadì te minsan hentei he hadì. Ne is menge etew he edumahan dutun te nati, ne migeraran sikandan te menge impetuu wey menge pinilì, wey menge metinumanen he menge sumusundan te Megbevayà.”

Impezayag 2:10

Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.

Impezayag 2:13

Netuenan ku he sakup ni Setanas is inged niw. Ne minsan pa zutun midhemenan niw is kedtuu niw kedì ne wazè niw engkezi is menge penurù ku minsan dutun te kedhimetayi ki Entipas dengan. Metinumanen sikandin he ebpenudtul te menge lalag ku, ne midhimetayan sikandin diyan te inged niw he nesakup ni Setanas.