Impezayag 8:10 - Manobo Western Bukidnon

¹⁰ Ne zutun midhiyup te iketelu he velinsug̵uen is kandin he vudyung ne ebpuun te langit neulug is dekelà he vituen he egkeregreg he iring te sulù ne ziyà meketanà haazà te iketelu he vahin te menge wahig wey ziyà te iketelu he vahin te menge kalut.

Impezayag 8:10 Кръстосани препратки

Mateo 25:1

“Dutun te kedlikù ku, is kedhadì te Megbevayà, ne iring te sempità he sepulù he rag̵a he netukid te sulù su edsinug̵ungen dan is ebpengesawa.

Lucas 10:18

Ne zutun migkeg̵iyan sikandan ni Jesus te, “Si Setanas, is egalen te menge mezaat he mulin-ulin, neehè ku is kegkezaag̵a niw kandin ne utew meg̵aan su iring te kilat he ebpuun te langit.

Hudas 1:13

Iring daan sikandan te utew zezekelà he vag̵el ziyà te zag̵at ke zuen bagyu su iring is menge mekeeled-eled he ulaula zan te meremerik he vuràburà he ebpenlepew ziyà te veyvey. Iring sikandan te menge vituen he nekesuwey te hustu he nesevukan dan su kenè en egkeserig̵an is ibpenurù dan. Midteg̵ana te Megbevayà is utew merusirem he egkeubpaan dan te wazà pidtemanan.

Impezayag 1:20

Ibpesavut ku kenikew is in-eles dengan he kehulug̵an kayi te pitu he vituen he neehè nu he egewezan ku te kewanan he velad ku wey is kehulug̵an kayi te pitu he sulù he vulawan. Is pitu he vituen, iyan alung te pitu he velinsug̵uen te Megbevayà he ebantey te pitu he gurupu te menge tumutuu. Ne heini is pitu he sulù, ne iyan sikan is pitu he gurupu te menge tumutuu.”

Impezayag 12:4

Ne pinaag̵i te ikug din neg̵uyud din is iketelu he vahin te menge vituen diyà te langit ne nemeketimbag haazà diyà te tanà. Ne zutun edhithitindeg haazà is uled te etuvangan dutun te vahi he ed-anak su emun idlusad en haazà is id-anak din, ne egkeenen dutun te uled.

Impezayag 14:7

Ne mibpekezag̵ing is egkag̵i te, “Tehuza niw is Megbevayà wey ventug̵a sikandin su neuma en is timpu te kedsusi zin te menge ulaula te tivuuk he menusiyà! Ezapa niw is Megbevayà he iyan nenlimbag te langit wey tanà wey zag̵at wey menge puunà te wahig!”

Impezayag 16:4

Ne haazà is iketelu he velinsug̵uen, is lediyà he ziyà te kandin, mid-ulaan din diyà te menge wahig wey ebpuunan te menge wahig ne mibaluy he lengesa haazà is menge wahig.

Impezayag 6:13

Ne nengeulug dini te tanà is menge vituen he iring te menge mehilew he veg̵as te kayu he igira emun egkesug̵at te keramag ne egkengeulug.

Impezayag 8:7

Ne is egkehuna zutun te menge velinsug̵uen, midhiyup din is budyung din. Ne zutun, giyew wey hapuy he nesahug te lengesa is nengeulug diyà te tanà. Ne netutung dutun is iketelu he vahin te kelibutan. Netutung is iketelu he vahin te menge kayu wey naamin metutung is menge sagbet.

Impezayag 9:1

Ne midhiyup dutun te ikelima he velinsug̵uen is budyung din ne zutun neehè ku is bituen, he ke và dà egkeg̵iya, belinsug̵uen he ziyè en te tanà su neulug he ebpuun te langit. Ne imbeg̵ey ziyà te kandin is yawi he ebpekepuwas te vitu he wazà pidtemanan is kezalem din.

Impezayag 9:15

Ne zutun impaawè en haazà is heepat he velinsug̵uen. In-andam sikandan he zaan ne impetag̵ad sikandan taman kayi he uras, wey andew, wey vulan, wey tuig. Umba in-andam sikandan su wey zan mehimetayi is iketelu he vahin te tivuuk he menusiyà.

Impezayag 9:18

Ne pinaag̵i zutun te hapuy, wey evel, wey esupri he edlepew zutun te vèbè te menge kudà, migerè dan is iketelu he vahin te tivuuk he menusiyà.