Impezayag 6:10 - Manobo Western Bukidnon

¹⁰ Ne mibpekezag̵ing dan is edhangyù, ke sikandan te, “Sikew is mekeg̵eg̵ehem he Nengazen, wag̵as ka wey metinumanen ka! Sengemenu kelug̵ayad is kebpeketag̵ad dey taman te kenè nu pa ebelesan te silut is menge etew ziyà te kelibutan tenged te kedhimetayi zan kenami?”

Impezayag 6:10 Кръстосани препратки

Lucas 2:29

Ke sikandin te, “Na, Nengazen, midtuman nu en human is penaad nu kediey. Ne egkehimu en he idtug̵ut nu en he ebpatey a su wazè en human edteg̵azan ku.

Lucas 21:22

Su iyan en haazà sikan is timpu he netagnà dengan he zutun edsilutan te Megbevayà is menge kuntada zin he etew. Ne insurat heini zuen te ebpemeneuven dengan te Megbevayà.

Ruma 12:19

Kenè niw, menge minahal ku he suled, velesi is etew he ed-ulaula te mezaat diyà te keniyu, kekenà, pesegdana niw he iyan edsilut is Megbevayà su zuen insurat he Lalag te Megbevayà he edhenduen te, “Iyan a ebales; iyan a edsilut.”

Hibriyuhanen 12:24

Mid-uvayan tew zaan si Jesus he iyan datù tew he midhimu te veg̵u en he paag̵i te kebpekidsevaha tew te Megbevayà. Pinaag̵i te lengesa zin nengepelisan is menge salè tew. Tuus is lengesa zin te g̵ag̵ew kenitew te Megbevayà he utew haazà meupiya kenà te lengesa ni Abel zengan su is lengesa ni Abel, iyan tuus te silut te Megbevayà.

2 Pedro 2:1

Duen dengan menge teruen he etew he uvag kun ebpeneuven te Megbevayà ne iring din ded daan, duen menge etew he edlepew g̵untaan he ebpenurù te tarù diyan te keniyu. Sayep is ibpenurù dan te meeles ne ebpekezezaat heini te upakat niw te menge tumutuu. Ibpenurù dan he kenà Nengazen tew si Jesus he iyan pezem mibelukas kandan ne tenged dutun egketik-awan sikandan ke edsilutan dan.

Impezayag 11:18

Utew nengepauk kenikew is menge kuntada nu, iyan, netuman en is andew te kedsiluti nu kandan wey is andew te kedsusiya nu te nengeulaula te nemematey en. Iyan en heini timpu te kedsuhuli nu te menge sulug̵uen nu he menge ebpeneuven wey kedsuhuli nu zaan te langun he menge g̵aked nu he etew, se zekelà is pid-etawan din, se zeisek is pid-etawan din, is langun he edtahud kenikew. Iyan heini zaan timpu te kedèdeeti nu te langun he menge etew he midezaat te kelibutan!”

Impezayag 18:20

Ne sikiyu is menge meg̵inged diyà te langit, lipey kew tenged te limas kayi te zekelà he inged. Lipey kew zaan is menge tumutuu wey menge epustul wey ebpeneuven te Megbevayà su midsilutan te Megbevayà haazà is inged tenged te menge pesipala zin keniyu!

Impezayag 18:24

Midsilutan is dekelà he inged he Bebilunya su zutun mid-ag̵as is lengesa te menge etew he g̵aked wey ebpeneuven te Megbevayà. Ne is langun he nevunù dini te tivuuk he kelibutan, ne pinaag̵i zaan kayi te inged.

Impezayag 19:2

Metazeng wey hustu is kukuman din su midsilutan din haazà is nevantug he ebpelelevag he vahi he pinaag̵i te meremerik he vaal zin, neeneb is tivuuk he kelibutan te ked-ezapa te menge ledawan. Midsilutan sikandin te Megbevayà su midhimetayan din is menge sulug̵uen te Megbevayà.”

Impezayag 3:10

Ne tenged te metinumanen kew te sug̵ù ku he med-antus kew, ebentayan ku sikiyu wey kew kenè en ebpekesag̵ad te limas he egkeantus te tivuuk he menusiyà he ibpenggezam kandan.

Impezayag 3:7

Ne ke sikandin en maan te, “Pesurati nu is belinsug̵uen te Megbevayà he ebantey te menge tumutuu ziyan te inged he Piledilpya. Ne ke sikew te, ‘Siak si Jesus is egkag̵i; iyan a sikan is egkeserig̵an he mibpilì te Megbevayà. Imbeg̵ey kedì is keg̵ehem te kedhadì te g̵inhedian ku iring te kedhadì dengan ni Hadì David. Ne emun duen ebpuwasan ku wey mekeseled dutun te g̵inhedian ku, kenè en egkelekevan te minsan hentei. Ne emun duen etew he edlekevan ku, kenè en daan egkepuwasan te minsan hentei.