Impezayag 5:9 - Manobo Western Bukidnon

⁹ Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.

Impezayag 5:9 Кръстосани препратки

Mateo 20:28

Su iring te siak, is Kakey te Menusiyà, kenà iyan inhendini ku te kelibutan is wey a metevangi te menge etew, kekenà, wey a meketavang ne wey a zaan mekepehimatey wey ku mevelukasi is mezakel he menge etew.”

Mateo 26:28

Su lengesa ku heini he ibpetig̵is wey mepelisi is mezakel he menge etew wey mepesaylu is menge salè dan. Tuus heini te paag̵i te kegkelibri he midtukud te Megbevayà.

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

1 Kurintu 6:20

iyan teg̵ig̵aked kenita is Megbevayà su utew mahal is imbelukas din kenita. Umba, gemita niw is lawa niw te paag̵i he mevantug is Megbevayà.

1 Kurintu 7:23

Utew mahal is imbelukas kenitew te Megbevayà ne tenged kayi kinahanglan he kenè niw iyan sundani is etew zà duen, kekenà, iyan is Nengazen.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 5:19

Emun ebpelelelag̵è kew, gemita niw is menge lalag diyà te menge Salmo wey menge kentahan he idalig te Megbevayà, wey menge kentahan he ibpinted keniyu te Wag̵as he Mulin-ulin. Kentahi niw is Megbevayà ne pinaag̵i kayi te menge kentahan wey te menge Salmo, medlipey kew is edalig te Megbevayà.

Kulusas 1:14

Ne pinaag̵i kayi te Anak din, nevelukasan kiw zin te kegkeuripen kenitew ni Setanas ne mibpesaylu kiw zin te menge ulaula tew he mezaat.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Hibriyuhanen 11:14

Ne is menge etew he iring kayi g̵untaan, kenè dan ed-isipen he iyan hustu he inged dan heini is kelibutan, kekenà, ebperetengen dan he zuen selakew he inged he iyan hustu he inged dan.

2 Pedro 2:1

Duen dengan menge teruen he etew he uvag kun ebpeneuven te Megbevayà ne iring din ded daan, duen menge etew he edlepew g̵untaan he ebpenurù te tarù diyan te keniyu. Sayep is ibpenurù dan te meeles ne ebpekezezaat heini te upakat niw te menge tumutuu. Ibpenurù dan he kenà Nengazen tew si Jesus he iyan pezem mibelukas kandan ne tenged dutun egketik-awan sikandan ke edsilutan dan.

1 Juan 1:7

Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.

1 Juan 2:2

Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.

Impezayag 10:11

Ne zutun duen migkag̵i zini te kediey, ke sikandin te, “Kinahanglan he iuman nu ipenudtul is ibpepenudtul kenikew te Megbevayà he egkeulaula te mezakel he menge hadì wey menge etew ziyà te minsan hendei he g̵inhedian wey minsan hengkey he kineg̵iyan.”

Impezayag 11:9

Is langun he kelasi te menge etew te minsan hengkey he kineg̵iyan wey kepuun wey g̵inhedian, ne ed-ehaan dan is menge lawa zutun te zezuwa seled te tetelu wey liwazà he andew ne kenè dan idtug̵ut he ikeleveng haazà is dezuwa.

Impezayag 13:7

Ne midtug̵utan daan haazà is langgam he tebeka zin is menge etew he g̵aked te Megbevayà ne nezaag din dè pa sikandan. Ne imbeg̵ey kandin is kebayàbayà diyà te minsan hengkey he tribu wey minsan hengkey he kepuun, wey menge etew he minsan hengkey is kineg̵iyan dan, wey is minsan hengkey he g̵inhedian.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 14:6

Ne zutun neehè ku en maan is selakew en maan he velinsug̵uen he edlayang he utew mibpeketikang diyà te udtuwan. Ibpesavut din dutun is Meupiya he Tudtulanen he kenà egkehanew te minsan keenu. Impesavut din haazà te tivuuk he menusiyà, diyà te menge etew te minsan hengkey he kineg̵iyan wey minsan hendei he g̵inhedian, wey tribu, wey kepuun.

Impezayag 15:3

Ne egkentahan dan is kentahan duen te sulug̵uen te Megbevayà he si Moises he iyan sikan is kentahan he idalig dutun te nati he kerehidu. Ke sikandan te, “Sikew is Megbevayà, mekeg̵eg̵ehem ka he Nengazen te langun. Utew zekelà wey utew egkein-inuwi is langun he menge vaal nu! Hadì ka te langun he menge g̵inhedian. Metazeng wey tutuu is menge ulaula nu!

Impezayag 17:15

Ne zutun mid-uman megkag̵i haazà is belinsug̵uen diyà te kedì, ke sikandin te, “Haazà is menge wahig he neehè nu he zutun ebpinuu sikan is bahi, ne iyan kehulug̵an dutun is menge g̵inhedian wey kepuun wey utew medmezakel he menge etew he kenà ed-iring-iring is kineg̵iyan dan.

Impezayag 4:11

“He Nengazen dey he Megbevayà, dait ka he edelig̵en, dait ka he edtehuzen. Mekeg̵eg̵ehem ka su nenlimbag ka te minsan hengkey. Nesuat ka he edlimbag ne pinaag̵i kayi nehimu is langun.”

Impezayag 5:12

Ne migkanta zan is langun ne utew mezag̵ing is kegkanta zan. Ke sikandan te, “Is nati he kerehidu he mibpehimatey, dait sikandin he edelig̵en su dekelà is gehem din, dekelà is naazen din, dekelà is ketau zin, dekelà is desen din. Ebentug̵en dey, edtehuzen dey wey edelig̵en dey sikandin!”

Impezayag 5:6

Ne zutun duen neehè ku zutun te teliwazà te pinuuwà te edhadì wey te heepat he menge linimbag he kedesenan wey te menge ebmeg̵urangen. Iyan neehè ku zutun is: duen edhithitindeg he nati he kerehidu ne neehè ku zaan dutun te lawa zin is menge tulak te palì din te kedhimetayi kandin dengan. Pitu is sungey zin wey pitu zaan is mata zin he iyan is pitu he g̵ehem te Wag̵as he Mulin-ulin he edsug̵uen te Megbevayà he ibpeeneb din te tivuuk he kelibutan.