Impezayag 5:13 - Manobo Western Bukidnon

¹³ Ne zutun nezineg ku is kegkanta te langun he menge linimbag he ziyà te langit, dini te tanà wey ziyà daan te zizalem te tanà wey ziyà te zag̵at. Ne migkanta is langun he linimbag he ziyà te minsan hendei. Ke sikandan te, “Is ebpimpinuu ziyà te pinuuwà te edhadì wey is nati he kerehidu, delig̵a sikandan, tehuza sikandan, wey ventug̵a sikandan te wazà pidtemanan su iyan dan mekeg̵eg̵ehem!”

Impezayag 5:13 Кръстосани препратки

Mateo 6:13

Ipekeziyù key kenikew te mezesen he penuley ne ilikey key kenikew ki Setanas.’

Lucas 2:14

ke sikandan te, “Edelig̵en tew is Megbevayà he ziyà te langit. Ne zini te lumpad te kelibutan mebmelinawen is kebpekesavuk te langun he menge etew he igkesuat te Megbevayà.”

Juan 1:29

Hein mid-ilis he andew zutun, naahà ni Juan si Jesus he edhendiyà te kandin, ne ke si Juan diyà te menge etew, “Iyan heini sikan is etew he egngezanan te ibpemuhat he Nati he Kerehidu he ibeg̵ey te Megbevayà su pinaag̵i kandin egkeawà is menge memezaat he ulaula te menusiyà.

Ruma 11:36

Iyan sikandin sikan is nenlimbag te minsan hengkey; ne iyan sikandin ed-uwit te minsan hengkey he linimbag, ne pinaag̵i zaan te minsan hengkey he linimbag edelig̵en sikandin. Berakat he zelig̵a is Megbevayà te wazè pidtemanan.

Ruma 16:27

Is sebsevaha zà he Megbevayà he iyan dà nesayud te minsan hengkey, berakat he wazà pidtemanan te kedelig̵a kandin pinaag̵i ki Jesu Kristu.

Ruma 9:5

Mibpilì din dengan is menge kepuun dan. Ne hein mibpeetew si Kristu he iyan Megbevayà he ebayàbayà te langun, in-anak sikandin he zuma zan he Hudiyu. Berakat he zelig̵a sikandin te wazè din pidtemanan.

Ipisu 3:21

Berakat he zelig̵a sikandin pinaag̵i kenitew te langun he menge tumutuu zin wey pinaag̵i ki Jesu Kristu g̵untaan he timpu wey te wazè din pidtemanan.

Pilipus 2:10

Ne umba mid-ulaula heini te Megbevayà su ke egkezineg is gerar ni Jesus, ed-ezapen si Jesus te minsan hentei he linimbag he ziyà te langit wey zini te tanà, wey minsan diyà te Iveyaan. Ebpekeluhud dan kandin,

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

1 Timoteo 4:16

Purungi nu susiya is kenikew he ulaula wey is kebpenurù nu. Su emun edhemenan nu heini kenà iyan ke zà is egkelibri te silut, kekenà, pinaag̵i kenikew egkehimu he egkelibri zaan is menge etew he ebpememineg te ibpenurù nu.

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.

1 Pedro 5:11

Berakat he zelig̵a sikandin te wazà pidtemanan su iyan sikandin mekeg̵eg̵ehem.

Hudas 1:25

Edelig̵en tew sikandin su iyan dà sikandin Megbevayà; iyan sikandin Menluluwas tew pinaag̵i te Nengazen tew he si Jesu Kristu. Iyan sikandin egkevantug; iyan sikandin hadì; iyan sikandin mekeg̵eg̵ehem; iyan sikandin ebayàbayà dengan te wazè pa limbag̵a is minsan hengkey, wey g̵untaan, wey keuzemà te wazà pidtemanan.

Impezayag 1:6

Midhimu zin he iyan kiw edhedian din wey iyan kiw memumuhat he iyan kebpemuhat tew is ked-ezapa tew te Megbevayà he Amey zin. Tehuza sikandin wey medhadì sikandin te wazà pidtemanan!

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 5:1

Ne haazà is ebpimpinuu ziyà te pinuuwà te edhadì, neehè ku he egewezan din diyà te kewanan he velad din is midlulun he velesahan. Midsuratan is pesiziveluyà dutun te velesahan ne zuen pitu he tiyap he impezeket dutun su wey kenà meebriyi.

Impezayag 5:12

Ne migkanta zan is langun ne utew mezag̵ing is kegkanta zan. Ke sikandan te, “Is nati he kerehidu he mibpehimatey, dait sikandin he edelig̵en su dekelà is gehem din, dekelà is naazen din, dekelà is ketau zin, dekelà is desen din. Ebentug̵en dey, edtehuzen dey wey edelig̵en dey sikandin!”

Impezayag 5:3

Ne wazà naahà diyà te langit, dini te tanà, wey ziyà te zizalem te tanà he zait he ed-abri zutun te velesahan wey ebasa zutun.

Impezayag 5:6

Ne zutun duen neehè ku zutun te teliwazà te pinuuwà te edhadì wey te heepat he menge linimbag he kedesenan wey te menge ebmeg̵urangen. Iyan neehè ku zutun is: duen edhithitindeg he nati he kerehidu ne neehè ku zaan dutun te lawa zin is menge tulak te palì din te kedhimetayi kandin dengan. Pitu is sungey zin wey pitu zaan is mata zin he iyan is pitu he g̵ehem te Wag̵as he Mulin-ulin he edsug̵uen te Megbevayà he ibpeeneb din te tivuuk he kelibutan.

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.

Impezayag 6:16

Ne mibpemengulahì dan diyà te menge vuntud wey menge vatu. Ke sikandan te, “Lilizi key su wey key kenà maahà te ebpimpinuu ziyà te pinuuwà te edhadì he ziyà te langit ne wey key zaan kenà meumahi te pauk te nati he kerehidu.