Impezayag 4:4 - Manobo Western Bukidnon

⁴ Ne zuen daan dutun keluwaan wey heepat he pinuuwà he nekeelingkus dutun te pinuuwà te edhadì. Ne zutun ebpememinuu is keluwaan wey heepat he ebmeg̵urangen. Meputì is bisti zan ne zuen insuup diyà te ulu zan he menge kuruna he vulawan.

Impezayag 4:4 Кръстосани препратки

Mateo 19:28

Ne midtavak dutun si Jesus te, “Benar heini is egkeg̵iyen ku, siak is Kakey te Menusiyà, mekeg̵eg̵ehem a keuzemà te kedhadì ku emun egkeveg̵u en is langun; ne sikiyu is menge sumusundan ku, egkehedian niw zaan is menge kevuwazan te sepulù wey zezuwa he anak ni Israyil.

Lucas 22:30

Keuzemà ke edhadì a ne ebpinuu kew zuma kedì su ebpetugtug̵enè kiw is egkaan wey ed-inum. Ne ibpehadì ku sikiyu te menge kevuwazan duen te sepulù wey zezuwa he menge anak ni Israyil.”

2 Timoteo 4:8

Ne g̵untaan integ̵ana en kedì te Nengazen is suhul he iyan ibeg̵ey zin diyà te langun he memetazeng he etew. Ibeg̵ey zin heini keuzemà te andew te kedsusiya zin te nengeulaula te tivuuk he menusiyà. Iyan sikandin kes metazeng is kedsusi zin. Ne kenà iyan e zà midteg̵enahan din te suhul, kekenà, midteg̵enahan din daan is langun he utew egkeg̵alew ke ebpekelikù sikandin.

Impezayag 11:16

Ne zutun, haazà is keluwaan wey heepat he menge ebmeg̵urangen he ebpimpinuu zutun te etuvangan te Megbevayà, mibpemenlangkeb sikandan ne mid-azap dan is Megbevayà,

Impezayag 14:3

Ne haazà is menge etew, diyè dan te etuvangan te pinuuwà te Megbevayà wey te etuvangan duen te heepat he menge linimbag he kedesenan wey te menge ebmeg̵urangen. Ne migkanta zan dutun is beg̵u he kentahan. Iyan dà netau zutun he egkanta te kentahan, haazà is nenggatus wey kepatan wey heepat he libu he etew he mibelukasan dini te lumpad te kelibutan duen te nati he kerehidu.

Impezayag 19:14

Ne ebpemeninundug kandin is utew medmezakel he menge sundaru he ebpuun diyà te langit. Ebpemen-untud dan daan te meputì he menge kudà ne nengesun-uzan dan te meputì he manggad he utew lumpiyu.

Impezayag 19:4

Ne zutun nemenlangkeb haazà is keluwaan wey heepat he ebmeg̵urangen wey haazà is heepat he linimbag he kedesenan, ne mid-azap dan is Megbevayà he ebpimpinuu zutun te pinuuwè din te kedhadì. Ne ke sikandan te, “Benar! Delig̵a is Megbevayà!”

Impezayag 2:10

Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.

Impezayag 20:4

Ne zutun neehè ku is menge pinuuwà te edhadì. Ne is ebpememinuu zutun, mibeg̵ayan sikandan te keg̵ehem te kedhukum wey kebeg̵ey te kukuman. Neehè ku zaan is menge g̵imukud te menge etew he midhimetayan tenged te insangyew zan is Lalag te Megbevayà wey is impenurù ni Jesus. Wazè dan med-azap duen te langgam wey te ledawan te langgam, ne wazè dan daan mebpetiyap te tiyap te langgam diyà te vuked dan wey ke ziyè be te velad dan. Nengevanhew sikandan ne impehadì sikandan duma ki Kristu seled te nengkelibu he tuig.

Impezayag 3:18

Umba, edsembag̵an ku sikiyu he pemesaha niw zini te kediey is wag̵as he vulawan he migezaman diyà te hapuy, he ke và dà egkeg̵iya, hustu he kedtuu, ne tutuu en human he sepian kew. Ne pemasa kew zaan diyà te kediey te meputì he bisti wey maawà is kegkeeled niw tenged te kegkelevasi keniyu. Ne pemasa kew zaan te ibawì te kegkelakap niw su wey mehustu is ked-ehè niw.

Impezayag 4:10

keluwaan wey heepat he ebmeg̵urangen diyà te etuvangan din ne ed-ezapen dan is wazè din kemetayen he Megbevayà. Ne haazà is menge kuruna zan, idsavuk dan dutun te etuvangan te pinuuwà su ibeg̵ey zan diyà te Megbevayà. Ne zutun te kedsevuka zan dutun, edhabet dan egkag̵i te,

Impezayag 4:6

Ne zutun daan te etuvangan te pinuuwà neehè ku is henduen be te meluag he zag̵at he iring te ispihu su utew metingew. Ne ziyà te teliwazà, iyan, ebpekeelingkus daan dutun te pinuuwà, duen heepat he linimbag he kedesenan he neeneb te mata is menge lawa zan diyà te egkesineruwan wey egkeiniyug̵an.

Impezayag 5:11

Ne zutun mibpenlangulangu a ne nezineg ku is kegkanta te menge velinsug̵uen te Megbevayà. Utew zan mezakel su edliblibuwen. Ne zutun dan mebpemenhitindeg te nekeelingkus dutun te pinuuwà te edhadì duma sikan is menge linimbag wey menge ebmeg̵urangen.

Impezayag 5:14

Ne zutun midtavak sikan is heepat he linimbag, ke sikandan te, “Metuman heini.” Ne zutun midlangkeb en maan haazà is menge ebmeg̵urangen ne mid-azap dan.

Impezayag 5:6

Ne zutun duen neehè ku zutun te teliwazà te pinuuwà te edhadì wey te heepat he menge linimbag he kedesenan wey te menge ebmeg̵urangen. Iyan neehè ku zutun is: duen edhithitindeg he nati he kerehidu ne neehè ku zaan dutun te lawa zin is menge tulak te palì din te kedhimetayi kandin dengan. Pitu is sungey zin wey pitu zaan is mata zin he iyan is pitu he g̵ehem te Wag̵as he Mulin-ulin he edsug̵uen te Megbevayà he ibpeeneb din te tivuuk he kelibutan.

Impezayag 5:8

Ne hein nekuwa zin en haazà is belesahan, sikan is menge heepat he linimbag wey is menge keluwaan wey heepat he ebmeg̵urangen, midlangkeb dan diyà te etuvangan dutun te nati he kerehidu su ed-ezapen dan. Ne zuen arpa te uman sevaha zutun te menge ebmeg̵urangen ne zuen egewezan dan he menge lediyà he vulawan he nepenù te veyewà he edtutungen su wey zuen mehemut he evel ne iyan kehulug̵an dutun is menge ked-ampù te menge etew he g̵aked te Megbevayà.

Impezayag 6:11

Ne zutun impemeg̵ey ziyà te uman sevaha kandan is meputì he kumbalà. Ne migkeg̵iyan sikandan te Nengazen he medhimeley zan dè pa taman te egkeamin egkevunù is menge zuma zan daan he sulug̵uen te Megbevayà he edhimetayan daan iring kandan.

Impezayag 7:11

Ne zutun daan ebpemenhithitindeg is langun he menge velinsug̵uen te Megbevayà. Neelingkusan dan haazà is pinuuwà te edhadì wey te menge ebmeg̵urangen wey te heepat he linimbag. Ne heini is menge velinsug̵uen te Megbevayà, midlangkeb dan dutun te etuvangan te pinuuwà te edhadì su ed-ezapen dan is Megbevayà.

Impezayag 7:9

Ne neipus haazà ne neehè ku is utew medmezakel he menge etew he kenè en egkevilang tuus te utew mezakel. Diyè dan ebpuun te minsan hendei he g̵inhedian wey tribu wey kepuun wey minsan hengkey he kineg̵iyan. Diyè dan ebpemenhitindeg te etuvangan te pinuuwà te Megbevayà wey ziyà te etuvangan te nati he kerehidu. Midsun-uzan sikandan te meputì ne ebpemengulangkulang dan te zehunen he menge subpang.

Impezayag 9:7

Is menge terapan, henduen te menge kudà he ed-untuzan te ebpekidtebek. Ne zutun te menge ulu zan duen henduen be te menge kalù he vulawan. Ne iring te vuked te etew is buked dan.