Impezayag 3:5 - Manobo Western Bukidnon

⁵ Is minsan hentei he ebpekezaag ki Setanas, edsun-uzan sikandin te meputì ne kenè ku ebpenasen is ngazan din diyà te libru he zutun isurat is menge ngazan te ebeg̵ayan te untung he wazà pidtemanan. Ne ziyà te etuvangan te Amey ku he Megbevayà wey is menge velinsug̵uen din, ed-engkenen ku sikandin he g̵aked ku.

Impezayag 3:5 Кръстосани препратки

Mateo 10:32

Sikan is egkag̵i ziyà te menge etew he iyan a egalen din, ed-engkenen ku zaan sikandin diyà te etuvangan te Amey ku he ziyà te langit.

Lucas 10:20

Iyan, kenè niw iyan ikelipey is kebpemineg̵a keniyu te menge mezaat he mulin-ulin, kekenà, ikelipey niw is menge ngazan niw he impelista te Megbevayà diyà te langit.”

Lucas 12:8

“Utew venar is egkeg̵iyen ku,” ke si Jesus, “he sikan is etew he egkag̵i ziyà te menge etew he iyan a egalen din, ne siak is Kakey te Menusiyà, ed-engkenen ku zaan sikandin diyà te etuvangan te menge velinsug̵uen te Amey ku he Megbevayà he ziyà te langit.

Pilipus 4:3

Ne sikew zaan is timbang ku ziyan, egkesuatan ku he tevangi nu heini is menge vahi wey zan heini metuman su mibpenigudu zan te kedtavang kedì te kedsengyawa ku te Meupiya he Tudtulanen. Ne elin daan si Clemente wey zuen pa menge zuma niw he midtavang kedì. Is menge ngazan dan te langun, ne nekesurat en diyà te libru te Megbevayà he zutun inlista zin is mibeg̵ayan te untung he wazè din pidtemanan.

Hudas 1:24

Utew zekelà is kebpeselemati tew te Megbevayà. Iyan metau he edtavang kenitew su wey kenè kiw mekesuwey ziyà te kandin. Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 17:8

Heeyan is langgam he egkeehè nu, ne zini sikandin te kelibutan dengan, iyan, wazè en guntaan. Ne meg̵aan en maan edlepew he ebpuun te vitu he wazà pidtemanan is kezalem din, ne zutun te kedlepew zin, id-agbur sikandin diyà te Impirnu su edsilutan. Ne is langun he menge etew he zengan te wazè pa limbag̵a is kelibutan, wazà isurat is menge ngazan dan diyà te libru he zutun ilista is langun he ebeg̵ayan te untung, utew zan egkengeinuinu zutun te ked-ehè dan te langgam. Iyan igkengeinuinu zan su haazà is langgam, dengan uuyag ne minatey en guntaan, iyan, egkevanhew zed.

Impezayag 19:8

Ne is esawa te nati, mibeg̵ayan te ketenged te kebisti te manggad he meputì he merayag utew.” (Ne haazà is meputì he manggad, ne iyan kehulug̵an din is menge metazeng he ulaula te menge etew he g̵aked te Megbevayà.)

Impezayag 2:11

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, kenè en egkeragkes te silut he iyan is ikezuwa he kemetayen.’ ”

Impezayag 2:7

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu! Is etew he ebpekezaag ki Setanas, edtug̵utan ku he mekekaan sikandin te veg̵as te kayu he iyan puunà te untung he wazà pidtemanan he ziyà te ed-ubpaan te Megbevayà.’ ”

Impezayag 20:12

Ne neehè ku is langun he menge minatey, deisey is pid-etawan din se zekelà is pid-etawan din he ziyà ebpemenhithitindeg te etuvangan te pinuuwà te edhadì. Ne mibekar is menge libru ne mibekar zaan is libru he zutun ilista is egkengeveg̵ayan te untung. Ne mibpemekar zaan is menge zuma he menge libru he zutun isurat is mid-ulaula te menge etew hein uuyag dan pa su edhukuman sikandan tenged te mid-ulaula zan su nekesurat dutun te menge libru.

Impezayag 20:15

Is minsan hentei zutun he wazà ilista is ngazan din diyà te libru te untung, in-agbur zaan sikandin diyà te ranew he egkeregreg.

Impezayag 21:27

Iyan, wazà minsan hengkey he mezaat wey is minsan hentei he ebpenurù te tarù wey is etew he ed-azap te ledawan he ebpekeseled dutun. Iyan dà ebpekeseled dutun is menge etew he inlista is menge ngazan dan dutun te libru te nati he kerehidu he zutun idlista is ebpemeg̵ayan te untung he wazà pidtemanan.

Impezayag 22:19

Ne ke zuen minsan hentei he id-awè din kayi te ibpesavut he impezayag kediey is minsan hengkey, id-awà daan te Megbevayà is kandin he vahin dutun te veg̵as duen te kayu he ebpekeveg̵ey te untung he nekag̵i kayi. Ne id-awà daan diyà te kandin is ketenged din te ked-ubpà dutun te inged te Megbevayà he nekag̵i kayi te libru.

Impezayag 3:12

Is minsan hentei he ebpekezaag ki Setanas, edhimuwen ku sikandin he metahud su edhimuwen ku sikandin he iring te tukud diyà te valey ziyà te langit he zutun ed-ezapa is Megbevayè ku ne kenà haazà is tukud igkeawà dutun. Ne idsurat ku ziyà te kandin is ngazan te Megbevayè ku wey is ngazan te inged te Megbevayà he iyan sikan is inged he veg̵u he Hiruselim he ebpenaug he ebpuun te Megbevayà diyà te langit wey elin daan idsurat ku ziyà te kandin is beg̵u he ngazan ku.

Impezayag 3:4

Deisey kew zà diyan te Sardis is wazà mevuringi is bisti zin, he ke và dà egkeg̵iya, wazà medtampu te mezaat he ulaula. Ne ebpekezuma kew kedì he edsun-uzan te meputì su zait kew he ebpekiduma kedì.

Impezayag 6:11

Ne zutun impemeg̵ey ziyà te uman sevaha kandan is meputì he kumbalà. Ne migkeg̵iyan sikandan te Nengazen he medhimeley zan dè pa taman te egkeamin egkevunù is menge zuma zan daan he sulug̵uen te Megbevayà he edhimetayan daan iring kandan.