Impezayag 3:21 - Manobo Western Bukidnon

²¹ Is minsan hentei he ebpekezaag ki Setanas, ibeg̵ey ku kandin is ketenged te kebpinuu he zurug kedì diyà te pinuuwè ku te kedhadì iring te nekezaag a zaan ki Setanas ne mibpinuu a he zurug te Amey ku.

Impezayag 3:21 Кръстосани препратки

Mateo 19:28

Ne midtavak dutun si Jesus te, “Benar heini is egkeg̵iyen ku, siak is Kakey te Menusiyà, mekeg̵eg̵ehem a keuzemà te kedhadì ku emun egkeveg̵u en is langun; ne sikiyu is menge sumusundan ku, egkehedian niw zaan is menge kevuwazan te sepulù wey zezuwa he anak ni Israyil.

Mateo 25:21

Ne migkag̵i haazà is egalen din te, ‘Utew meupiya is baal nu! Metinumanen ka he sulug̵uen! Ne g̵eina te egkeserig̵an ka te zeisey he selapì idsarig ku kenikew is dekelà. Seled ka zini wey ka mekeambit te kelipey ku.’

Mateo 28:18

Ne mid-uvayan sikandan ni Jesus, ne ke sikandin te, “Imbeg̵ey kedì is ke g̵ehem te kebayàbayà diyà te langit wey zini te tanà.

Lucas 22:30

Keuzemà ke edhadì a ne ebpinuu kew zuma kedì su ebpetugtug̵enè kiw is egkaan wey ed-inum. Ne ibpehadì ku sikiyu te menge kevuwazan duen te sepulù wey zezuwa he menge anak ni Israyil.”

Juan 13:32

Ne emun pinaag̵i kedì egkeahà guntaan is dekelà he g̵ehem te Amey ku he Megbevayà, kenà utew egkeug̵et ne ibpeehè din daan is kediey he dekelà he g̵ehem.

Juan 16:33

Umba migkag̵i ku keniyu heini is langun su wey mebmelinawen layun is gehinawa niw tenged kediey. Dini te kelibutan ebpesipelahan kew te menge etew he kuntada ku, iyan, kenè kew mahandek su nezaag ku en sikan is egalen te menge kuntada ku!”

2 Timoteo 2:12

Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.

Impezayag 1:6

Midhimu zin he iyan kiw edhedian din wey iyan kiw memumuhat he iyan kebpemuhat tew is ked-ezapa tew te Megbevayà he Amey zin. Tehuza sikandin wey medhadì sikandin te wazà pidtemanan!

Impezayag 12:11

Heini is menge suled tew, nezaag dan en si Setanas tenged te kedtig̵is te lengesa te migeraran he impemuhat he nati he kerehidu, wey tenged te insangyew zan is tutuu he tuluuwen, wey tenged daan te wazè dan iyan menug̵uni is untung dan, kekenà, mibpehimatey zan tenged te kedtuu zan.

Impezayag 17:14

Edtebeken dan sikan is nati he kerehidu ne egkezaag sikandan dutun te nati su egalen sikandin te minsan hentei he egalen wey hadì te minsan hentei he hadì. Ne is menge etew he edumahan dutun te nati, ne migeraran sikandan te menge impetuu wey menge pinilì, wey menge metinumanen he menge sumusundan te Megbevayà.”

Impezayag 2:7

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu! Is etew he ebpekezaag ki Setanas, edtug̵utan ku he mekekaan sikandin te veg̵as te kayu he iyan puunà te untung he wazà pidtemanan he ziyà te ed-ubpaan te Megbevayà.’ ”

Impezayag 20:4

Ne zutun neehè ku is menge pinuuwà te edhadì. Ne is ebpememinuu zutun, mibeg̵ayan sikandan te keg̵ehem te kedhukum wey kebeg̵ey te kukuman. Neehè ku zaan is menge g̵imukud te menge etew he midhimetayan tenged te insangyew zan is Lalag te Megbevayà wey is impenurù ni Jesus. Wazè dan med-azap duen te langgam wey te ledawan te langgam, ne wazè dan daan mebpetiyap te tiyap te langgam diyà te vuked dan wey ke ziyè be te velad dan. Nengevanhew sikandan ne impehadì sikandan duma ki Kristu seled te nengkelibu he tuig.

Impezayag 20:6

Utew egkengelipey wey edtuvazan te Megbevayà haazà is egkengevanhew zutun te egkehuna he kegkevanhew. Kenè dan en ebpekeragkes duen te ikezuwa he kemetayen he iyan sikan is ranew he regreg. Menge memumuhat sikandan he ed-azap te Megbevayà wey ki Kristu. Ne ebpekehadì dan duma ki Kristu seled te nengkelibu he tuig.

Impezayag 5:10

Midhimu nu he iyan dan edhedian nu; ne midhimu nu zaan he menge memumuhat sikandan he iyan kebpemuhat dan is ked-ezapa zan te Megbevayà tew. Ne ibpahadì nu sikandan diyà te kelibutan.”

Impezayag 6:2

Ne zutun neehè ku ziyà te etuvangan ku is kudà he meputì he midlepew ne is ed-untud dutun, duen egewezan din he panà. Ne mibeg̵ayan sikandin te kuruna he tuus te kebpekezaag din. Ne zutun midhipanew haazà su ebpenulitu te menusiyà.

Impezayag 7:17

Su is nati he kerehidu he ziyà te teliwazà te pinuuwà te edhadì, iyan sikandin ed-elima kandan. Ibpeturedu zin kandan is ebpuunan te menge wahig he ebpekeveg̵ey te untung he wazà pidtemanan. Ne is Megbevayà, id-awè din en is keseengan kayi te menge etew,” ke sikandin.