Impezayag 2:3 - Manobo Western Bukidnon

³ Netuenan ku he ed-antus kew te mereg̵en tenged te kedtuu niw kediey ne minsan pa zutun kenè niw ed-isipen he ed-engkezan niw is kedtumana niw te menge sug̵ù ku.

Impezayag 2:3 Кръстосани препратки

Marcos 15:21

Ne ziyà te zalan duen nesinug̵ung dan he etew he tigSirini he egngezanan ki Simon, he amey ni Alejandro wey ni Rufo. Heini si Simon, diyà ebpuun te unayan ne edhendiyà te inged. Ne mibpeg̵es dan ipetiang dutun te krus he edtiangen ni Jesus.

Lucas 14:27

Ne iring din ded daan sikan is etew he egkesuat he edsundan kediey, iyan, kenà edtiang te krus din, he ke và dà egkeg̵iya, egkehandek he edtuman te menge sug̵ù ku su kela ke iyan ibpatey zin, ne kenà daan egkehimu he tutuu sikandin he sumusundan ku.

Lucas 18:1

Ne zuen en maan sempità he impezineg ni Jesus te menge sumusundan din. Ibpesavut din kandan dutun he kinahanglan he kenè dan bungasa te layun ked-ampù ne kenà daan med-engked he edsarig te Megbevayà.

Lucas 21:19

Hamen kew is edsarig kediey su pinaag̵i kayi egkeangken niw is untung he wazà pidtemanan.”

Lucas 5:5

Ne midtavak si Simon te, “Tivuuk he kezukileman is kebpenlaya zey ne wazè dey neutel he minsan sevaha, iyan, emun iyan heeyan lalag nu ne ed-uman key ebpenlaya.”

Lucas 8:15

Ne haazà is benì he ziyà mengeulug te meupiya he tanà, ne iyan egkeg̵iyen dutun is Lalag te Megbevayà he nezineg te menge etew ne midawat dan, ne midtuman dan haazà, ne mibpeniguduwan dan te edtuman taman te mibpulus te zekelà is Lalag te Megbevayà diyà te kandan.”

Juan 15:21

Iyan, ebpesipelahan kew te menge etew tenged te kedtuu niw kediey su wazè dan mekilala is Amey ku he midsug̵ù kediey.

Ruma 12:12

Kinahanglan he layun kiw edlipey su zuen utew meupiya he egkezawat tew keuzemà. Ed-entusen tew is menge kemereg̵enan ne layun kiw ed-ampù diyà te Megbevayà.

Ruma 16:12

Ipengemusta a ki Tripina wey si Tripusa he menge meg̵ied he sulug̵uen te Nengazen. Ipengemusta a zaan ki Persida he utew ku emig̵u. Utew zekelà is nehimu zin te kedtumana zin te ebpeveelan kandin te Nengazen.

Ruma 2:7

Iyan, duen menge etew he edhemenan dan is meupiya he ulaula su iyan ed-isipen dan layun is kedelig̵a wey is kedtulusa kandan keuzemà te Megbevayà wey is kegketehuza zin kandan keuzemà. Ne untung he wazè din pidtemanan is ibeg̵ey zin kandan.

Ruma 8:25

Iyan, emun wazè pa meulaula haazà is edteg̵azan ta, kinahanglan he edtigker ki is edtag̵ad.

1 Kurintu 13:7

Ebpekeantus ki te minsan hengkey he mereg̵en, ne kenè ta ed-isipen he mezaat is ulaula te zuma ta, kekenà, layun ki edsarig te keupiya te ulaula te zuma ta. Ne kenè ta ebelesan is ebpesipala kenita, kekenà, ebpesegdanan ta.

1 Kurintu 16:16

Ne tenged dutun, edhengyuen ku keniyu he pemineg̵a niw is sambag te menge etew he iring engki Istipenas wey is minsan hentei he menge zuma tew he ebpurung edtuman te ebpeveelan kandan te Nengazen tew.

2 Kurintu 10:15

Kenè dey idantal is menge vaal te zuma he etew ziyà te menge inged he zutun wazè key sug̵ua te Megbevayà. Iyan, geina te neragkes kew kayi te mibpeveelan kenami te Megbevayà, egkesuatan dey he emun ed-iseg en is kedtuu niw ne edtevangan key keniyu zutun te menge vaal zey ziyan te inged niw.

2 Kurintu 11:23

Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

2 Kurintu 4:1

Nehizuwan key te Megbevayà ne midtezù key zin wey zey metuman is ebpeveelan din kenami mehitenged te kedsengyawa te veg̵u he paag̵i ne tenged dutun kenà egkeawà is gustu zey te kedtumana kayi.

2 Kurintu 4:16

Ne tenged kayi kenà egkeawà is pulus te kedhag̵ù dey. Kada andew ne ed-iseg is kebmeg̵urang wey kebmeg̵uyà te lawa zey. Ne minsan pa zutun kada andew zaan ne ibpeiseg te Megbevayà is kedlig-eni zin te kedtuu zey.

2 Kurintu 5:9

Iyan, ke minsan hendei ki, ke zini ki te kelibutan wey ke ziyè ki ve te ed-ubpaan te Megbevayà, iyan utew ta egkesuati is kedtumana ta te egkesuatan te Megbevayà.

2 Kurintu 6:5

Mibug̵el key, mibpirisu key, mibpesipelahan key te edsinamuk. Duen timpu he utew subra is terebahu zey ne nepurang key ne nevitil key zaan.

Gelasya 6:2

Layun kew mebpetebtevangà te uman sevaha keniyu su emun ed-ul-ulahan niw heini egketuman niw is insug̵ù kenitew ni Kristu.

Gelasya 6:9

Umba kenè ki ebpepepeg̵ul te ked-ulaula te meupiya su emun ebpeniguduwan ta heini, egkeuma is timpu keuzemà he zuen idsuhul kenita te Megbevayà he utew meupiya.

Pilipus 2:16

he edtayew kandan su ibpesavut niw kandan is lalag he ebpekeveg̵ey kandan te untung he wazà pidtemanan. Ne emun iyan heini ed-ul-ulahan niw, utew ebmeupiya is g̵ehinawa ku keuzemà dutun te andew te kedlikù ni Kristu su egketuenan ku zutun he zekelà is pulus te kedhag̵ù ku ziyan te keniyu.

Pilipus 4:3

Ne sikew zaan is timbang ku ziyan, egkesuatan ku he tevangi nu heini is menge vahi wey zan heini metuman su mibpenigudu zan te kedtavang kedì te kedsengyawa ku te Meupiya he Tudtulanen. Ne elin daan si Clemente wey zuen pa menge zuma niw he midtavang kedì. Is menge ngazan dan te langun, ne nekesurat en diyà te libru te Megbevayà he zutun inlista zin is mibeg̵ayan te untung he wazè din pidtemanan.

Kulusas 1:11

Ne ibeg̵ey zin keniyu is dekelà he g̵ehem he ebpuun te zekelà he g̵ehem din, ne tenged kayi te g̵ehem layun niw egkeantus is kemereg̵enan he zekelà is kelipey niw.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

1 Tiselunika 2:9

Menge suled, kenè niw vuwa egkelipatan is kedhag̵ù dey ziyan te kebaal. Su hein impesavut dey keniyu is Meupiya he Tudtulanen he ebpuun te Megbevayà, mibpenigudu key zaan medhag̵ù te maandew se mezukilem wey key mekekuwa te keuyag̵an dey wey key kenà mekesamuk keniyu.

1 Tiselunika 5:12

Ne menge suled, sikan is edhag̵ù te ked-uwit dan keniyu, kes menge eg̵alen niw he mibpilì te Nengazen wey sikandan is ebpenurù keniyu, edhengyuan dey sikiyu he tehuza niw sikandan.

2 Tiselunika 3:13

Ne sikiyu zaan, menge suled, kenè kew meevek te ked-ulaula te meupiya.

2 Tiselunika 3:5

Berakat he ipesavut keniyu te Nengazen ke sengemenu kew zin kemahal ziyà te g̵ehinawa te Megbevayà wey himuwa zin he veg̵ayi kew ni Kristu te kelig-en wey niw maantus is kemereg̵enan.

2 Tiselunika 3:8

Wazè key mekevuyù te egkeenen dey ziyà te minsan hentei, kekenà, mibeyazan dey. Maandew wey mezukilem midhag̵ù key mebaal su wey kew kenà medlised tenged kenami.

1 Timoteo 4:10

Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

1 Timoteo 5:17

Is menge ebmeg̵urangen he meupiya is ked-uwita zan te menge tumutuu, kinahanglan he isipa niw sikandan he zait he edtekepen is suhul kandan, lavew en sikandan is dekelà is baal zan te kedwali wey kebpenurù.

Hibriyuhanen 10:36

Kinahanglan he meinentusen kew wey niw metuman is egkesuatan te Megbevayà ne human niw egkezawat is impenaad din keniyu.

Hibriyuhanen 12:1

Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Hibriyuhanen 13:13

Umba, menge suled, egawas kiw zaan te inged ne edhendiyè kiw en te kandin, he ke và dà egkeg̵iya, kenè tew en edserig̵an is kedtumana te menge tuluuwen te menge Hudiyu, kekenà, iyan dà edserig̵an tew si Jesus. Edsundanan tew sikandin ne kenè tew igkehandek is ked-entusa tew te kedsudia kenitew tenged te kedtuu tew kandin.

Hibriyuhanen 6:10

Su kenà egkehimu he kenà metazeng is kedsusiya keniyu te Megbevayà; su kenà egkehimu he egkelipatan din is langun he meupiya he mid-ulaula niw tenged te mahal sikandin diyà te g̵ehinawa niw su midtevangan niw is menge zuma tew he tumutuu ne minsan guntaan wazè niw engkezi is kedtevangi niw kandan.

Hibriyuhanen 6:12

Kinahanglan he kenè kew mebpetetapul, kekenà, iringi niw is menge etew he meinentusen he edtuu te Megbevayà su tenged kayi egkezawat dan is impenaad te Megbevayà.

Hibriyuhanen 6:15

Ne si Abraham, utew sikandin meinentusen he edsarig te Megbevayà taman te netuman te Megbevayà is penaad din kandin.

2 Pedro 1:6

Ne is kedsavut, edheg̵etan ta te edtengkaan he ed-ul-ulahan. Ne haazà daan, edheg̵etan ta te kebmeinentusen. Ne is kebmeinentusen, edheg̵etan ta te kebpevayàbayè ta te Megbevayà.

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.

Impezayag 3:10

Ne tenged te metinumanen kew te sug̵ù ku he med-antus kew, ebentayan ku sikiyu wey kew kenè en ebpekesag̵ad te limas he egkeantus te tivuuk he menusiyà he ibpenggezam kandan.