Impezayag 19:10 - Manobo Western Bukidnon

¹⁰ Ne zutun midlangkeb a ziyà te etuvangan din su ed-ezapen ku pezem, iyan, mibensag̵an e zin te, “Kenà a kenikew ezapa su siak wey sikew wey is langun he menge zuma nu he edtuu te tuluuwen he impenurù ni Jesus, neked-iiring kiw zà he menge sulug̵uen te Megbevayà. Iyan nu zà ezapa is Megbevayà!” Umba migkag̵i zin haazà su sikan is ibpekag̵i te Megbevayà dutun te menge ebpeneuven te Megbevayà, ne iyan sikan is tuluuwen he impenurù ni Jesus.

Impezayag 19:10 Кръстосани препратки

Mateo 4:10

Ne mibensag̵an ni Jesus te, “Setanas, ewai a kenikew! Duen insurat he Lalag te Megbevayà he edhenduen te, ‘Iyan niw zà ezapa is Nengazen he Megbevayè niw. Ne is duma pa he ngazan he megbevayà, kenè niw tumana is sug̵ù din.’ ”

Marcos 5:22

Ne zutun nekeuma zaan is etew he egngezanan ki Hayru. Pengulu si Hayru te sevaha he simbahan te menge Hudiyu. Ne hein neehè din si Jesus ne mid-uvey sikandin diyà te kandin ne midluhud diyà te etuvangan din.

Marcos 7:25

Ne zuen dutun sevaha he vahi he zuen din anak he rag̵arag̵a he edlelungen te mezaat he mulin-ulin. Ne hein nezineg din he nekeuma si Jesus ne midhendutun ne midluhud diyà te etuvangan din.

Lucas 1:19

Ne midtavak haazà is belinsug̵uen te Megbevayà te, “Iyan a si Gabriel, sikan is sulug̵uen te Megbevayà he layun diyà te etuvangan din. Midsug̵ù e zin dini te kenikew wey ku ikepesavut heini is tudtul te utew meupiya he egkeulaula.

Lucas 24:44

Ne zutun migkag̵i si Jesus diyà te kandan te, “Iyan heini sikan is migkag̵i ku keniyu hein kemulu e pa zuma niw. Is langun mehitenged kedì he impesurat dengan te Megbevayà ki Moises, wey kes langun he impesurat din te zuma pa he ebpemeneuven din, wey minsan kes insurat dengan duen te libru te menge Salmo, ne kinahanglan he egketuman pinaag̵i te neulaula zini te kedì.”

Juan 5:39

Ed-istudiyuwan niw is ingkesurat he lalag din su kunaan niw ke tenged dutun ebpekeangken kew te untung he wazà pidtemanan. Edtistig̵usan a te insurat he Lalag te Megbevayà,

Nengeulaula 10:43

Netagnà si Jesu Kristu te langun he ebpemeneuven dengan te Megbevayà ne migkag̵i zan he pinaag̵i te g̵ehem te ngazan din, is langun he edsarig kandin, ebpeseyluwen din sikandan te menge mezaat he ulaula zan.”

Nengeulaula 13:27

Is menge Hudiyu he menge meg̵inged diyà te Hiruselim wey is menge egalen dan, wazè dan mesavut he iyan si Jesus sikan is edlibri kenitew. Ne wazè dan daan mesavut is insurat he tagnà te ebpemeneuven dengan te Megbevayà. Minsan ke egkezineg dan is kebesaha kayi kada Sebadu ziyà te menge simbahan dan, nengetuman dan gihapun kes nengetagnà pinaag̵i te kegkag̵i zan he zait si Jesus he edhimetayan.

2 Kurintu 8:7

Netuenan ku he wazà kurang niw te langun he menge ketau wey ulaula he meupiya. Dekelà is kedtuu niw; metau kew he ebpenurù; nesavut niw is tutuu he tuluuwen; ebpetebtevangè kew layun; ne zekelà is gag̵ew niw kenami. Tenged kayi egkesuatan dey he wazè niw zaan kurang kayi te kebpaahaa niw te g̵ag̵ew niw ziyà te menge tumutuu he tigHudiya.

Ipisu 5:15

Umba, menge suled, pekeventayi niw is menge ulaula niw su wey kew mehimu he menge metau, ne kenà menge paglung.

Ipisu 5:33

Iyan, kenà duen dà taman su egkehimu zaan he elin egkeg̵iyen din is teleesawa. Kinahanglan he mahala te maama is esawa zin ne kinahanglan daan he tehuza te vahi is kandin he esawa.

Pilipus 3:3

Iyan kiw kes tutuu he menge sakup te Megbevayà, ne kenà iyan sikandan, su pinaag̵i te Wag̵as he Mulin-ulin ed-azap kiw te Megbevayà ne edlipey kiw tenged te upakat tew ki Jesu Kristu. Ne kenè tew iyan edserig̵an is kelibutanen he ulaula iring te kebpesirkunsidar.

1 Tiselunika 5:15

Kenè niw itug̵ut he zuen minsan hentei keniyu he ebales te mezaat, kekenà, mebpepurpurungè kew layun. Purungi niw zaan is minsan hentei he etew.

Hibriyuhanen 1:14

Iyan, is menge velinsug̵uen te Megbevayà, menge sulug̵uen dà sikandan te Megbevayà. Kenè tew egkeahà, iyan, edsug̵uen din sikandan wey kiw zan metevangi is menge etew he edtulusen keuzemà.

Hibriyuhanen 12:25

Umba, purung kew pemineg te Lalag te Megbevayà ne kenè kew sukul. Su is menge etew zengan he wazè dan pemineg̵a is Lalag te Megbevayà he insug̵ù kandan ni Moises dini te kelibutan, emun wazà sikandan mekelikey te silut te Megbevayà, iyan kew pe be mekelikey te silut emun kenè niw ebpemineg̵en is egkeg̵iyen din te ebpuun te langit.

1 Juan 5:10

Is minsan hentei he edtuu he Anak te Megbevayà si Jesus, nevenaran sikandin te kebpenistig̵us te Megbevayà. Is minsan hentei he kenà edtuu te kebpenistig̵us te Megbevayà, ed-isipen din he teruen is Megbevayà su wazè din tuuwi is kebpenistig̵us te Megbevayà mehitenged te Anak din he si Jesus.

1 Juan 5:21

Menge anak ku, likayi niw is ked-ezapa te minsan hengkey he kenà iyan is tutuu he Megbevayà.

Impezayag 1:1

Iyan heini kedtudtula te impezayag ni Jesu Kristu. Insarig heini kandin te Megbevayà wey zin daan ikepesavut diyà te menge sulug̵uen te Megbevayà ke hengkey is meg̵aan en he egkengeulaula. Impesavut heini ni Kristu pinaag̵i te kedsug̵ua zin te velinsug̵uen din diyà te kediey te sulug̵uen din he si Juan.

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.

Impezayag 12:11

Heini is menge suled tew, nezaag dan en si Setanas tenged te kedtig̵is te lengesa te migeraran he impemuhat he nati he kerehidu, wey tenged te insangyew zan is tutuu he tuluuwen, wey tenged daan te wazè dan iyan menug̵uni is untung dan, kekenà, mibpehimatey zan tenged te kedtuu zan.

Impezayag 12:17

Ne zutun utew nepeuki te deragun haazà is bahi, ne mibeyaan din is menge zuma he anak dutun te vahi su edtebeken din sikandan. Iyan sikandan is langun he metinumanen te menge sug̵ù te Megbevayà wey metinumanen daan te tutuu he tuluuwen he impenurù ni Jesus.

Impezayag 14:7

Ne mibpekezag̵ing is egkag̵i te, “Tehuza niw is Megbevayà wey ventug̵a sikandin su neuma en is timpu te kedsusi zin te menge ulaula te tivuuk he menusiyà! Ezapa niw is Megbevayà he iyan nenlimbag te langit wey tanà wey zag̵at wey menge puunà te wahig!”

Impezayag 15:4

Ne edtehuzen ka te langun he menge etew ne ebentug̵en dan is ngazan nu te Nengazen. Su iyan ke zà wag̵as he Megbevayà. Edhendiyà te kenikew is langun he menge etew te minsan hendei he g̵inhedian ne ed-ezapen ke zan su nevantug en is menge vaal nu he memetazeng.”

Impezayag 19:9

Ne migkeg̵iyan a zutun te velinsug̵uen, ke sikandin te, “Isurat nu heini: Utew zeyzey is langun he ibpemetelavuk dutun te eseweey te nati he kerehidu.” Ne impelaus din haazà is lalag din te, “Iyan heini tutuu he menge Lalag te Megbevayà!”

Impezayag 4:10

keluwaan wey heepat he ebmeg̵urangen diyà te etuvangan din ne ed-ezapen dan is wazè din kemetayen he Megbevayà. Ne haazà is menge kuruna zan, idsavuk dan dutun te etuvangan te pinuuwà su ibeg̵ey zan diyà te Megbevayà. Ne zutun te kedsevuka zan dutun, edhabet dan egkag̵i te,