Impezayag 17:18 - Manobo Western Bukidnon

¹⁸ Ne haazà is bahi he egkeehè nu, ne iyan kehulug̵an din sikan is nevantug he inged he edlingahaan te menge hadì diyà te lumpad te kelibutan.”

Impezayag 17:18 Кръстосани препратки

Lucas 2:1

Ne hein iyan pa si Augusto hadì diyà te inged he Ruma, mibaal sikandin te velaud he mebpesinsus is langun he menge etew te seled te menge g̵inhedian he sakup din.

Impezayag 11:8

Ne ziyà ibperey-as haazà is lawa zan te kersada ziyà te zekelà he inged he zutun iransang te krus is Nengazen dan. Ne zuen insempità he menge ngazan dutun te inged, ne iyan is Suduma wey Ihiptu.

Impezayag 12:4

Ne pinaag̵i te ikug din neg̵uyud din is iketelu he vahin te menge vituen diyà te langit ne nemeketimbag haazà diyà te tanà. Ne zutun edhithitindeg haazà is uled te etuvangan dutun te vahi he ed-anak su emun idlusad en haazà is id-anak din, ne egkeenen dutun te uled.

Impezayag 16:19

Ne kes dekelà he inged he Bebilunya, neg̵evà te tetelu he vahin ne nengerundus is langun he menge inged diyà te minsan hendei he g̵inhedian. Ne wazà dutun melipati te Megbevayà is inged he Bebilunya he impeinum din te menge meg̵inged dutun is binu he ziyà te tasa zin, he ke và dà egkeg̵iya, impeg̵ezaman din kandan is utew mekelimlimezang he pauk din.

Impezayag 18:2

Ne mibpekezag̵ing is egkag̵i te, “Neg̵erè en. Nepurung mezeeti is dekelà he inged he Bebilunya! Ne nehimu en guntaan he ubpeey te menge mezaat he mulin-ulin wey menge mezaat he kedesenan. Egkeubpaan haazà is inged te minsan hengkey he mezaat wey meremerik he tagbis.