Impezayag 13:6 - Manobo Western Bukidnon

⁶ Ne ebpengeg̵iyen din is menge lalag he utew memezaat he idsumpalit din te Megbevayà wey ebpekesupak te ed-ubpaan te Megbevayà diyà te langit wey ebpekesupak daan te menge meg̵inged diyà te langit.

Impezayag 13:6 Кръстосани препратки

Mateo 12:34

Iring din ded daan kayi te keniyu. Wazà meupiya he egkekag̵i niw su memezaat is ulaula niw. Iring kew te menge uled su ebpekekaid kew! Is diyà te g̵ehinawa te etew, iyan edlepew ziyà te vèbè din.

Mateo 15:19

Su ziyà te g̵ehinawa te etew ebpuun is menge meezaat he isip he utew igkeepes te Megbevayà iring te kebunù, kedhilavet te kenè din esawa, meremerik he ulaula, kebpenakew, kedtarùtarù diyà te hukmanan, wey is kebpenudtul zin te tarù wey mezeeti is dengeg te sengeeetew.

Juan 1:14

Ne sikan is nekag̵i he Lalag te Megbevayà, nehimu he menusiyà ne mid-amur kenitew. Utew sikandin belig̵eg̵awen wey utew tutuu is menge lalag din. Neehè dey is utew zin kebpekelavew he iyan is kebpekelavew te vudtung he Anak te Megbevayà. Ne haazà is kebpekelavew zin, imbeg̵ey kandin te Amey zin he Megbevayà.

Ruma 3:13

Utew ebpekezezaat is kebpemèbè dan iring te nemahù diyà te leveng he wazà bumbuni. Teruen dan ne is egkeg̵iyen dan, ne iring te hereg te uled su utew ibmesakit te g̵ehinawa te menge zuma zan.

Kulusas 1:19

Ne egkesuatan te Amey tew he Megbevayà he ke hengkey sikandin, iyan ded daan sikan is Anak din.

Kulusas 2:9

Umba egkeg̵iyen ku heini su si Kristu, nehimu sikandin he etew. Duen din lawa, iyan, minsan pa kayi is minsan hengkey he ziyà te Megbevayà ne ziyà te kandin.

Hibriyuhanen 9:2

Impehitindeg dan is simbahan he valey he terapal ne zezuwa is rug̵u zutun. Is sevaha, ne iyan kes egngezanan te mahal he rug̵u. Ne zutun dan isavuk is sulù, wey is lemisahan he zutun isavuk is supas he ibpemuhat diyà te Megbevayà.

Hibriyuhanen 9:24

Dutun te kebpemuhat ni Kristu, wazè sikandin medseled diyà te utew mahal he rug̵u te simbahan he zini te kelibutan su alung dà heini te tutuu he simbahan he ziyà te langit. Iyan midselezan din kes tutuu he simbahan he ziyà te langit ne g̵untaan iyan sikandin datù tew he edtavang kenitew ziyà te etuvangan te Megbevayà.

Impezayag 11:12

Ne zutun nezineg dutun te zezuwa he menwewali is mezag̵ing he egkag̵i ziyà te langit he edhenduen te, “Hendini kew en te langit.” Ne zutun mibatun sikandan pehendiyà te langit he nevukusan sikandan te g̵apun. Ne nengeahà haazà te menge kuntada zan dutun.

Impezayag 12:12

Sikiyu is menge meg̵inged diyà te langit, medlipey kew. Iyan, sikiyu is diyan te tanà wey ziyan te zag̵at, kehizu niw! Su kes mezaat he mulin-ulin he si Setanas, mibpenaug en diyan te keniyu. Ne utew sikandin nererengiti su netuenan din he mevavè dà utew is nesamè din he timpu te kedlalunglalung.”

Impezayag 15:5

Ne neipus haazà, neehè ku he nepuwasan is simbahan diyà te langit ne ziyà te seled din, neehè ku is rug̵u he zutun is tuus te g̵ehem te Megbevayà.

Impezayag 18:20

Ne sikiyu is menge meg̵inged diyà te langit, lipey kew tenged te limas kayi te zekelà he inged. Lipey kew zaan is menge tumutuu wey menge epustul wey ebpeneuven te Megbevayà su midsilutan te Megbevayà haazà is inged tenged te menge pesipala zin keniyu!

Impezayag 21:3

Ne nezineg ku is egkag̵i he utew mezag̵ing diyà te pinuuwà te edhadì, ne ke sikandin te, “Mid-amur en human is Megbevayà diyà te menusiyà. Ed-amur sikandin kandan ne egkehimu sikandan he menge gin-etawan din. Iyan sikandin duma zan wey ed-ezapen dan he Megbevayà.

Impezayag 4:1

Ne zutun selakew en maan is impaahà kediey te Nengazen. Neehè ku is gemawan diyà te langit he nepuwasan. Ne zuen dutun egkag̵i ziyà te kediey ne haazà is egkag̵i ne iyan ded sikan is nezineg ku hein aney he henduen is kezag̵ing din te vudyung he edag̵ing. Ne ke sikandin te, “Hendini ka te zivavew ne ibpeehè ku kenikew is kinahanglan he egkeulaula keuzemà.”

Impezayag 4:4

Ne zuen daan dutun keluwaan wey heepat he pinuuwà he nekeelingkus dutun te pinuuwà te edhadì. Ne zutun ebpememinuu is keluwaan wey heepat he ebmeg̵urangen. Meputì is bisti zan ne zuen insuup diyà te ulu zan he menge kuruna he vulawan.

Impezayag 5:13

Ne zutun nezineg ku is kegkanta te langun he menge linimbag he ziyà te langit, dini te tanà wey ziyà daan te zizalem te tanà wey ziyà te zag̵at. Ne migkanta is langun he linimbag he ziyà te minsan hendei. Ke sikandan te, “Is ebpimpinuu ziyà te pinuuwà te edhadì wey is nati he kerehidu, delig̵a sikandan, tehuza sikandan, wey ventug̵a sikandan te wazà pidtemanan su iyan dan mekeg̵eg̵ehem!”

Impezayag 7:15

Umba, diyè dan edhitindeg te etuvangan te pinuuwà te Megbevayà. Andew wey mezukilem ne ziyè dan te simbahan te Megbevayà ne edtumanen dan dutun is egkesuatan din. Ne is Megbevayà he ziyà ebpimpinuu te pinuuwè din te kedhadì, iyan edlingahaan dan.

Impezayag 7:9

Ne neipus haazà ne neehè ku is utew medmezakel he menge etew he kenè en egkevilang tuus te utew mezakel. Diyè dan ebpuun te minsan hendei he g̵inhedian wey tribu wey kepuun wey minsan hengkey he kineg̵iyan. Diyè dan ebpemenhitindeg te etuvangan te pinuuwà te Megbevayà wey ziyà te etuvangan te nati he kerehidu. Midsun-uzan sikandan te meputì ne ebpemengulangkulang dan te zehunen he menge subpang.