Impezayag 13:14 - Manobo Western Bukidnon

¹⁴ Ne pinaag̵i te menge egkein-inuwan he intug̵ut kandin he ibpeulaula ziyà te etuvangan dutun te nehuna he langgam, ed-ekalan din is tivuuk he menusiyà dini te kelibutan. Ne zutun edsug̵uen din is menge etew he veeli zan is ledawan dutun te nehuna he langgam ne ezapa zan. Haazà is nehuna he langgam, midtibas duen te sundang, iyan, wazà mebpatey.

Impezayag 13:14 Кръстосани препратки

2 Tiselunika 2:4

Edsukulan din wey edlevawan din pezem is minsan hengkey he mid-isip te menge etew he megbevayà wey is minsan hengkey he ed-ezapen dan. Ne ebpinuu sikandin minsan diyà te simbahan he Valey te Megbevayà su egkeg̵iyen din he iyan sikandin Megbevayà.

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

Impezayag 13:1

Ne zutun neehè ku is mekehandekhandek he langgam he egaun puun diyà te zag̵at. Sepulù is sungey zin wey pitu is ulu zin. Ne zuen kuruna he insuup diyà te kada sevaha he menge sungey zin, ne ziyà te kada ulu zin ne zuen insurat he ngazan he idsupak din te Megbevayà.

Impezayag 13:15

Ne intug̵ut daan he mehimu zutun te ikezuwa he langgam he mekeg̵eg̵ehinawa haazà is ledawan dutun te nehuna he langgam ne tenged dutun ebpekekag̵i haazà is ledawan ne egkepatey zin daan is minsan hentei he kenà ed-azap kandin.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 14:11

Ne haazà is hapuy he idrasey kandan, ed-evel te wazà pidtemanan ne te maandew wey mezukilem kenà egkeengked is kedresaya kandan su ed-ezapen dan kes langgam wey kes ledawan duen te langgam ne ebpemarka sikandan te tuus duen te ngazan te langgam.”

Impezayag 14:9

Ne midlepew is iketelu he velinsug̵uen he midsunud dutun te nehuna he zezuwa ne mibpekezag̵ing is egkag̵i te, “Is minsan hentei he etew he ed-ezapen din haazà is langgam wey ledawan duen te langgam, ne ebpemarka sikandin diyà te vuked din, ne emun kenà, ne ziyà te velad din,

Impezayag 15:2

Ne neehè ku zutun is henduen be te zag̵at he ispihu he nesahug te hapuy. Ne neehè ku zaan is menge etew he nemekezaag te mekehandekhandek he langgam su wazè dan sikandin ezapa. Wazè dan med-azap dutun te ledawan din ne wazè dan daan mebpemarka te lumiru te ngazan din. Dutun dan ebpemenhithitindeg te uvey te zag̵at he ispihu. Ne zuen egewezan dan he menge arpa he imbeg̵ey kandan te Megbevayà.

Impezayag 16:13

Ne neehè ku zutun is tetelu he menge utew memekehandekhandek he mezaat he mulin-ulin he henduen be te vakbak. Midlepew is sevaha he ebpuun duen te vèbà te zekelà he deragun he iyan si Setanas, ne is sevaha, diyà medlepew puun te vèbà duen te langgam, wey is sevaha zuen medlepew te vèbà te ebpeneuven ni Setanas.

Impezayag 16:2

Ne haazà is egkehuna he velinsug̵uen, mid-ulaan din dini te kelibutan is lediyà he ziyà te kandin. Ne zutun, is menge etew he mibpemarka te tuus duen te langgam wey mid-azap dan haazà is ledawan dutun te langgam, midtuvuan sikandan te menge memahù wey utew memesakit he menge vekukang.

Impezayag 18:23

Ne kenè en maan egketeyawan heini is inged te minsan hengkey he sulù. Ne is kegkag̵ikag̵i te vahi wey maama he sikan pa meked-esawa, ne kenè en maan egkezineg kayi te inged. Utew nengevantug diyà te tivuuk he kelibutan is menge ebpemetig̵ayun kayi ne mid-ekalan is menge etew ziyà te langun he menge g̵inhedian pinaag̵i te kinaagman te menge veyilan dutun.”

Impezayag 19:20

Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.

Impezayag 2:10

Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.

Impezayag 20:10

Ne zutun, is mid-akal kandan he si Setanas, intimbag sikandin diyà te ranew he egkeregreg te esupri he zutun itimbag sikan is langgam wey kes ebpeneuven ni Setanas ne zutun edresayen sikandan te maandew wey mezukilem te wazà pidtemanan.

Impezayag 3:10

Ne tenged te metinumanen kew te sug̵ù ku he med-antus kew, ebentayan ku sikiyu wey kew kenè en ebpekesag̵ad te limas he egkeantus te tivuuk he menusiyà he ibpenggezam kandan.