Impezayag 11:17 - Manobo Western Bukidnon

¹⁷ ne ke sikandan te, “Sikew is Megbevayè dey wey Nengazen dey, iyan ka ebayàbayà te langun. Megbevayè ka zengan wey g̵untaan. Ebpeselematan dey sikew su migamit nu is dekelà he g̵ehem nu ne g̵untaan mibpuunan nu en is kedhadì nu ziyà te kelibutan.

Impezayag 11:17 Кръстосани препратки

Mateo 11:25

Ne zutun mid-ampù si Jesus he egkag̵i te, “Amey ku he Nengazen te langit wey tanà, dekelà is kebpeselemati ku kenikew su is in-eles nu wey kenà mesavut te menge uluwanen wey uvag en memetau, impesavut nu en diyà te menge etew he wazè dan menge hanew.

Lucas 10:21

Ne zutun midlipey si Jesus te Wag̵as he Mulin-ulin ne mid-ampù diyà te Megbevayà, ke sikandin te, “Amey ku he Nengazen te langit wey tanà, dekelà is kebpeselemati ku kenikew su is in-eles nu su wey kenà mesavut te menge uluwanen wey uvag en memetau ne impesavut nu en diyà te menge etew he wazè dan menge hanew. Amey ku, umba ebpeselematan ku su midhimu nu heini te iring kayi su iyan egkesuatan nu tenged te g̵ag̵ew nu.”

Juan 11:41

Ne in-awè dan dutun haazà is batu he inlekeb te surung. Ne midlingahà si Jesus diyà te langit ne migkag̵i te, “Amey ku, ebpeselamat a kenikew su ebpemineg̵en nu is ebuyuen ku.

2 Kurintu 2:14

Ne minsan pa zutun utew zekelà is kebpeselemati ku te Megbevayà su tenged te kebpekidsevaha tew ki Kristu, iring kiw te menge vihag ni Kristu he ibpeehè din diyà te minsan hentei. Ne pinaag̵i kenitew ibpesavut din diyà te menge etew ke hentei sikandin diyà te minsan hendei.

2 Kurintu 9:15

Ne tenged kayi ebpeselematan ta is Megbevayà tenged te kebeg̵aya zin kenita te Anak din he wazà minsan hengkey he ebpekerepeng te kemahal zin.

1 Timoteo 1:12

Ebpeselematan ku is Nengazen tew he si Jesu Kristu su mibeg̵ayan e zin te zesen wey ku metuman heini is ebpeveelan din kedì. Mid-isip e zin he metinumanen ne tenged kayi intezù e zin he sulug̵uen din.

Impezayag 1:4

Siak si Juan, ne ebpesuratan ku is pitu he gurupu te menge tumutuu he ziyà te prubinsya he Asya. Ibpengumew-umew ku he ikeg̵ag̵ew kew te Megbevayà, wey te Wag̵as he Mulin-ulin, wey ni Jesu Kristu, ne iveg̵ey zan daan keniyu is melinawen he kebpekesavuk. Is Megbevayà, daan en sikandin te wazè pa limbag̵a is minsan hengkey; kemulu pa sikandin guntaan wey kenà sikandin egkehanew te wazà pidtemanan. Is Wag̵as he Mulin-ulin he ziyà ed-ubpà te etuvangan te pinuuwà te Megbevayà, ne pitu is gehem din. Si Jesu Kristu, iyan egkeserig̵an is lalag din. Iyan sikandin kes nehuna he zuen din beg̵u en he untung pinaag̵i te kegkevenhawa kandin. Iyan sikandin ebayàbayà te menge hadì dini te kelibutan. Dekelà is gehinawa zin kenitew. Midlibri kiw zin te silut te menge salè tew pinaag̵i te kebpaag̵as din te lengesa zin.

Impezayag 1:8

Is Nengazen tew he Megbevayà he mekeg̵eg̵ehem he zaan en te wazè pa limbag̵a is minsan hengkey, iyan ded sikandin guntaan wey minsan keuzemà te wazà pidtemanan. Ke sikandin te, “Iyan a sikan is alpa wey umiga, he ke và dà egkeg̵iya, kes puunà wey egkepengkusan te minsan hengkey.”

Impezayag 11:15

Ne zutun midhiyup te ikepitu he velinsug̵uen is budyung din ne ziyà te langit nezineg is memezag̵ing he lag̵eng he edhenduen te, “Is kedhedii te tivuuk he menusiyà, ne ziyè en guntaan te Nengazen tew wey ziyà te hadì he mibpilì din. Ne heini he hadì, ebpekehadì sikandin te wazà pidtemanan.”

Impezayag 15:3

Ne egkentahan dan is kentahan duen te sulug̵uen te Megbevayà he si Moises he iyan sikan is kentahan he idalig dutun te nati he kerehidu. Ke sikandan te, “Sikew is Megbevayà, mekeg̵eg̵ehem ka he Nengazen te langun. Utew zekelà wey utew egkein-inuwi is langun he menge vaal nu! Hadì ka te langun he menge g̵inhedian. Metazeng wey tutuu is menge ulaula nu!

Impezayag 16:14

Menge mezaat he mulin-ulin haazà he zuen dan gehem te kebaal te egkengein-inuwan. Midsug̵ù sikandan su ibpetig̵um kandan is menge sundaru te langun he menge hadì dini te kelibutan su zutun te egkevantug he andew te kedsilut, egkengezaag sikandan te Megbevayà he Nengazen te langun.

Impezayag 16:5

Ne nezineg ku zutun is belinsug̵uen he impevantey te menge wahig, ke sikandin te, “Sikew is wag̵as he Megbevayà he zengan wey g̵untaan, metazeng heini is kedsiluti nu te menusiyà

Impezayag 16:7

Ne zutun nezineg ku is egkag̵i ziyà te pemuhatà he edhenduen te, “Sikew is mekeg̵eg̵ehem he Megbevayà he Nengazen te langun, benar iyan he metazeng wey hustu is kedsiluti nu te menusiyà!”

Impezayag 18:8

Ne tenged te iyan haazà neisip din, ne zutun te sengeandew, egkeumahan sikandin te kemeresayan. Su edsilutan sikandin te zaru, vitil, wey kemetayen; ne egkepurung sikandin egketutung su is Megbevayà he mekeg̵eg̵ehem he Nengazen te langun, iyan edsilut kandin.”

Impezayag 19:11

Ne zutun neehè ku is langit he nepuwasan ne zuen dutun kudà he meputì ne egkeserig̵an wey metinumanen is ed-untud dutun. Metazeng is kedhukum din ne metazeng daan is kebpekidtebek din te menge kuntada zin.

Impezayag 19:6

Ne nezineg ku is kegkag̵i zutun te utew medmezakel he menge etew he iring te zeg̵urus te utew zekelà he evag̵a wey henduen daan te egkengelilid he rug̵ung. Ke sikandan te, “Delig̵a is Megbevayà su is Megbevayè tew he mekeg̵eg̵ehem he Nengazen, ne iyan sikandin edhadì!