Impezayag 1:18 - Manobo Western Bukidnon

¹⁸ Iyan a kes Megbevayà he wazè din kemetayen. Mibpehimatey a ne g̵untaan kenà ad maan ebpatey te minsan keenu. Iyan a ebayàbayà te menge minatey, ne zuen ku zaan keg̵ehem diyà te Iveyaan.

Impezayag 1:18 Кръстосани препратки

Mateo 11:23

Ne sikiyu zaan,” ke si Jesus, “is menge tigKepirnaum, iyan egkesuatan niw pezem is delig̵a kew te minsan hentei, iyan, igketimbag kew ziyà te Impirnu. Su is egkengein-inuwan he impeehè ku ziyan te inged niw, angin ke ingkepaahà dengan diyà te menge tigSuduma su kenà egkezezeetan te Megbevayà is inged dan, ne kemulu pa pezem guntaan.

Mateo 16:19

Ne idsarig ku kenikew is kebayàbayà emun edhadì is Megbevayà he ziyà te langit. Ne kinahanglan he is idawey nu zini te kelibutan, indawey en he zaan te Megbevayà he ziyà te langit; ne is idtug̵ut nu zini te tanà, intug̵ut en he zaan te Megbevayà he ziyà te langit.”

Lucas 24:5

Ne haazà is menge vahi, ne midluhud dan is edungul su utew zan nengehandek. Ne migkag̵i kandan haazà is menge maama te, “Maan is kayi niw ebpen-ahaa te edlevengan te minatey is etew he uuyag?

Juan 11:25

Ne migkag̵i si Jesus te, “Iyan a sikan is ebpemanhew; iyan a kes ebeg̵ey te untung. Ke zuen etew he edtuu kedì, minsan ke ebpatey, uuyag gihapun is gimukud din.

Juan 14:19

Kenè en egketegteg̵aad ne kenà ad maan egkeahà te menge kuntada ku he etew zini te kelibutan, iyan, sikiyu mulà, egkeehè e pa egkeuman keniyu. Kenà egkeawà is untung ku te minsan keenu, umba zuen niw en daan untung he kenà egkeawà te minsan keenu.

Ruma 6:9

Netuenan tew he g̵eina te nevanhew en si Kristu ne kenè en egkehimu he ebpatey pa maan sikandin su wazè en gehem te kemetayen diyà te kandin.

2 Kurintu 13:4

Su minsan ke henduen be te wazà egkehimu ni Kristu zutun te kedrensanga kandin diyà te krus, nevanhew zed sikandin ne zuen din en beg̵u en he untung pinaag̵i te g̵ehem te Megbevayà. Ne sikami zaan, henduen be te wazè dey egkehimu su layun key zaan ebpekeantus te kemeresayan, iyan, pinaag̵i te g̵ehem te Megbevayà he edtavang kenami, duen dey zaan beg̵u en he untung ne ebpeketavang key pa keniyu.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Kulusas 3:3

Umba egkeg̵iyen ku heini su sikita is tumutuu, minatey ki en duma ki Kristu ne is tutuu he untung ta pinaag̵i kandin, wazè pa heini ipezayag te Megbevayà.

Hibriyuhanen 1:3

Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.

Hibriyuhanen 12:2

Edhemenan ta is kedsarig ta ki Jesus su iyan sikandin puunà te kedtuu ta ne pinaag̵i zaan kandin egkeheg̵et is kedtuu ta. Mid-antus din is kedrensanga kandin dutun te krus. Ne wazè din ikeeled haazà is kedhimetayi kandin, kekenà, mid-isip din he utew zin igkelipey is egkeulaula zin emun egkeipus haazà is ked-antus din. Ne g̵untaan mibpinuu en sikandin dutun te utew lavew he pinuuwà su ziyà te zapit te egkekewanan te Megbevayà.

Hibriyuhanen 7:16

Ne wazà heini is beg̵u himuwa he kelibutanen he memumuhat pinaag̵i te menge kelibutanen he kesug̵uan, kekenà, midhimu sikandin he memumuhat tenged te mekeg̵eg̵ehem sikandin su wazè din kemetayen.

Hibriyuhanen 7:25

Ne tenged kayi, egkehimu te minsan keenu he timpu he edlibriyen din te silut is minsan hentei he menge etew emun pinaag̵i kandin ed-aput sikandan diyà te Megbevayà su wazà pidtemanan te untung din, ne layun din egkehimu te edtavang sikandan diyà te etuvangan te Megbevayà.

Impezayag 10:6

Ne impepirmahan din is egkeg̵iyen din te wazà kemetayen he Megbevayà he nenlimbag te langit wey tanà wey zag̵at wey nenlimbag daan te langun he tag̵ù kayi. Ke sikandin te, “Kenè en heini ebpekesendud!

Impezayag 15:7

Ne is sevaha zutun te heepat he linimbag he kedesenan, imbeg̵ey zin dutun te pitu he velinsug̵uen is pitu he menge vulawan he lediyà he nepenù te pauk te wazè din pidtemanan he Megbevayà.

Impezayag 2:8

Ne ke sikandin maan te, “Pesurati nu is belinsug̵uen te Megbevayà he ebantey te menge tumutuu ziyà te inged he Ismirna, ke sikew te, ‘Iyan heini menge lalag ku te puunà te langun ne egkepengkusan daan te langun. Minatey a ne nevanhew.

Impezayag 20:13

Nekelepew is menge minatey he ziyà ebpuun te zag̵at wey ziyà te tanà he ziyà is menge g̵imukud dan te Iveyaan. Ne midhukuman sikandan langun tenged te mid-ulaula zan.

Impezayag 20:14

Ne zutun, is langun he ebpuun te ed-ubpaan te menge minatey, in-agbur is lawa zan wey g̵imukud dan diyà te ranew he egkeregreg. (Ne haazà is ranew ne iyan kes ikezuwa he kemetayan.)

Impezayag 3:7

Ne ke sikandin en maan te, “Pesurati nu is belinsug̵uen te Megbevayà he ebantey te menge tumutuu ziyan te inged he Piledilpya. Ne ke sikew te, ‘Siak si Jesus is egkag̵i; iyan a sikan is egkeserig̵an he mibpilì te Megbevayà. Imbeg̵ey kedì is keg̵ehem te kedhadì te g̵inhedian ku iring te kedhadì dengan ni Hadì David. Ne emun duen ebpuwasan ku wey mekeseled dutun te g̵inhedian ku, kenè en egkelekevan te minsan hentei. Ne emun duen etew he edlekevan ku, kenè en daan egkepuwasan te minsan hentei.

Impezayag 4:9

Ne haazà is heepat he linimbag, emun ebentug̵en dan wey edtehuzen dan wey ebpeselematan dan is wazà pidtemanan he Megbevayà he ebpimpinuu zutun te pinuuwà te edhadì, edlangkeb sikan is

Impezayag 5:14

Ne zutun midtavak sikan is heepat he linimbag, ke sikandan te, “Metuman heini.” Ne zutun midlangkeb en maan haazà is menge ebmeg̵urangen ne mid-azap dan.

Impezayag 6:8

Ne mid-ehè ku ne midlepew zutun is kudà he meputìputì is kekelawag din. Si Kemetayen is ngazan te ed-untud dutun ne si Impirnu is ngazan dutun te edtinundug kandin. Ne imbeg̵ey kandan te zezuwa is kebayàbayà dutun te ikeepat he vahin te tivuuk he menusiyà wey zan mehimetayi pinaag̵i te gira wey vitil wey ebpenhalin he zaru wey ebpemekekaid he menge langgam.

Impezayag 9:1

Ne midhiyup dutun te ikelima he velinsug̵uen is budyung din ne zutun neehè ku is bituen, he ke và dà egkeg̵iya, belinsug̵uen he ziyè en te tanà su neulug he ebpuun te langit. Ne imbeg̵ey ziyà te kandin is yawi he ebpekepuwas te vitu he wazà pidtemanan is kezalem din.