Impezayag 1:11 - Manobo Western Bukidnon

¹¹ ne ke sikandin te, “Is egkeehè nu, isurat nu ne ibpeuwit nu ziyà te pitu he menge gurupu te menge tumutuu he ziyà te menge inged he Ipisu, Ismirna, Pirgemu, Tiyetira, Sardis, Piledilpya, wey ziyà daan te inged he Leudisiya.”

Impezayag 1:11 Кръстосани препратки

Nengeulaula 16:14

Is sevaha zutun te menge vahi, ne egngezanan ki Lydia he tigTiyetira he zutun ed-ubpà te inged he Pilipus. Iyan petig̵ayun din is ebpemelegyà te manggad he merudtem. Edsimba sikandin te Megbevayà. Midtuvazan sikandin te Megbevayà wey mekezawat te ibpesavut ni Pablo.

Nengeulaula 18:24

Ne zutun, diyà te Ipisu zuen nekeuma he Hudiyu he tig-Elihendriya he egngezanan ki Epulus. Metau he edikursu ne metau zaan he edseysey te insurat he Lalag te Megbevayà.

Nengeulaula 20:17

Ne mibpesuratan ni Pablo is menge ebmeg̵urangen te menge tumutuu ziyà te inged he Ipisu, ne migkag̵i zin he ebpetelavuk sikandin diyà te Militu.

1 Kurintu 15:32

Utew mezakel is kemeresayen ku zini te Ipisu su iring is menge kuntada ku te menge ebpekekaid he langgam he egkesuatan e zan te edaas. Ne maan is ed-entusen ku pa is iring kayi ke kenà a keuzemà egkevanhew. Su emun iyan haazà ne meupiya pa ke edtumanen ku haazà is erubasa he edhenduen te, “Edlipey kiw en; ed-inum kiw ne egkaan kiw su kela ke meg̵aan kiw en ebpatey ne egkehanew heini is langun.”

1 Kurintu 16:8

Egkeisip ku he kayi e pa ed-ubpà te inged he Ipisu taman te Pista te Pintikusti ne human a egenat.

Ipisu 1:1

Iyan a si Pablo is teg̵isurat kayi. Nehimu a he epustul ni Jesu Kristu, he ke và dà egkeg̵iya, midsug̵ù e zin, tenged te iyan egkesuatan te Megbevayà. Ibpeuwit ku heini is surat diyan te inged he Ipisu, diyan te keniyu te menge tumutuu he menge metinumanen te menge sug̵ù ni Jesu Kristu.

Kulusas 2:1

Umba egkeg̵iyen ku heini su egkesuatan ku he metueni niw ke maan is ebpenigudu a edhag̵ù tenged keniyu wey tenged daan te menge tumutuu ziyà te inged he Leudisiya wey is minsan hentei he tumutuu ziyan he iring keniyu wazè pa mekekilala kedì.

1 Timoteo 1:3

Ed-umanan ku egkeg̵iya kenikew is sambag ku hein mid-awà a ziyan pehendiyà te Mesidunya. Iyan is: kenè ka med-awà diyan te Ipisu. Iyan idsembag̵i ku kenikew su zuen menge etew ziyan he kinahanglan he zewaya nu. Dewaya nu he med-engked dan te kebpenurù te menge sayep he tuluuwen

Impezayag 1:17

Ne hein neehè ku sikandin, nekelangkeb a ziyà te etuvangan din ne henduen a te minatey. Ne indampè din kediey is kewanan he palad din ne ke sikandin te, “Kenè ka mahandek su iyan a sikan is puunà wey kes egkepengkusan te langun.

Impezayag 1:19

Isurat nu is ibpeehè ku kenikew, is egkeehè nu he egkeulaula g̵untaan wey is egkeulaula pa keuzemà.

Impezayag 1:2

Ne siak, id-amin ku idsurat is langun he neehè ku. Is migkag̵i te Megbevayà wey is tutuu he tuluuwen he impesavut kediey ni Jesu Kristu, idsurat ku kayi.

Impezayag 1:20

Ibpesavut ku kenikew is in-eles dengan he kehulug̵an kayi te pitu he vituen he neehè nu he egewezan ku te kewanan he velad ku wey is kehulug̵an kayi te pitu he sulù he vulawan. Is pitu he vituen, iyan alung te pitu he velinsug̵uen te Megbevayà he ebantey te pitu he gurupu te menge tumutuu. Ne heini is pitu he sulù, ne iyan sikan is pitu he gurupu te menge tumutuu.”

Impezayag 1:4

Siak si Juan, ne ebpesuratan ku is pitu he gurupu te menge tumutuu he ziyà te prubinsya he Asya. Ibpengumew-umew ku he ikeg̵ag̵ew kew te Megbevayà, wey te Wag̵as he Mulin-ulin, wey ni Jesu Kristu, ne iveg̵ey zan daan keniyu is melinawen he kebpekesavuk. Is Megbevayà, daan en sikandin te wazè pa limbag̵a is minsan hengkey; kemulu pa sikandin guntaan wey kenà sikandin egkehanew te wazà pidtemanan. Is Wag̵as he Mulin-ulin he ziyà ed-ubpà te etuvangan te pinuuwà te Megbevayà, ne pitu is gehem din. Si Jesu Kristu, iyan egkeserig̵an is lalag din. Iyan sikandin kes nehuna he zuen din beg̵u en he untung pinaag̵i te kegkevenhawa kandin. Iyan sikandin ebayàbayà te menge hadì dini te kelibutan. Dekelà is gehinawa zin kenitew. Midlibri kiw zin te silut te menge salè tew pinaag̵i te kebpaag̵as din te lengesa zin.

Impezayag 1:8

Is Nengazen tew he Megbevayà he mekeg̵eg̵ehem he zaan en te wazè pa limbag̵a is minsan hengkey, iyan ded sikandin guntaan wey minsan keuzemà te wazà pidtemanan. Ke sikandin te, “Iyan a sikan is alpa wey umiga, he ke và dà egkeg̵iya, kes puunà wey egkepengkusan te minsan hengkey.”

Impezayag 10:4

Ne zutun te kebales te veransì, idsurat ku pezem is nezineg ku, iyan, nezineg ku is egkag̵i ziyà te langit te, “Ieles nu is ibpesavut kayi te pitu he veransì ne kenè nu isurat.”

Impezayag 14:13

Ne zutun nezineg ku is egkag̵i ziyà te langit te, “Isurat nu heini: Utew mulà meupiya is egkengeulaula te menge etew he ebpatey ke menge tumutuu sikandan te Nengazen.” “Benar iyan,” egkag̵i is Wag̵as he Mulin-ulin. “Utew zan en egkengelipey su wazè en igkehag̵ù dan ne ebpekehimeley sikandan. Ne zutun edsuhulan sikandan tenged te menge meupiya he menge vaal zan.”

Impezayag 19:9

Ne migkeg̵iyan a zutun te velinsug̵uen, ke sikandin te, “Isurat nu heini: Utew zeyzey is langun he ibpemetelavuk dutun te eseweey te nati he kerehidu.” Ne impelaus din haazà is lalag din te, “Iyan heini tutuu he menge Lalag te Megbevayà!”

Impezayag 2:1

Ne impelaus din is lalag din te, “Pesurati nu is belinsug̵uen te Megbevayà he ebantey te menge tumutuu he ziyà te inged he Ipisu, ne isurat nu is menge lalag ku ziyà, ke sikew te, ‘Siak si Jesus is egawed te pitu he vituen diyà te kewanan ku he velad ne iyan a zaan edhipanew kayi te teliwazà te pitu he sulù.

Impezayag 2:12

Ne ke sikandin maan te, “Pesurati nu is belinsug̵uen he impevantey te Megbevayà diyà te menge tumutuu he ziyà te inged he Pirgemu, ke sikew te, ‘Siak si Jesus is egkag̵i; iyan a sikan is duen din sundang he zezuwa is gerangan din he meg̵arang utew.

Impezayag 2:18

Ne ke sikandin maan te, “Pesurati nu is belinsug̵uen he impevantey te Megbevayà diyà te menge tumutuu he ziyà te inged he Tiyetira. Ke sikew te, ‘Siak is egkag̵i, ne Anak a te Megbevayà; is menge mata ku, ne henduen be te egkeregreg, ne is menge paa ku, ne henduen be te g̵alang he midlimbasan.

Impezayag 2:24

Ne sikiyu is duma ziyan te Tiyetira he wazà mekezawat te penurù dutun te vahi, he ke và dà egkeg̵iya, wazè niw zewata is egngezanan te menge mezalem he penurù ni Setanas, wazè en duma pa he ebpeveelan ku keniyu.

Impezayag 2:8

Ne ke sikandin maan te, “Pesurati nu is belinsug̵uen te Megbevayà he ebantey te menge tumutuu ziyà te inged he Ismirna, ke sikew te, ‘Iyan heini menge lalag ku te puunà te langun ne egkepengkusan daan te langun. Minatey a ne nevanhew.

Impezayag 21:5

Ne migkag̵i haazà is ebpimpinuu zutun te pinuuwà te edhadì, ke sikandin te, “Guntaan edhimuwen ku he veg̵u is minsan hengkey!” Ne ke sikandin diyà te kedì te, “Isurat nu heini is egkezineg nu; egkeserig̵an wey tutuu heini he lalag.”

Impezayag 22:10

Ne impelaus din haazà is lalag din te, “Kenè nu ieles heini is impezayag kenikew he menge lalag kayi te libru su meg̵aan en egkengetuman heini is langun.

Impezayag 22:16

“Siak si Jesus, midsug̵ù ku ziyan te keniyu te menge tumutuu is belinsug̵uen ku wey zin metudtul heini is langun. Iyan a sikan is kevuwazan te hadì dengan he si David. Iyan a sikan is iring te mekevugwas, kes bituen he ed-anlag ke egkepkepawè en,” ke si Jesus.

Impezayag 3:1

Ne ke sikandin maan te, “Pesurati nu is belinsug̵uen he impevantey te Megbevayà diyà te menge tumutuu he ziyà te inged he Sardis. Ke sikew te, ‘Iyan a si Jesu Kristu is egkag̵i; iyan a ebayàbayà te Wagas he Mulin-ulin he pitu is gehem din. Ne iyan a zaan egawed te pitu he vituen. Netuenan ku is menge ulaula niw. Mezakel is egkag̵i he zuen niw en untung he wazà pidtemanan, iyan, kenè kew en edsunud kediey.

Impezayag 3:14

Ne ke sikandin maan te, “Pesurati nu is belinsug̵uen te Megbevayà he ebantey te menge tumutuu ziyà te inged he Leudisiya, ne ke sikew te, ‘Siak si Jesus is egkag̵i; migeraran a te Metinumanen wey Egkeserig̵an su venar is egkeg̵iyen ku. Pinaag̵i kedì midlimbag te Megbevayà is minsan hengkey.

Impezayag 3:4

Deisey kew zà diyan te Sardis is wazà mevuringi is bisti zin, he ke và dà egkeg̵iya, wazà medtampu te mezaat he ulaula. Ne ebpekezuma kew kedì he edsun-uzan te meputì su zait kew he ebpekiduma kedì.

Impezayag 3:7

Ne ke sikandin en maan te, “Pesurati nu is belinsug̵uen te Megbevayà he ebantey te menge tumutuu ziyan te inged he Piledilpya. Ne ke sikew te, ‘Siak si Jesus is egkag̵i; iyan a sikan is egkeserig̵an he mibpilì te Megbevayà. Imbeg̵ey kedì is keg̵ehem te kedhadì te g̵inhedian ku iring te kedhadì dengan ni Hadì David. Ne emun duen ebpuwasan ku wey mekeseled dutun te g̵inhedian ku, kenè en egkelekevan te minsan hentei. Ne emun duen etew he edlekevan ku, kenè en daan egkepuwasan te minsan hentei.