Hudas 1:20 - Manobo Western Bukidnon

²⁰ Ne sikiyu mulà, menge minahal ku he suled, peniguduwi niw is kebpetebtevangè niw su wey meheg̵et is kedtuu niw te tuluuwen he impetuuwan kenitew te Megbevayà. Pekezesen kew ampù pinaag̵i te g̵ehem he ibeg̵ey te Wag̵as he Mulin-ulin.

Hudas 1:20 Кръстосани препратки

Nengeulaula 15:9

Wazà daan isipa te Megbevayà he zuen kebpekeviza te kenà menge Hudiyu kenitew su tenged te kedtuu zan mibpesaylu zin sikandan te menge ulaula zan he mezaat iring te kebpesaylu zin dini te kenitew.

Nengeulaula 26:18

Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

Nengeulaula 6:7

Ne impeiseg dan is kedweliya zan te Lalag te Megbevayà diyà te mezakel he menge etew. Ne utew mahabet is menge tigHiruselim he nemeketuu ki Jesus. Ne mezakel zaan is menge memumuhat he nemeketuu.

Nengeulaula 9:31

Ne zutun mibmelinew is kebpekesavuk te langun he menge tumutuu ki Jesus diyà te prubinsya he Hudiya, wey Semarya wey Geliliya. Neheg̵et is kedtuu zan ne tenged te layun dan ibpehuna is kedtahud dan te Nengazen wey tenged te kedtavang kandan te Wag̵as he Mulin-ulin mid-iseg dan mebmezakel.

Ruma 15:2

kekenà, iyan ta ebpen-ahaan is igkesuat te zuma ta su wey meheg̵et is kedtuu zin.

Ruma 8:15

Su is Wag̵as he Mulin-ulin he imbeg̵ey kenitew te Megbevayà, ne wazè kiw zin himuwa he menge uripen he utew egkengehandek te Megbevayà, kekenà, midhimu kiw zin he menge anak te Megbevayà. Ne pinaag̵i te g̵ehem te Wag̵as he Mulin-ulin egkehimu en he egkeamey tew is Megbevayà.

1 Kurintu 1:8

Iyan sikandin edlig-en keniyu taman te ketepusan he timpu su wey wazà igkesewayi keniyu zutun te andew keuzemà te kedlikù din.

1 Kurintu 10:23

Egkehimu, kun, he ed-ul-ulahan tew is minsan hengkey he meupiya. Ne venar iyan heeyan. Iyan, bahin kediey, iyan egkekag̵i ku is: mezakel is kenà meupiya he ed-ul-ulahan su kenà ebpeketavang. Minsan pa te egkehimu he ed-ul-ulahan tew is minsan hengkey, mezakel is ed-ul-ulahan he kenà ebpekeheg̵et te kedtuu te menge zuma tew.

1 Kurintu 14:15

Tenged kayi egkesuatan ku he mekeampù a he ed-ulinan te Wag̵as he Mulin-ulin, iyan, egkesuatan ku zaan he mesavut te menge zuma ku ke hengkey is egkeg̵iyen ku. Ne emun egkanta a, egkesuatan ku he ed-ulinan a is egkanta te Wag̵as he Mulin-ulin, iyan, kinahanglan daan he egkesavut haazà is egkentahan ku.

1 Kurintu 14:26

Umba, menge suled, ke edtig̵um kew, iyan heini meupiya he ed-ul-ulahan. Meupiya ke zuen sevaha he andam te kegkanta te kedalig te Megbevayà, ne is sevaha, ebpenurù, ne is sevaha, idseysey zin is impesavut kandin te Megbevayà, ne zuen sevaha he egkag̵i te kineg̵iyan he kenè din egketuenan, ne zuen daan sevaha he edluwas kayi. Ne minsan hengkey he ed-ul-ulahan niw zutun ne kinahanglan he ebpekeheg̵et te kedtuu te menge tumutuu.

Gelasya 4:6

Ne zutun wey ta metueni he anak ki iyan te Megbevayà, midsug̵ù te Megbevayà he ibpeubpà dini te kenita is Wag̵as he Mulin-ulin he ziyà te ki Jesus, ne ibpinted din kenita he mekekag̵i ki te, “Amey ku he Megbevayà.”

Ipisu 4:12

Umba imbeg̵ey zin heini is menge ketau su wey kiw mehimani ne wey tew meulaula is ebpeveelan kenitew te Megbevayà ne wey melig-eni is kedtuu tew te menge tumutuu he iyan lawa ni Kristu.

Ipisu 4:16

Su iring kiw te lawa, ne sikandin iyan ulu. Ne sikitew is lawa, ne ebpekesarig kiw kandin te ulu. Ne is minsan hengkey he parti kayi te lawa, ne ebpekesarig daan te menge zuma zin he parti. Ne emun hustu is baal zutun te kada sevaha he parti, edtulin haazà is tivuuk he lawa pinaag̵i te kebpekedtetevangà te minsan hendei he parti zin. Ne sikitew zaan, ebpekeiseg is kebpekeiring tew te ulaula ni Kristu pinaag̵i te kebpurungi te kada sevaha te zuma zin.

Ipisu 4:29

Kinahanglan he kenà ebpekezezaat is kebpemèbè niw, kekenà, iyan keg̵iya niw is menge lalag he ebpekeveg̵ey he tavang te kedtuu te menge zuma niw su wey zekelà is pulus diyà te ebpemineg sumalà is egkinehenglanen dan.

Ipisu 6:18

Pekezesen kew ampù te minsan hengkey he timpu sumalà is ked-uwita keniyu te Wag̵as he Mulin-ulin. Buyù kew te tavang te Megbevayà ne layun kew andam ne peniguduwi niw layun te ked-ampù is langun he menge tumutuu.

Kulusas 2:7

Purung kew pendalid diyà te kandin; purungi niw istudyuwi is menge ulaula zin; purungi niw tuuwi sikan is tutuu he tuluuwen he impenurù keniyu. Ne kinahanglan he layun niw peselemati te Megbevayà is gag̵ew zin keniyu.

1 Tiselunika 5:11

Ne g̵eina te netuenan niw en heini peliplipayè kew ne lig-eni niw is kedtuu te uman sevaha keniyu, iring te neveelan niw en.

1 Timoteo 1:4

wey med-engked dan te ked-istudyu te menge sayep he menge g̵ug̵ud, wey te menge melug̵ayad he g̵ug̵ud te kepuun te menge etew. Su emun iyan heini ed-istudyuwan dan ebpekidlewanè dan dà ke hengkey is hustu. Kenà egkehimu he pinaag̵i kayi egketuenan ta is ibpesavut te Megbevayà pinaag̵i te kedtuu.

2 Timoteo 1:5

Kenè ku egkelipatan he utew meheg̵et is kedtuu nu he iring te meheg̵et daan is kedtuu te apù nu he si Luwida wey is iney nu he si Eunisi. Ne netuenan ku he utew hustu zaan is kenikew he kedtuu.

Tito 1:1

Sikew, Tito, ebpesuratan ku sikew. Iring ka te tutuu he anak ku su is kedtuu nu te Nengazen, ne iring daan te kedì he kedtuu kandin. Berakat he ikeg̵ag̵ew ka te Megbevayà wey te Menluluwas tew he si Jesu Kristu wey veg̵ayi ke zan te melinawen he kebpekesavuk. Iyan a si Pablo is sulug̵uen te Megbevayà wey is epustul, he ke và dà egkeg̵iya, sug̵ù ni Jesu Kristu. Iyan insug̵ua zin kedì su wey ku meheg̵et is kedtuu te menge etew he pinilì te Megbevayà, ne wey ku zaan meheg̵et is kedsavut dan te tutuu he tuluuwen he iyan edtuuwan ta. Elin daan insug̵ua zin kedì is wey zan mesavut he ebpekeperateng dan te untung he wazà pidtemanan. Dengan te wazè pa limbag̵a is minsan hengkey, migkag̵i te Megbevayà he ibeg̵ey zin kenitew heini is untung ne netuenan ta he kenà egkehimu he kenè din edtumanen is egkeg̵iyen din. Ne g̵untaan iyan en timpu te kebpetueni zin kayi te untung pinaag̵i te Meupiya he Tudtulanen. Ne heini he tudtulanen, insarig kediey te Megbevayà he menluluwas tew.

Santiago 2:22

Netuenan ta he pinaag̵i te kedtuu zin, midtuman din is insug̵ù kandin ne pinaag̵i zaan te kedtumana zin kayi, neheg̵et is kedtuu zin te Megbevayà.

2 Pedro 1:1

Iyan a si Simon Pedro is teg̵isurat kayi. Sulug̵uen a ni Jesu Kristu wey epustul zin, he ke và dà egkeg̵iya, midsug̵ù e zin. Ebpesuratan ku sikiyu is langun he neketuu ki Jesu Kristu. Megbevayà he Menluluwas tew sikandin. Geina te wazè din ibpelavi he minsan hentei, midhimu kew zin he tumutuu kandin iring te midhimu key zin daan he tumutuu.

1 Juan 5:4

su sikitew is langun he nehimu en he menge anak te Megbevayà, egkezaag tew en si Setanas he iyan ebayàbayà dini te kelibutan; ne iyan ibpekezaag tew kandin is kedtuu tew ki Jesus.

Hudas 1:3

Minahal ku he menge suled, minsan pa te iyan aney he egkesuatan ku is ebaal a te surat he ibpeuwit ku ziyan wey ku ikeseysey ziyan te keniyu is kedlibriya kenitew te Megbevayà, iyan, utew en guntaan epiki he ebpesuratan ku sikiyu wey ku sikiyu mesembag̵i. Kinahanglan, menge suled, he pekezesen kew sukul te menge etew he edhelinen dan pezem is tutuu he tuluuwen he imbeg̵ey te Megbevayà. Haazà is tuluuwen, imbeg̵ey zin kenitew te menge g̵aked din ne kinahanglan he kenè en ed-umanan te minsan hentei.

Impezayag 13:10

Is menge etew he imbanglis kandan is kebpirisuwa kandan ne siguradu egkepirisu sikandan. Ne is menge etew he imbanglis kandan he g̵umaan is idhimatey kandan, gumaan iyan is idhimatey kandan. Kinahanglan he sikitew is menge tumutuu te Nengazen, edsarig kiw kandin wey ed-antus kiw te kemereg̵enan.