Gelasya 6:16 - Manobo Western Bukidnon

¹⁶ Is minsan hentei he ed-ikul kayi te ibayà he impenurù ku pinaag̵i kayi te surat, berakat he mehizuwi te Megbevayà wey veg̵ayi te melinawen he kebpekesavuk, ne kenà iyan dà sikandin, kekenà, elin daan is langun he menge tutuu he tumutuu te Megbevayà.

Gelasya 6:16 Кръстосани препратки

Juan 1:47

Ne hein ebpelpelingguma zan en naahà ni Jesus si Natanael, ne ke si Jesus te, “Tutuu heini he kevuwazan ni Israyil su wazè din edtembunan.”

Juan 14:27

Edteg̵akan ku is isip niw te kelinew. Is kelinew he zini te isip ku, iyan idtag̵ak ku keniyu. Is menge etew zini te kelibutan he kenà edtuu, kenè dan ebpekeveg̵ey keniyu te kelinew he iring kayi. Ne kinhanglan he kenà mebmesakit is gehinawa niw ne kenè kew zaan mahandek.

Juan 16:33

Umba migkag̵i ku keniyu heini is langun su wey mebmelinawen layun is gehinawa niw tenged kediey. Dini te kelibutan ebpesipelahan kew te menge etew he kuntada ku, iyan, kenè kew mahandek su nezaag ku en sikan is egalen te menge kuntada ku!”

Ruma 1:7

Ne tenged kayi, ebpesuratan ku sikiyu is langun diyan te inged he Ruma he mahal ziyà te g̵ehinawa te Megbevayà he midhimu zin he menge sakup din. Is Amey tew he Megbevayà wey is Nengazen tew he si Jesu Kristu, berakat he ikeg̵ag̵ew kew zan wey iveg̵ey keniyu is melinawen he kebpekesavuk.

Ruma 4:12

Ne nehimu zaan si Abraham he kepuun, he ke và dà egkeg̵iya, egkeiringan te langun he menge Hudiyu he kenè dan iyan serig̵i is kedsirkunsidara kandan, kekenà, iyan dan serig̵i is kedtuu zan he iring te kedtuu ni Abraham te wazè pa sikandin sirkunsidara.

Gelasya 1:3

Berakat he ikeg̵ag̵ew kew te Amey tew he Megbevayà wey te Nengazen tew he si Jesus wey veg̵ayi kew zan te melinawen he kebpekesavuk.

Gelasya 3:29

Ne g̵eina te sakup kew ni Kristu, nehimu kew en he iring te menge kevuwazan ni Abraham ne egkezawat niw zaan is impenaad te Megbevayà ki Abraham.

Gelasya 5:16

Iyan heini sug̵ù ku keniyu: pevayàbayè kew te Wag̵as he Mulin-ulin su emun ed-ul-ulahan niw heini, kenà egkehimu he egketuman niw is mezaat he kebayà te lawa niw.

Gelasya 5:25

Ne is Wag̵as he Mulin-ulin, geina te mibeg̵ayan ki zin te veg̵u en he untung, kinahanglan he ebpevayàbayè ki zaan kandin.

Ipisu 6:23

Is Amey tew he Megbevayà wey is Nengazen tew he si Jesus, berakat he sikiyu is menge suled dey, tuvazi kew zan te melinawen he kebpekesavuk, wey ipeehè dan keniyu is kebmahala zan keniyu ziyà te g̵ehinawa zan wey heg̵eta zan is kedtuu niw kandan.

Pilipus 3:16

Iyan, kinahanglan guntaan he edtumanen tew is daan he impenurù kenitew te Megbevayà.

Pilipus 3:3

Iyan kiw kes tutuu he menge sakup te Megbevayà, ne kenà iyan sikandan, su pinaag̵i te Wag̵as he Mulin-ulin ed-azap kiw te Megbevayà ne edlipey kiw tenged te upakat tew ki Jesu Kristu. Ne kenè tew iyan edserig̵an is kelibutanen he ulaula iring te kebpesirkunsidar.

Pilipus 4:7

Ne zutun wazà samuk diyà te isip niw wey g̵ehinawa niw su pinaag̵i te kebpekidsevaha niw ki Jesu Kristu ibeg̵ey keniyu te Megbevayà is melinawen he g̵ehinawa he kenà egkesavut te minsan hentei he etew.

1 Pedro 1:3

Utew zekelà is kebpeselemati tew te Megbevayà he iyan Amey te Nengazen tew he si Jesu Kristu. Su tenged te zekelà is hizu zin kenitew, mibeg̵ayan kiw zin te veg̵u en he untung. Ne g̵untaan ebpekeperateng kiw he egkevanhew kiw keuzemà su mibanhew zin si Jesu Kristu.

Hudas 1:2

Berakat he mehizuwi kew, mebmelinawen kew, wey ikeg̵ag̵ew kew te Megbevayà.