Gelasya 6:1 - Manobo Western Bukidnon

¹ Menge suled, ke zuen duma niw he tumutuu he netuenan niw he nesupak din is Megbevayà, sikiyu is mid-ulinan te Wag̵as he Mulin-ulin, tevangi niw sikandin su wey zin kenà meengkezi is kedtumana zin te egkesuatan te Megbevayà. Asal, kinahanglan he utew kew mepelevayen is edtavang kandin. Mebpekevantey kew su kela ke mepenulayi kew zaan ni Setanas.

Gelasya 6:1 Кръстосани препратки

Mateo 11:29

Beeli niw is idsug̵ù ku keniyu ne pepenurù kew kedì ne ebpekehimeley kew su kenà a eengeren ne kenà a ebpenlupig te minsan hentei.

Mateo 26:69

Ne si Pedro, diyà te lama is ebpimpinuu. Ne zuen sulug̵uen he vahi he mid-uvey ziyà te kandin is egkag̵i te, “Sikew, duma ka zaan ni Jesus he tigGeliliya.”

Mateo 26:75

Ne human metenuzi ni Pedro sikan is migkag̵i kandin ni Jesus he, “Te kenè pe kan ebpengukarà is manuk, ne ketetelu ke en ebpekekag̵i he kenà a kenikew egkekilala.” Ne zutun migawas si Pedro ne nekelelendag.

Mateo 9:13

Susiya niw ke hengkey is kehulug̵an duen te insurat he Lalag te Megbevayà he egkag̵i te, ‘Kenè ku iyan egkesuatan is kebpemuhat niw, kekenà, iyan egkesuatan ku is kebpekedhihizuwè niw.’ ” Ne mid-uman megkag̵i si Jesus te, “Siak, wazà a medhendini wey ku ikepeengked te ed-ulaula te mezaat is menge metazeng, kekenà, iyan is menge mesinupaken te Megbevayà.”

Ruma 14:1

Ne ke zuen duma niw he edtuu ki Kristu, iyan, kenè pa meheg̵et is kedtuu zin, dewata niw sikandin, iyan, kenè kew mebpekidlewanà kandin ke is ulaula zin tenged te kedtuu zin, ne kenà utew ebpekeiring te keniyu.

Ruma 15:1

Ne sikitew is meheg̵et is kedtuu te Megbevayà, kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheg̵et is kedtuu zan. Ne kenè ta iyan idteg̵el is kenita he egkesuatan,

Ruma 8:6

Ne emun iyan ebayàbayà te isip te etew is menge mezaat he suat te lawa zin, edsilutan sikandin te kemetayen he wazè din pidtemanan. Iyan, emun iyan mulà ebayàbayà te isip din is Wag̵as he Mulin-ulin, wazà pidtemanan te untung din, ne melinew en is kedepitè dan te Megbevayà.

1 Kurintu 10:12

Ne tenged kayi, haazà is etew he egkeisip din he mezesen en is kedtuu zin, ne kinahanglan he purungi zin pa heg̵eta is kedtuu zin su kela ke mekesalà sikandin gihapun.

1 Kurintu 14:37

Ke zuen etew he ed-isipen din he zuen ketau zin he imbeg̵ey te Wag̵as he Mulin-ulin, ne emun kenà, ne zuen ibpekag̵i kandin te Megbevayà, ne kinahanglan he ventayi zin is ibpesavut ku keniyu kayi te surat su kenà dini zà te kediey ebpuun heini he menge sug̵ù, kekenà, diyà te Nengazen.

1 Kurintu 2:15

Ne sikan is etew he ziyà te kandin is Wag̵as he Mulin-ulin, egkesavut din mulà is pulus te minsan hengkey he ibpenurù te Wag̵as he Mulin-ulin. Iyan, haazà is etew he wazà diyà te kandin is Wag̵as he Mulin-ulin, kenà sikandin ebpekesavut ke hengkey is diyà te isip te menge etew he mibeg̵ayan te Wag̵as he Mulin-ulin.

1 Kurintu 3:1

Menge suled, hein diyan e pa te keniyu, wazè ku ikepenurù keniyu is mezalem he penurù iring te kebpenurua ku te menge etew he mid-ulinan te Wag̵as he Mulin-ulin su henduen kew te menge vatè pa te kedtuu ki Kristu wey menge etew he ebeyveyaan te suat dan.

1 Kurintu 4:21

Ne hendei zapit is egkesuatan niw? Emun kenè niw ed-iniyug̵an is mezaat he ulaula, ebeyaan ku sikiyu wey ku sikiyu mesiluti. Ne emun meupiya is ed-ul-ulahan niw, meupiya g̵ihapun is kebpenumbaley ku ziyan, ne zekelà is gag̵ew ku wey hizu ku keniyu.

1 Kurintu 7:5

Kenè niw iengked is lawa niw ziyà te esawa niw. Iyan, para kenà mesamuk is ked-ampù niw egkehimu he iengked niw emun neuyunan niw, asal taman dà te egkepipira he andew. Ne emun egketapus haazà is neuyunan niw, ne kinahanglan he ebpehulizè kew en maan su kela ke kenè niw meeg̵en is suat niw ne egkepenulayan kew ni Setanas.

2 Kurintu 10:1

Duen egkag̵i he siak, si Pablo, telawen a emun diyan a te keniyu, iyan, memeg̵arang kun is menge lalag ku keniyu emun edlelag̵an ku sikiyu pinaag̵i te surat. Iyan, guntaan, kenà meg̵arang is menge lalag ku, kekenà, edhangyù a keniyu pinaag̵i te menayù he menge lalag iring te menayù wey velig̵eg̵awen si Kristu.

2 Kurintu 2:7

Ne g̵untaan kinahanglan he peseyluwa niw sikandin. Sembag̵i niw su kela ke maawà is kedsarig din te Megbevayà te utew subra he kegkeseeng din.

2 Kurintu 2:8

Edhengyuen ku keniyu he ipeehè niw kandin he tutuu iyan is gag̵ew niw kandin.

Gelasya 5:23

kenè ki mevurut, wey egkeeg̵en ta is kebayà te lawa ta. Ne emun iyan heini menge ulaula ta, kenè ta egkesupak is menge sug̵ù kenita te Megbevayà.

Gelasya 6:18

Menge suled, berakat he ikeg̵ag̵ew kew is langun te Nengazen tew he si Jesu Kristu. Iyan a si Pablo.

1 Tiselunika 4:1

Ne g̵untaan, menge suled, tenged te kegkesevaha tew te Nengazen tew he si Jesus, duen ebuyuen dey wey edhengyuen dey ziyan te keniyu. Impenurù dey keniyu is ed-ul-ulahan he egkesuatan te Megbevayà, ne mid-ulaula niw en. Iyan, edhengyuen dey keniyu he ipeiseg niw pa is ked-ul-ulaha niw kayi.

2 Tiselunika 3:15

iyan, kenè niw isipa he kuntada niw, kekenà, penurua niw he iring te suled niw.

2 Timoteo 2:25

Emun menayù is kebpenurua zin te menge kuntada zin, kela ke mahalin te Megbevayà is gehinawa zan wey zan mesavut is tutuu he tuluuwen.

Hibriyuhanen 12:13

Peniguduwi niw te ed-ikul is hustu he ibayà su wey kenà luyahi is menge zuma niw he mehugkà is kedtuu zan, kekenà, melig-eni is kedtuu zan.

Hibriyuhanen 13:3

Kenè niw lipati is kedtavang niw te menge tumutuu he pirisu. Purungi niw sikandan he iring te iyan kew nepirisu. Tevangi niw zaan is menge tumutuu he ebpesipelahan he iring te iyan is keugelingen niw he lawa nepesipelahan.

Santiago 3:13

Is minsan hentei keniyu he metau wey zekelà is selevutan, ipeehè din pinaag̵i te meupiya he ulaula zin. Kinahanglan he kenà sikandin mepelevawen dutun te kebpaahaa zin te ketau zin pinaag̵i te menge meupiya he ed-ul-ulahan din.

Santiago 3:2

Sikitew is menusiyà, layun kiw egkesayep te mezakel he paag̵i. Ne ke zuen etew he kenà egkesayep pinaag̵i te kegkag̵i zin, wazè en igkesewayi kandin. Egkeveyveyaan din is tivuuk he lawa zin wey kenà mekeulaula te mezaat.

1 Pedro 3:15

Layun niw isipa he iyan egalen niw si Kristu. Layun niw endama is tavak ke zuen ed-insà keniyu ke maan is ebpekesarig kew te Megbevayà.

1 Juan 5:16

Ke zuen minsan hentei he neehè din he nekesalà is duma zin, iyan, is rimeg̵as dutun te salà, ne kenà kemetayen, ne kinahanglan he iampù din ne is Megbevayà, ibeg̵ey zin is untung he wazà pidtemanan dutun te nekesalà. Iyan egkeg̵iyen ku kayi is etew he nekesalà he kenà kemetayen is rimeg̵as dutun te salè din. Duen salà he iyan rimeg̵as dutun is kemetayen. Kenè ku iyan egkeg̵iyen he id-ampù tew is etew he nekesalà te iring dutun.