Gelasya 3:29 - Manobo Western Bukidnon

²⁹ Ne g̵eina te sakup kew ni Kristu, nehimu kew en he iring te menge kevuwazan ni Abraham ne egkezawat niw zaan is impenaad te Megbevayà ki Abraham.

Gelasya 3:29 Кръстосани препратки

Mateo 3:9

Ne kenè niw iyan serig̵i is kevuwazan kew ni Abraham su wazà dutun pulus diyà te Megbevayà. Su egkeg̵iyan ku sikiyu he emun iyan egkinehenglanen te Megbevayà, egkehimu he ebeelan din heini is menge vatu he kevuwazan ni Abraham.

Ruma 8:17

Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

1 Kurintu 15:23

Iyan nehuna he nevanhew, si Kristu. Ne sikitew is menge sakup din, iyan kiw huziyan kandin he egkevanhew zutun te kebpekelikù din keuzemà.

2 Kurintu 10:7

Purungi niw isipa is nesavut niw en su zuen menge zuma niw he kunaan dan ke iyan dan dà menge hustu he sulug̵uen ni Kristu. Kinahanglan he mesavut dan he sikami, hustu key zaan he menge sulug̵uen ni Kristu.

Gelasya 3:16

Ne iring din ded daan su zuen impenaad te Megbevayà diyà te ki Abraham wey ziyà te kevuwazan ni Abraham he egkeug̵et pa zutun id-anak. Wazè din iyan keg̵iya he zuen penaad din diyà te menge kevuwazan ni Abraham su kenà mezakel is egkeg̵iyen din, kekenà, ke sikandin diyà te ki Abraham te, “diyà te kevuwazan nu.” Umba migkag̵i zin heini su sebsevaha zà he etew zutun te kevuwazan ni Abraham is ibpesavut din he iyan si Kristu.

Gelasya 3:18

Si Abraham, imbeg̵ey kandin te Megbevayà is untung he wazà pidtemanan tenged dà te impenaad heini kandin te Megbevayà. Iyan, emun egkehimu he ibeg̵ey kenita is untung pinaag̵i te kedtumana ta te kesug̵uan, kenà daan egkehimu he ibeg̵ey heini kenita tenged dà te impenaad heini te Megbevayà.

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Gelasya 3:7

Ne sikiyu zaan, kinahanglan he sevuta niw he iyan ded heini g̵untaan kayi te kenitew su ke zuen etew he edtuu te Lalag te Megbevayà ne nehimu en sikandin he kevuwazan ni Abraham, he ke và dà egkeg̵iya, egkezawat din is impenaad te Megbevayà diyà te ki Abraham.

Gelasya 4:1

Penenglitan duen anak he minatey is amey zin te vatè pa utew sikandin. Ne minsan pa te sumusunud sikandin te langun he azen te amey zin he minatey, ne zutun te vatè pa sikandin, iring sikandin te sulug̵uen dà su zuen pa ebayàbayà kandin.

Gelasya 4:7

Ne g̵untaan kenè ki en iring te menge sulug̵uen dà, kekenà, anak ki en te Megbevayà. Ne g̵eina te iyan heini, egkezawat ta is minsan hengkey he ibeg̵ey zin diyà te anak din.

Gelasya 5:24

Ne is minsan hentei he migaked en ni Jesu Kristu, ne iring te inransang din en te krus is mekesesalà he lawa zin, he ke và dà egkeg̵iya, mid-engkezan din en is menge mezaat he kebayè din wey egkesuatan din.

Gelasya 6:16

Is minsan hentei he ed-ikul kayi te ibayà he impenurù ku pinaag̵i kayi te surat, berakat he mehizuwi te Megbevayà wey veg̵ayi te melinawen he kebpekesavuk, ne kenà iyan dà sikandin, kekenà, elin daan is langun he menge tutuu he tumutuu te Megbevayà.

Ipisu 3:6

Ibpesavut ku keniyu heini is in-eles dengan he sikiyu is kenà menge Hudiyu, pinaag̵i te kedtuuwi niw te Meupiya he Tudtulanen, edtuvazan kew zaan te Megbevayà te langun he meupiya he idtuvad din te menge Hudiyu. Ne idragkes kew zaan dutun te lawa ni Kristu. Ne egkezawat niw is menge penaad te Megbevayà tenged te kebpekidsevaha niw ki Jesu Kristu.

Tito 3:7

Umba mid-ulaula zin heini su wey tenged te g̵ag̵ew zin kenita meisip ki zin he metazeng ne maangken ta is untung he wazà pidtemanan he iyan ebperetengen ta.

Hibriyuhanen 1:14

Iyan, is menge velinsug̵uen te Megbevayà, menge sulug̵uen dà sikandan te Megbevayà. Kenè tew egkeahà, iyan, edsug̵uen din sikandan wey kiw zan metevangi is menge etew he edtulusen keuzemà.

Hibriyuhanen 11:7

Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

Hibriyuhanen 6:17

Ne egkesuatan dengan te Megbevayà he mesavut te menge etew he mibpenaazan din he kenà duwazuwa he edtumanen din is penaad din kandan, ne tenged kayi midlig-enan din is penaad din.

Santiago 2:5

Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

Impezayag 21:7

Ke zuen minsan hentei he ebpekezaag ki Setanas, ne edhimuwen ku sikandin he anak ku ne egkehimu a zaan he Megbevayè din.