Gelasya 2:16 - Manobo Western Bukidnon

¹⁶ Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Gelasya 2:16 Кръстосани препратки

Juan 20:31

Ne iyan insurata ku kayi te menge egkein-inuwan su wey kew meketuu he iyan si Jesus Anak te Megbevayà wey sikan is mibpilì te Megbevayà he ibpahadì, ne emun edtuu kew kandin ebeg̵ayan kew te untung he wazà pidtemanan.)

Nengeulaula 4:12

Iyan dà si Jesus ebpekelibri te silut kenitew,” ke si Pedro, “su zini te tivuuk he kelibutan wazè en duma pa he ngazan he etew he ebpemeleveg he imbeg̵ey te Megbevayà.”

Ruma 1:17

Su pinaag̵i te Meupiya he Tudtulanen ibpetuenan kenitew te Megbevayà is paag̵i wey kiw zin meisip he metazeng. Ne heini is paag̵i, ne pinaag̵i te kedtuu zà. Su zuen insurat he Lalag te Megbevayà he edhenduen te, “Is etew he nehimu he metazeng pinaag̵i te kedtuu zin, ne iyan ebeg̵ayan te untung he wazè din pidtemanan.”

Ruma 3:30

Su sebsevaha zà is Megbevayà ne ed-isipen din is menge Hudiyu he metazeng emun edtuuwan dan si Jesus. Ne is menge etew he kenà Hudiyu, ed-isipen din daan sikandan he metazeng emun edtuuwan dan si Jesus.

Ruma 4:2

Netuenan ta he kenà iyan ketezengan ke maan is mid-isip te Megbevayà sikandin he metazeng su wazè din mesupak is egkesuatan te Megbevayà. Su ke wazà supak din, tutuu iyan he zuen din igkezantal. Iyan, netuenan ta he nekesupak gihapun si Abraham ne tenged dutun wazè din iyan igkezantal ziyà te etuvangan te Megbevayà.

Ruma 4:24

kekenà, tenged daan kenitew wey tew mesavut he ragkes kiw zaan dutun. Sikitew, ed-isipen kiw zaan te Megbevayà he metazeng emun edtuuwan tew sikandin. Iyan sikandin sikan is mibanhew ki Jesus he Nengazen tew.

Ruma 8:3

Wazà tavang he egkekuwà ta pinaag̵i te kedtumana ta te kesug̵uan geina te wazè ta mehimu te edtuman, iyan, is Megbevayà mulà, ne iyan neketavang kenita. Su midsug̵ù din sikan is Anak din he si Jesus he nehimu he etew. Ne si Jesus, duen lawa zin he iring te lawa ta su wey zin meseg̵azi ziyà te lawa zin is silut te Megbevayà tenged te menge salè tew. Ne pinaag̵i te kedsiluti zin ki Jesus, in-awè din is gehem te mezaat he kebayè ta.

Ruma 9:30

Ne iyan ibpesavut ku kayi is: is menge etew he kenà menge Hudiyu, minsan pa te wazà metag̵ù diyà te isip dan he egkehimu he meisip sikandan he metazeng te Megbevayà, duen menge zuma kandan he pinaag̵i te kedtuu zan mid-isip sikandan gihapun he metazeng.

1 Kurintu 6:11

Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

Gelasya 4:5

su wey kiw zin melibri is langun he zizalem te kesug̵uan ne wey kiw zaan mehimu he menge anak te Megbevayà.

Gelasya 5:4

Is minsan hentei keniyu he kunaan din ke pinaag̵i te kedtumana te kesug̵uan is kebpeketezenga kandin te Megbevayà, nekesuwey en sikandin ki Kristu. Neewaan din en is gag̵ew te Megbevayà kandin.

Pilipus 3:9

su wey a zaan meisip te Megbevayà he metazeng tenged ki Kristu. Wazà a meisip he metazeng pinaag̵i te kediey zà he ulaula te kedtumana te kesug̵uan, su mibpeketazeng a te Megbevayà pinaag̵i te kedtuu ku ki Kristu. Heini is kebmetazeng, ne idtuvad kenita te Megbevayà emun edtuu ki ki Kristu.

1 Pedro 1:2

Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

2 Pedro 1:1

Iyan a si Simon Pedro is teg̵isurat kayi. Sulug̵uen a ni Jesu Kristu wey epustul zin, he ke và dà egkeg̵iya, midsug̵ù e zin. Ebpesuratan ku sikiyu is langun he neketuu ki Jesu Kristu. Megbevayà he Menluluwas tew sikandin. Geina te wazè din ibpelavi he minsan hentei, midhimu kew zin he tumutuu kandin iring te midhimu key zin daan he tumutuu.

1 Juan 1:7

Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.

Impezayag 7:14

Ne midtavak a te, “Iyan ka nesayud.” Ne ke sikandin te, “Heini is menge etew, ebpemekeuma sikandan he ebpuun dutun te zekelà he kemeresayan diyà te lumpad te kelibutan. Mibpemìpian dan is menge bisti zan diyà te lengesa te nati he kerehidu wey zan mehimu he meputì, he ke và dà egkeg̵iya, nepalis en is menge salè dan.

Impezayag 7:9

Ne neipus haazà ne neehè ku is utew medmezakel he menge etew he kenè en egkevilang tuus te utew mezakel. Diyè dan ebpuun te minsan hendei he g̵inhedian wey tribu wey kepuun wey minsan hengkey he kineg̵iyan. Diyè dan ebpemenhitindeg te etuvangan te pinuuwà te Megbevayà wey ziyà te etuvangan te nati he kerehidu. Midsun-uzan sikandan te meputì ne ebpemengulangkulang dan te zehunen he menge subpang.