Gelasya 2:14 - Manobo Western Bukidnon

¹⁴ Ne hein nesavut ku he ed-ul-ulahan dan is supak te tutuu he impenurù te Meupiya he Tudtulanen, migkeg̵iyan ku si Pedro ziyà te etuvangan te langun kandan, ke siak te, “Sikew, Pedro, sikan is menge tumutuu he kenè tew zuma he Hudiyu, maan is ibpetuman nu kandan is kesug̵uan tew te menge Hudiyu? Su minsan Hudiyu ka, mid-engkezan nu en is kedtumana nu kayi he kesug̵uan,” ke siak.

Gelasya 2:14 Кръстосани препратки

Nengeulaula 10:28

Ne migkeg̵iyan din sikandan te, “Netuenan niw en he sikami is menge Hudiyu, indawey kenami te tuluuwen dey is kebpekiduma wey kebpenumbaley ziyà te iring keniyu te kenà menge Hudiyu. Iyan,” ke si Pedro, “impesavut kedì te Megbevayà he kenè din egkesuatan he isipa ku he meremerik is minsan hentei su edewaten din is langun.

Nengeulaula 15:1

Ne zutun he timpu, duen menge Hudiyu he tumutuu he ebpemuun diyà te prubinsya he Hudiya he midhendiyà te inged he Entiyukya. Ne haazà he menge etew, duen ibpenurù dan diyà te menge kenà Hudiyu he tumutuu he tig-Entiyukya. Ke sikandan te, “Emun kenè niw edtumanen is insug̵ù kenitew te kesug̵uan he imbilinbilin dengan ni Moises he mebpesirkunsidar kew, kenà egkehimu he egkelibri kew te silut.”

Nengeulaula 15:24

Nezineg dey is tudtul he zuen menge zuma zey he Hudiyu he nekesamuk keniyu v su igkeliveg niw is menge penurù dan, iyan, wazè dey sikandan sug̵ua.

Nengeulaula 15:5

Ne zutun duen migkag̵i he menge tumutuu he sakup te upakat he Perisiyu, ne ke sikandan te, “Sikan is menge tumutuu he kenà menge Hudiyu, kinahanglan he edsirkunsidaren sikandan wey kinahanglan ded daan he ibpetuman kandan is kesug̵uan he imbilinbilin ni Moises.”

Ruma 14:14

Tenged te kebpekidsevaha ku te Nengazen tew he si Jesus, impesavut kedì he wazà minsan hengkey he egkeenen he idawey te Megbevayà. Iyan, ke zuen etew he edtuuwan din he indawey te Megbevayà is sevaha he egkeenen ne kenà meupiya ke egkeenen din.

Gelasya 1:18

Ne tetelu pa zutun he tuig ne human a medhendiyà te inged he Hiruselim wey a mekepenumbaley ziyà te ki Pedro ne ziyà a te kandin taman dà te zezuwa he simana.

Gelasya 1:6

Utew ku sikiyu igkeinuinu su wazè en utew meug̵et ne henduen be te nahalin en is kedtuu niw, ne is Megbevayà he iyan mibpetuu keniyu pinaag̵i te g̵ag̵ew ni Kristu, ed-iniyug̵an niw ne edtuuwan niw is selakew he tuluuwen he egngezanan daan te menge etew he Meupiya he Tudtulanen.

Gelasya 2:3

Iyan, nesuatan dan ded is baal ku su si Tito, is duma ku, minsan te kenà sikandin Hudiyu, wazè dan iteg̵el is kedsirkunsidar kandin sumalà is insug̵ù ni Moises.

Gelasya 2:5

Ne wazè dey itug̵ut he meveyveyai key zan te minsan hengkey he paag̵i su wey kenà meumani te tarù is tutuu he Meupiya he Tudtulanen, ne kenà egkezeetan is kedtuu niw.

Gelasya 2:9

Ne si Santiago, si Pedro, wey si Juan, haazà is menge egalen dutun, hein nesavut dan he insarig kediey te Megbevayà heini is baal ku, mibpekigkumusta zan kenami ki Bernabe he tuus te teltelezuma key pudu is edtuman te ebpeveelan te Megbevayà. Neuyunan dey he iyan key ebpenudtul ziyà te menge etew he kenà Hudiyu ne iyan dan ebpenudtul ziyà te menge Hudiyu.

Gelasya 6:12

Ne sikan is menge etew he egkesuatan dan he mebpesirkunsidar kew, egkesuatan dan he zelig̵a zan te menge zuma zan. Egkehandek dan te menge zuma zan he Hudiyu su kenè dan egkesuat he pesipelahi sikandan tenged te kedsarig dan te kebpehimatey ni Kristu.

Kulusas 1:5

Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

1 Timoteo 5:20

Is ebmeg̵urangen he layun ebpekesalà, sewaya nu ziyà te etuvangan te menge tumutuu su wey mahandek is menge zuma he ebmeg̵urangen.

Hibriyuhanen 12:13

Peniguduwi niw te ed-ikul is hustu he ibayà su wey kenà luyahi is menge zuma niw he mehugkà is kedtuu zan, kekenà, melig-eni is kedtuu zan.

Hibriyuhanen 9:10

Su heini he paag̵i te ked-ezapa te Megbevayà, ne pinaag̵i zà te menge sug̵ù mehitenged te vetasan te kegkaan, ked-inum, kebpenlùlù, wey kedhemesa te lawa he paag̵i he insug̵ù te Megbevayà. Menge sug̵ù heini he edtumanen te menge etew pinaag̵i zà te lawa wey tenged dà te insug̵ù ne kenà tenged te iyan diyà te g̵ehinawa zan. Ne is pulus kayi te paag̵i, ne taman dà heini kayi te timpu g̵untaan te ked-ilisi te Megbevayà kayi te veg̵u he paag̵i.