Gelasya 1:6 - Manobo Western Bukidnon

⁶ Utew ku sikiyu igkeinuinu su wazè en utew meug̵et ne henduen be te nahalin en is kedtuu niw, ne is Megbevayà he iyan mibpetuu keniyu pinaag̵i te g̵ag̵ew ni Kristu, ed-iniyug̵an niw ne edtuuwan niw is selakew he tuluuwen he egngezanan daan te menge etew he Meupiya he Tudtulanen.

Gelasya 1:6 Кръстосани препратки

Marcos 6:6

Ne utew neinuinu si Jesus su wazà medtuu kandin is menge etew zutun he inged. Ne zutun midtukid ni Jesus te ebpenurù is menge siringan he inged dutun.

Juan 9:30

Ne midtavak maan haazà is etew te, “Utew ku heini igkeinuinu! Duen gehem ni Jesus ne mibewian din is menge mata ku, ne minsan pa zutun wazè niw ves metueni ke hendei sikandin ebpuun!

Nengeulaula 15:11

Kenè niw ve, menge suled, edtuuwan he is kegkelibri kenitew te silut te menge Hudiyu, ne iring daan te kegkelibri kandan te kenà menge Hudiyu su tenged dà te g̵ag̵ew te Nengazen tew he si Jesus?”

Ruma 10:3

Su wazè dan dewata is paag̵i te Megbevayà te kebpeketerenga zin kandan. Ne iyan dan migamit is keugelingen dan he paag̵i he iyan is kedtumana te kesug̵uan ne wazè dan medsunud te paag̵i te Megbevayà te kebpeketerenga zin kandan.

Ruma 5:2

Tenged te kedtuu tew ki Jesus midhimu zin en he meg̵eg̵awi kenitew is Megbevayà. Umba zekelà is kelipey ta su egkeperateng ta he keuzemà ebpekeambit ki te utew kegkelavew te Megbevayà.

Ruma 8:28

Sikitew is langun he mahal is Megbevayà diyà te g̵ehinawa zin, sikitew is midhimu zin he meketuu sumalà is tuyù diyà te isip din, netuenan tew he pinaag̵i te minsan hengkey he egkehitavù kenitew, edtuvazan kiw zin gihapun te meupiya.

Ruma 8:30

Ne zutun, sikitew is langun he mibpilì din wey mehimu he menge anak din, impetuu kiw zin daan. Ne kenà duen dà taman, su mid-isip kiw zin daan he metazeng he iring te wazè kiw mekesalà. Ne impenaad din daan he zuen timpu keuzemà he edtulusen kiw zin.

1 Kurintu 4:15

Su minsan pa te utew mezakel is menge etew he ed-ag̵ak keniyu te menge tumutuu ki Kristu, sebsevaha ku zà is iring te amey niw tenged te kedtuu niw. Su hein impesavut ku keniyu is Meupiya he Tudtulanen, nehimu a he amey niw zutun te kedtuu niw ki Jesu Kristu.

2 Kurintu 11:4

Umba egkeipeng a su ke zuen ebpekeuma ziyan he selakew is ibpesavut dan mehitenged ki Jesus, ne selakew is mulin-ulin he ibpenurù dan, ne kenè dan iyan ibpesavut is tutuu he tuluuwen he impesavut dey, kekenà, selakew is ibpenurù dan, ne ed-entusen niw mulà is kandan he kebpenurù ne kenà duen dà taman su utew niw egkesuati te ebpemineg.

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

Gelasya 1:11

Egkesuatan ku, menge suled, he mesavut niw he heini is migngezanan he Meupiya he Tudtulanen he impesavut ku keniyu ne kenà ebpuun te etew zà duen

Gelasya 1:15

Ne minsan pa zutun, ingkeg̵ag̵ew a te Megbevayà ne mibpilì e zin he sulug̵uen din te wazè e pa ianak ne nehimu zin he meketuu a kandin.

Gelasya 1:7

Iyan, kenà egkehimu he zuen selakew pa he tuluuwen he egngezanan te Meupiya he Tudtulanen. Egkeg̵iyen ku heini su zuen menge etew ziyan he ebpenurù te tarù, ne pinaag̵i kayi egkesemukan is isip niw su edhelinen dan te tarù is Meupiya he Tudtulanen mehitenged ki Kristu.

Gelasya 2:14

Ne hein nesavut ku he ed-ul-ulahan dan is supak te tutuu he impenurù te Meupiya he Tudtulanen, migkeg̵iyan ku si Pedro ziyà te etuvangan te langun kandan, ke siak te, “Sikew, Pedro, sikan is menge tumutuu he kenè tew zuma he Hudiyu, maan is ibpetuman nu kandan is kesug̵uan tew te menge Hudiyu? Su minsan Hudiyu ka, mid-engkezan nu en is kedtumana nu kayi he kesug̵uan,” ke siak.

Gelasya 2:2

Umba midhendiyà a su impinted kedì te Megbevayà haazà is kedhendiyè ku. Ne kebpekeuma zey zutun ne midtig̵um is menge egalen te menge tumutuu he iyan dan dà ne impesavut ku kandan ke hengkey is Meupiya he Tudtulanen he ibpenurù ku ziyà te menge etew he kenà menge Hudiyu. Egkesuatan ku zutun he kenà maawà is pulus te nengeveelan ku en wey is kemulu ku pa ebeeli.

Gelasya 2:5

Ne wazè dey itug̵ut he meveyveyai key zan te minsan hengkey he paag̵i su wey kenà meumani te tarù is tutuu he Meupiya he Tudtulanen, ne kenà egkezeetan is kedtuu niw.

Gelasya 5:14

Is tivuuk he kesug̵uan he imbilinbilin ni Moises, ne egkepurung egketuman pinaag̵i te sevaha zà he sug̵ù he iyan heini: “Kinahanglan he purungi nu is duma nu. Isipa nu sikandin he iring te kenikew en he g̵ehinawa.”

Gelasya 5:4

Is minsan hentei keniyu he kunaan din ke pinaag̵i te kedtumana te kesug̵uan is kebpeketezenga kandin te Megbevayà, nekesuwey en sikandin ki Kristu. Neewaan din en is gag̵ew te Megbevayà kandin.

2 Tiselunika 2:14

Midhimu kew zin he menge tumutuu kandin pinaag̵i te kebpesevuta zey keniyu te Meupiya he Tudtulanen su wey kew mekeambit te utew kegkelavew te Nengazen tew he si Jesu Kristu.

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

1 Timoteo 1:3

Ed-umanan ku egkeg̵iya kenikew is sambag ku hein mid-awà a ziyan pehendiyà te Mesidunya. Iyan is: kenè ka med-awà diyan te Ipisu. Iyan idsembag̵i ku kenikew su zuen menge etew ziyan he kinahanglan he zewaya nu. Dewaya nu he med-engked dan te kebpenurù te menge sayep he tuluuwen

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

2 Timoteo 2:1

Sikew, Timoteo, is iring te tutuu he anak ku, heg̵eta nu is kedtuu nu su zekelà is tavang te Megbevayà kenita tenged te nekidsevaha ki ki Jesu Kristu.

1 Pedro 1:15

Ne g̵untaan kinahanglan he wazà igkesewayi te menge ulaula tew iring te wazà igkesewayi te menge ulaula te Megbevayà he iyan nengelintau wey kiw meketuu.

2 Pedro 1:3

Pinaag̵i te g̵ehem te Megbevayà edtevangan kiw zin te mezakel he paag̵i wey kiw meketuman te menge sug̵ù din kayi te ked-ubpè tew zini te kelibutan. Umba egkehimu heini su impekilala en kenitew si Jesu Kristu he iyan mibpetuu kenitew wey kiw mekeambit te ketazeng din wey te utew zin kegkelavew.

Impezayag 22:21

Sikiyu is langun he menge g̵aked te Megbevayà, ikeg̵ag̵ew kew te Nengazen tew he si Jesus.