Gelasya 1:10 - Manobo Western Bukidnon

¹⁰ Kunaan niw vuwa ke iyan netag̵ù te g̵ehinawa ku is: egkesuat a he zelig̵a a te menge etew. Iyan, kenà iyan heini netag̵ù te g̵ehinawa ku, kekenà, iyan is kebpenunuata ku te Megbevayà. Kunaan niw vuwa zaan ke egkesuatan ku he ibmeupiya te g̵ehinawa te menge etew is menge ulaula ku, iyan, kenà daan iyan egkesuatan ku su emun iyan egkesuatan ku, kenà egkehimu he sulug̵uen a ni Kristu.

Gelasya 1:10 Кръстосани препратки

Mateo 22:16

Ne midsug̵ù dan diyà te ki Jesus is menge sumusundan dan wey menge sakup te upakat he midtukud ni Hirudis. Ne haazà is midsug̵ù dan, migkag̵i ziyà te ki Jesus te, “Menunudlù, netuenan dey he metazeng ka he etew; su ibpenurù nu is tutuu he ebpeveelan kenitew te Megbevayà, ne is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei.

Mateo 28:14

Ne emun egkezineg heini te gubirnedur, edlelag̵an dey para kenè kew zin mepeuki.”

Mateo 6:24

Is uripen, kenà egkehimu he zezuwa is teg̵iuripen kandin. Su emun dezuwa is ebayàbayà kandin, edtehuzen din is sevaha ne egkepeukan din is sevaha. Ne emun kenà, ne egkeepesan din is sevaha, ne ebmahalen din is sevaha. Ne iring din ded daan emun iyan mahal ziyà te g̵ehinawa nu is ketig̵eyunan, su kenà egkehimu he mahal zaan diyà te g̵ehinawa nu is Megbevayà.

Nengeulaula 12:20

Ne zutun he timpu nepeukan ni Hadì Hirudis is menge meg̵inged diyà te menge inged he Tiru wey Sidun. Mibpetavang dan ki Belastu he sinerig̵an ni Hirudis he edumala te turug̵an din. Ne nengetig̵um dan su edhendiyè dan te ki Hirudis su edhengyuan dan he maawà is pauk din kandan. Umba mid-ulaula zan haazà su ziyè dan dà ebpekekuwa te keuyag̵an te inged dutun te hadì.

Nengeulaula 5:29

Ne zutun midtavak si Pedro wey is duma he menge epustul te, “Kinahanglan he edtumanen dey is sug̵ù te Megbevayà kenà is menge sug̵ù he mibeelan te etew.

Ruma 1:1

Iyan a si Pablo is teg̵isurat kayi. Uripen a ni Jesu Kristu ne midhimu e zin daan he epustul. Impenaad dengan te Megbevayà pinaag̵i te impesurat din te menge ebpeneuven din he zuen timpu he zuen Meupiya he Tudtulanen he ibpesavut kenitew. Umba mibpilì a he epustul su wey a mekepenudtul kayi te Meupiya he Tudtulanen.

Ruma 2:29

Ne iring din ded daan su is tutuu he Hudiyu, ne iyan is etew he midtuusan te Megbevayà is gehinawa zin pinaag̵i te Wag̵as he Mulin-ulin, ne kenà pinaag̵i te kedtumana te kesug̵uan. Ne is etew he iring kayi, ne egkehimu he kenà sikandin egkezalig te menge zuma zin he etew, iyan, egkezalig sikandin mulà te Megbevayà.

Ruma 2:8

Iyan, duen daan duma he menge etew he iyan dan ed-isipen is kandan he egkesuatan ne kenè dan edtuuwan is tutuu he tuluuwen, kekenà, iyan dan edtumanen is kenà hustu. Ne kenà deisek dà is pauk te Megbevayà he ibpeehè din kandan, kekenà, utew meveg̵at is idsilut din kandan.

1 Kurintu 10:33

Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.

2 Kurintu 12:19

Kunaan niw vuwa ke pinaag̵i kayi te egkeg̵iyen ku ibpesavut ku keniyu he wazè dey menge sayep, iyan, kenà iyan heeyan tuyù ku. Su ebpeketistig̵us is Megbevayà he heini is migkag̵i ku keniyu, ne iyan hustu he egkeg̵iyen tenged te kebpekidsevaha ku ki Kristu. Ne, minahal ku he menge suled, insurat ku heini is langun, su wey meheg̵et is kedtuu niw.

Ipisu 6:6

Kinahanglan he layun meupiya is baal niw ne kenà dutun dà te ebentayan kew te egalen niw su kinahanglan he kenà iyan dà ebpekezalig te vaal niw is etew, kekenà, elin daan is Megbevayà su menge sulug̵uen kiw zaan ni Kristu ne kinahanglan he edtumanen ta is ebpeveelan kenita te Megbevayà tenged te ebpuun te keputian te atey ta is kedtumana ta kayi. Kinahanglan he meupiya is gehinawa ta zutun te vaal ta iring te iyan ebayàbayà kenita is Megbevayà ne kenà iyan dà is egalen ta zini te kelibutan.

Pilipus 1:1

Surat heini ni Pablo wey ni Timoteo te menge sulug̵uen ni Jesu Kristu. Ibpeuwit heini is surat diyan te keniyu te langun he menge tumutuu ki Jesu Kristu he menge meg̵inged diyan te inged he Pilipus wey te menge ebmeg̵urangen niw wey menge diyekunu.

Kulusas 3:22

Ne sikiyu is sulug̵uen, layun niw pemineg̵a is sug̵ù te egalen niw te minsan keenu he timpu, ne kenà dutun dà te timpu he ebentayan kew zin. Ne kenè niw iyan dà ibpemineg̵a kandin su wey meupiya is isip din keniyu, kekenà, kinahanglan he iyan ketezengan ke maan is ebpurungan niw is baal niw su g̵eina te zekelà is kedtahud niw te Nengazen tew.

1 Tiselunika 2:4

Nezawat key te Megbevayà ne insarig din kenami is kebpesavut te Meupiya he Tudtulanen, ne tenged kayi ebpenudtul key. Kenè dey iyan tuyù is kebpenunuata te menge etew su iyan tuyù dey is kebpenunuata te Megbevayà. Iyan sikandin metau he ebpenggezam kenitew wey metueni he hustu is tuyù dey.

Santiago 4:4

Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

1 Juan 3:9

Is minsan hentei he nehimu en he anak te Megbevayà, kenè en sikandin egkesuat he ed-ulaula te mezaat su midsempù en man te Megbevayà. Geina te iyan Amey zin is Megbevayà kenà egkehimu he layun sikandin ed-ulaula te mezaat.