2 Tiselunika 2:9 - Manobo Western Bukidnon

⁹ Emun ebpeg̵awag̵awa keuzemà sikan is mesinupaken he etew egemiten din is gehem ni Setanas ne ibpeehè din is gehem din pinaag̵i te minsan hengkey he tarù he menge singyal wey egkein-inuwan.

2 Tiselunika 2:9 Кръстосани препратки

Mateo 12:22

Ne zutun duen nemekeuma he menge etew he zuen miduma zan he maama he nelakap wey neemew tenged te midsuukan sikandin te mezaat he mulin-ulin. Ne mibewian haazà ni Jesus ne segugunà nekekag̵i wey nekeahà.

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Mateo 4:10

Ne mibensag̵an ni Jesus te, “Setanas, ewai a kenikew! Duen insurat he Lalag te Megbevayà he edhenduen te, ‘Iyan niw zà ezapa is Nengazen he Megbevayè niw. Ne is duma pa he ngazan he megbevayà, kenè niw tumana is sug̵ù din.’ ”

Marcos 13:22

Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Lucas 11:25

Ne edlikù ne egkeehè din haazà is neubpaan din he midtines en is menge vutang dutun, ne nepurung melumpiyuwi.

Juan 4:48

Ne migkeg̵iyan ni Jesus haazà is etew te, “Kenè kew ves ebpeketuu kediey emun kenè kew ebpekeahà te menge egkengein-inuwan wey menge singyal.”

Juan 8:41

Iyan ebeelan niw is mibeelan dengan te amey niw.” Ne mibensag dan te, “Wazè key ikeg̵ingey zà! Sikami, netuenan dey he sebsevaha zà is Amey zey he iyan is Megbevayà!”

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

Nengeulaula 13:10

ne migkeg̵iyan din te, “Iring ka ki Setanas he ebpenlimbung. Utew ka lalung ne kuntada ka te minsan hengkey he meupiya. Su is Lalag te Nengazen he utew hustu, egkeg̵iyen nu he tarù.

2 Kurintu 11:14

Ne kenè ku heini igkeinuinu su minsan si Setanas, egkehimu zin is dagwey zin he iring te utew merayag he velinsug̵uen te Megbevayà he ebpuun te langit.

2 Kurintu 11:3

Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

2 Timoteo 3:8

Haazà is menge maama zaan, edsumpalit dan te tutuu he tuluuwen. Netazin en utew is isip dan ne uvag dà is kedtuu zan te Nengazen. Iring sikandan ki Hanis wey ki Hembiris he midsumpalit dengan ki Moises.

Santiago 3:15

Kenà haazà sikan is ketau he ebpuun te Megbevayà, kekenà, dini zà ebpuun te kelibutan. Kenà iyan is ketau he ibeg̵ey te Wag̵as he Mulin-ulin, kekenà, ebpuun te mezaat he mulin-ulin.

Impezayag 12:17

Ne zutun utew nepeuki te deragun haazà is bahi, ne mibeyaan din is menge zuma he anak dutun te vahi su edtebeken din sikandan. Iyan sikandan is langun he metinumanen te menge sug̵ù te Megbevayà wey metinumanen daan te tutuu he tuluuwen he impenurù ni Jesus.

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

Impezayag 18:23

Ne kenè en maan egketeyawan heini is inged te minsan hengkey he sulù. Ne is kegkag̵ikag̵i te vahi wey maama he sikan pa meked-esawa, ne kenè en maan egkezineg kayi te inged. Utew nengevantug diyà te tivuuk he kelibutan is menge ebpemetig̵ayun kayi ne mid-ekalan is menge etew ziyà te langun he menge g̵inhedian pinaag̵i te kinaagman te menge veyilan dutun.”

Impezayag 19:20

Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.

Impezayag 20:10

Ne zutun, is mid-akal kandan he si Setanas, intimbag sikandin diyà te ranew he egkeregreg te esupri he zutun itimbag sikan is langgam wey kes ebpeneuven ni Setanas ne zutun edresayen sikandan te maandew wey mezukilem te wazà pidtemanan.

Impezayag 9:11

Duen hadì he ebayàbayà kandan, iyan sikan is belinsug̵uen he mibpuwas duen te vitu he wazà pidtemanan is kezalem din. Ne ziyà te kineg̵iyan he Hibriyuhanen iyan ngazan din si Ebedun, ne ziyà te Gerisyahanen, si Epeliyun, he ke và dà egkeg̵iya, sikan is ebpekezezaat.