2 Tiselunika 1:9 - Manobo Western Bukidnon

⁹ Iyan silut din kandan is kemetayen he wazà pidtemanan. Egkesuwey zan is Nengazen wey is mekeg̵eg̵ehem he anlag din.

2 Tiselunika 1:9 Кръстосани препратки

Mateo 16:27

Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha.

Mateo 22:13

Ne insug̵ù dutun te hadì te menge sulug̵uen din te, ‘Bekusa niw is menge velad wey paa zin ne itimbag niw sikandin diyà te g̵awas, diyà te merusirem he utew meziyù. Ne zutun sikandin ebpekengingitel ne ebpekekulahì tenged te utew sikandin ebpekedsendit.’ ”

Mateo 24:30

Ne zutun, siak is Kakey te Menusiyà, egkeahà diyà te langit is tuus te kebpekeuma ku. Ne zutun utew egkengeseeng is langun he menge etew zini te kelibutan. Ne egkeehè e zan is Kakey te Menusiyà diyà te menge g̵apun su ebpekeuma a. Ne utew zekelà is gehem ku wey utew merayag is ked-anlag ku.

Mateo 25:41

Ne zutun ekeg̵iyan ku is menge etew he ziyà te zapit te egkeg̵ivang ku te, ‘Sikiyu is midrewakan te Amey ku he Megbevayà, awè kew kayi! Su zutun kew te regreg he wazè din pidtemanan he integ̵ana he zaan ki Setanas he iyan idsilut kandin duma te menge velinsug̵uen din!

Mateo 25:46

Ne heini he menge etew,” ke si Jesus, “id-awà kayi su edsilutan sikandan te silut he wazè din pidtemanan; iyan, is menge metazeng mulà, ebeg̵ayan sikandan te untung he wazè din pidtemanan.”

Mateo 26:24

Siak is Kakey te Menusiyà, ebpatey a sumalà te netagnà duen te insurat he Lalag te Megbevayà, iyan, kehizu utew zuen te etew he ed-akal kedì. Meupiya pa ziyà te kandin ke wazè en sikandin ianak.”

Mateo 7:23

Ne iyan tavak ku kandan dutun is: ‘Kenè ku sikiyu egkekilala. Sikiyu is memezaat is ulaula, awà kew kayi!’

Lucas 13:27

Ne edtevaken kew zin te, ‘Kenè ku iyan egketuenan ke hentei kew wey ke hendei kew ebpuun. Sikiyu is memezaat is ulaula, awè kew en dini.’

Juan 5:14

Ne netegteg̵aad dutun naahà sikandin ni Jesus diyà te simbahan he egngezanan te Valey te Megbevayà, ne migkeg̵iyan ni Jesus te, “Meupiya su neulian ke en; iniyug̵i nu en is menge mezaat he ulaula nu su wey kenè nu meeg̵iyi is tuwas pa he mezaat.”

Pilipus 3:19

Siguradu egkeimpirnu sikandan su iyan ebayàbayà kandan is menge mezaat he kebayà te lawa zan. Ibmeupiya te g̵ehinawa zan is menge mezaat he ulaula, iyan, meupiya pezem ke igkeeled dan; ne iyan dan dà egkeisip is menge vutang he zini te kelibutan.

1 Tiselunika 5:3

Ne egkehitavù te timpu he kunaan te menge etew ke melinew is langun wey nelig-enan sikandan. Ne segugunà dutun egkeg̵erà sikandan. Utew meg̵aan; iring te kedlepew te velilit diyà te ed-anak. Ne wazà edresik dutun he minsan sevaha.

2 Tiselunika 2:8

Ne zutun, human ebpeg̵awag̵awa sikan is utew mesinupaken he etew. Iyan, dutun te kebpekeuma ni Jesus edhimetayan sikandin ni Jesus pinaag̵i te mekeg̵eg̵ehem he anlag din; edhiyupen din dà ne segugunà ebpatey, ne egkeawà is gehem din.

Tito 2:13

Su zuen edteg̵azan ta he andew he zutun ibpeg̵awag̵awa is lavew he Megbevayà he iyan Menluluwas tew he si Jesu Kristu he utew zekelà is gehem din. Iyan sikandin ebperetengen ta.

Hibriyuhanen 10:29

Ne emun iyan haazà, wey pe be kenà utew meveg̵at is idsilut dutun te etew g̵untaan he edsumpeliten din is hizu kandin te Anak te Megbevayà. Utew meveg̵at is idsilut kandin su igkepesavut din pinaag̵i zutun te mid-ulaula zin he wazà pulus dutun te lengesa ni Jesus he ibpalis pezem kandin he iyan tuus te veg̵u en he paag̵i te kebpekidsevaha te Megbevayà te menusiyà. Meveg̵at is silut kandin su edsumpeliten din is belig̵eg̵awen he Wag̵as he Mulin-ulin.

2 Pedro 2:17

Ne haazà is menge etew he ebpenurù te tarù, iring sikandan te kalut he nemezahan. Iring sikandan te g̵apun he ebpegwisen te keramag su wazè dan menge pulus. Integ̵ana te Megbevayà is egkeubpaan dan diyà te Impirnu he utew merusirem.

2 Pedro 3:7

Ne haazà is Lalag te Megbevayà he iyan inlimbag din dengan, pinaag̵i zutun midteg̵enahan din en is langit wey tanà su wey melimas din te hapuy keuzemà dutun te andew te kedsusiya zin wey kedsiluti zin te menge etew he wazè dan kedtahud kandin.

Hudas 1:13

Iring daan sikandan te utew zezekelà he vag̵el ziyà te zag̵at ke zuen bagyu su iring is menge mekeeled-eled he ulaula zan te meremerik he vuràburà he ebpenlepew ziyà te veyvey. Iring sikandan te menge vituen he nekesuwey te hustu he nesevukan dan su kenè en egkeserig̵an is ibpenurù dan. Midteg̵ana te Megbevayà is utew merusirem he egkeubpaan dan te wazà pidtemanan.

Impezayag 20:11

Ne zutun neehè ku is dekelà he meputì he pinuuwà te edhadì ne neehè ku zaan is ebpimpinuu zutun. Naawà is langit wey tanà diyà te etuvangan din ne nahanew ne kenè en maan sikandan egkeahà.

Impezayag 20:14

Ne zutun, is langun he ebpuun te ed-ubpaan te menge minatey, in-agbur is lawa zan wey g̵imukud dan diyà te ranew he egkeregreg. (Ne haazà is ranew ne iyan kes ikezuwa he kemetayan.)

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.

Impezayag 22:15

Iyan, diyè dà te meziyù is mekeeled-eled is baal zin, wey is menge keteuwan, is memeremerik is ulaula, is menge memumunù, is ebpemenimba te menge ledawan wey is langun he menge etew he ebpenurù te tarù wey is etew he limbung is ulaula zin.