2 Tiselunika 1:7 - Manobo Western Bukidnon

⁷ Ke ibpeg̵awag̵awa keuzemà is Nengazen tew he si Jesu Kristu he ebpuun te langit, id-awè din diyan te keniyu wey zini zaan te kenami is kemeresayan he egkeantus tew g̵untaan. Egkukumbalà sikandin te iring te regreg wey edumahan te menge mekeg̵eg̵ehem he menge velinsug̵uen din.

2 Tiselunika 1:7 Кръстосани препратки

Mateo 16:27

Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha.

Mateo 16:28

Kenè niw heini lipati he zuen menge zuma tew kayi he kenà ebpatey taman te egkeehè e zan is Kakey te Menusiyà he ebpekeuma su edhadì.”

Mateo 25:31

Siak is Kakey te Menusiyà, dutun te kedlikù ku he utew zekelà is gehem te ked-anlag ku wey edumahan ad te langun he menge velinsug̵uen ku, ebpinuu ad is edhadì.

Mateo 25:41

Ne zutun ekeg̵iyan ku is menge etew he ziyà te zapit te egkeg̵ivang ku te, ‘Sikiyu is midrewakan te Amey ku he Megbevayà, awè kew kayi! Su zutun kew te regreg he wazè din pidtemanan he integ̵ana he zaan ki Setanas he iyan idsilut kandin duma te menge velinsug̵uen din!

Mateo 26:64

Ne midtavak si Jesus te, “Iyan heeyan sumalà is migkag̵i nu ne ekeg̵iyan ku sikiyu is langun he siak is Kakey te Menusiyà, keuzemà egkeahà a keniyu is diyà ebpinuu te zapit te egkekewanan te Megbevayà. Ne egkeahà a zaan keniyu ziyà te menge g̵apun is ebulus he ebpuun diyà te langit,” ke sikandin.

Marcos 14:62

Ne zutun midtavak si Jesus te, “Iyan a, ne keuzemà, egkeahà a keniyu is Kakey te Menusiyà he ziyà ebpinuu te zapit te egkekewanan te Megbevayà. Ne egkeahà a zaan keniyu ziyà te menge g̵apun is ebulus he ebpuun diyà te langit.”

Marcos 8:38

Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà, siak is Kakey te Menusiyà, igkeeled ku zaan sikandin keuzemà ke edlikù a he edumahan a te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà.”

Lucas 16:25

Iyan, midtavak ni Abraham haazà is mid-umew te, ‘Apù, tentenuzi nu he hein uuyag ke pa, ne mid-em-eminan nu en is kedlipeylipey nu. Iyan, si Lazaro mulà, ne neem-eminan din en is kemeresayan. Ne g̵untaan, si Lazaro, edlipayen; ne sikew, edresayen.

Lucas 17:30

Iring ded dutun keg̵aan is kegketik-ew te kedlikù ku te Kakey te Menusiyà keuzemà.

Juan 1:3

Is langun he midlimbag te Megbevayà, ne pinaag̵i kayi te Lalag, ne wazà minsan hengkey he midlimbag emun kenà pinaag̵i kandin te Lalag te Megbevayà.

Juan 1:51

Ne mid-uman si Jesus megkag̵i kandin te, “Benar is egkeg̵iyen ku kenikew he egkeehè niw keuzemà is langit he egkepuwasan ne siak is Kakey te Menusiyà, duen egkengeehè niw he menge velinsug̵uen te Megbevayà he ebpememenahik wey ebpemenaug diyà te etuvangan ku.”

Nengeulaula 1:11

Ne migkag̵i heini is dezuwa te, “Sikiyu is menge tigGeliliya, maan is kemulu kew pa edlingahà diyà te langit? Heini si Jesus he neehè niw he nevatun pehendiyà te langit, keuzemè en edlikù dini te tanà, ne is kedlikù din, ne iring ded daan te kegkevatun din.”

Nengeulaula 3:19

Ne g̵untaan kinahanglan he ed-iniyug̵an tew en is memezaat he ulaula. Ed-empuan tew is Nengazen ne ebpeseyluwen kiw zin te menge salè tew. Ne zutun duen timpu he ebeg̵ayan is gehinawa tew te zesen he ziyà ebpuun te kandin.

Ruma 8:17

Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

1 Kurintu 3:13

Ne keuzemà dutun te andew te kedsusi te Nengazen te menusiyà, egezaman is baal te kada sevaha he tumutuu su wey metueni ke hustu ve wey ke kenà. Egezaman pinaag̵i te hapuy ne haazà is baal he iring te kayu wey karan wey ventung ne egkeawà. Ne haazà is baal he iring te vulawan, wey selapì, wey menge mahal he vatu, ne kenà mulà egkeawà.

2 Kurintu 4:17

Ne heini is menge kemeresayan he egkeantus dey g̵untaan, ne meg̵aan dà utew, iyan, tenged te ked-antus dey kayi zuen egkeperateng dey he utew zekelà he kegkelavew he ibeg̵ey kenitew keuzemà. Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.

Ipisu 1:2

Is Amey tew he Megbevayà wey is Nengazen tew he si Jesu Kristu, berakat he ikeg̵ag̵ew kew zan wey tuvazi kew zan te melinawen he kebpekesavuk.

Kulusas 1:16

su pinaag̵i kandin te Anak te Megbevayà midlimbag te Megbevayà is minsan hengkey ziyà te langit wey zini te tanà, sikan is egkeahà te etew wey is kenà egkengeahà he kedesenan he zuen dan keg̵ehem, wey kebayàbayà, wey kedhadì. Is Anak, mibpeveelan kandin te Amey zin he Megbevayà is minsan hengkey su wey zin meg̵amit heini is minsan hengkey he linimbag din.

1 Tiselunika 3:13

Berekati zin daan he mebmelig-en kew te kedtuu niw su wey wazà igkesewayi keniyu te menge g̵aked te Megbevayà emun diyè kew ed-etuvang te Amey tew he Megbevayà dutun te kebpekeuma te Nengazen tew he si Jesus he edumahan te langun he tumutuu kandin.

2 Timoteo 2:12

Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.

Tito 2:13

Su zuen edteg̵azan ta he andew he zutun ibpeg̵awag̵awa is lavew he Megbevayà he iyan Menluluwas tew he si Jesu Kristu he utew zekelà is gehem din. Iyan sikandin ebperetengen ta.

Hibriyuhanen 10:27

Is etew he iyan heini ulaula zin, ne iyan egkepengkusan din is mekelimlimezang he hukum kandin wey is utew meinit he hapuy he iyan idsilut te Megbevayà dutun te langun he edsukul kandin.

Hibriyuhanen 12:29

su is Megbevayè tew, iring te utew meinit he hapuy is kedsilut din.

Hibriyuhanen 4:1

Ne minsan pa zutun, wazà iawà te Megbevayà is daan he penaad din he zuen menge etew he ebpekeseled dutun te inged din wey zan mekehimeley zuma kandin. Ne tenged kayi kinahanglan he ebpekeandam kiw su wey wazà minsan sevaha kenitew he kenà edtug̵utan te Megbevayà he mekeseled dutun.

Hibriyuhanen 4:11

Umba, sikitew zaan, ebeelan tew is taman te egkehimu tew wey kiw zaan mekeseled dutun te edhimelayan he midteg̵ana te Megbevayà. Kenè tew ed-iringan haazà is menge etew zengan he wazà mebpemineg te Lalag te Megbevayà su wey wazà minsan sevaha kenitew he kenà ebmehimuwen he mekeseled dutun te edhimelayan.

Hibriyuhanen 4:9

Ne tenged kayi, sikitew is menge sakup te Megbevayà guntaan, nesavut tew en he egkehimu kiw he ebpekeseled wey kiw mekehimeley zuma te Megbevayà iring te midhimeley is Megbevayà dutun te ikepitu he andew.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

1 Pedro 3:22

Diyà si Jesus med-ulì te langit ne g̵untaan diyà sikandin ebpimpinuu te zapit te egkekewanan te Megbevayà tuus te utew lavew sikandin. Iyan sikandin ebayàbayà te langun he menge velinsug̵uen te Megbevayà wey te menge kedesenan wey te minsan hentei ziyà te langit he zuen din gehem.

2 Pedro 3:7

Ne haazà is Lalag te Megbevayà he iyan inlimbag din dengan, pinaag̵i zutun midteg̵enahan din en is langit wey tanà su wey melimas din te hapuy keuzemà dutun te andew te kedsusiya zin wey kedsiluti zin te menge etew he wazè dan kedtahud kandin.

Hudas 1:7

Isipa niw zaan is menge meg̵inged dutun te menge inged he Suduma wey Gumura wey is menge inged he uvey zutun. Neiringan dan haazà is menge velinsug̵uen su utew subra is mezaat he menge ulaula zan. Is menge maama zutun, ne kenà iyan dà is menge vahi midhilevetan dan, kekenà, neked-eerig̵è dan is pudu menge maama ne tenged dutun midsilutan sikandan te hapuy ne nehimu haazà he petizaan te Megbevayà te langun keuzemà he edsilutan din te hapuy he kenà egkeevukan.

Impezayag 1:7

Ebpekeuma si Jesu Kristu he ziyà egkeahà te menge g̵apun. Egkeahà sikandin te tivuuk he menusiyà ragkes is menge etew he mibpilak kandin dengan. Ne is langun he kelasi te menusiyà dini te kelibutan, ebpekesineg̵ew zan tenged kandin su egkehandek dan te silut. Metuman heini is langun.

Impezayag 14:10

ne ibpeinum kandin is binu te pauk te Megbevayà, he ke và dà egkeg̵iya, silut kandin te Megbevayà, ne heini is mepait he vinu, midtag̵ey en te Megbevayà diyà te tasa he iyan sikan is meinit he pauk din. Ne haazà is menge etew, edresayen sikandan diyà te meregreg he esupri ziyà te Impirnu. Ne egkeahà haazà dutun te nati he kerehidu wey te menge velinsug̵uen te Megbevayà.

Impezayag 14:13

Ne zutun nezineg ku is egkag̵i ziyà te langit te, “Isurat nu heini: Utew mulà meupiya is egkengeulaula te menge etew he ebpatey ke menge tumutuu sikandan te Nengazen.” “Benar iyan,” egkag̵i is Wag̵as he Mulin-ulin. “Utew zan en egkengelipey su wazè en igkehag̵ù dan ne ebpekehimeley sikandan. Ne zutun edsuhulan sikandan tenged te menge meupiya he menge vaal zan.”

Impezayag 20:11

Ne zutun neehè ku is dekelà he meputì he pinuuwà te edhadì ne neehè ku zaan is ebpimpinuu zutun. Naawà is langit wey tanà diyà te etuvangan din ne nahanew ne kenè en maan sikandan egkeahà.

Impezayag 21:4

Ebpemunasen din en is menge luhà diyà te menge mata zan ne zutun wazè en maan ebpatey, ne wazè en maan ebpekesineg̵ew wey ebpekelelendag. Ne wazè en maan minsan hengkey he ibpekeantus su nahanew en man is nehuna he kelibutan.”

Impezayag 22:16

“Siak si Jesus, midsug̵ù ku ziyan te keniyu te menge tumutuu is belinsug̵uen ku wey zin metudtul heini is langun. Iyan a sikan is kevuwazan te hadì dengan he si David. Iyan a sikan is iring te mekevugwas, kes bituen he ed-anlag ke egkepkepawè en,” ke si Jesus.

Impezayag 22:6

Ne migkeg̵iyan a zutun te velinsug̵uen, ke sikandin te, “Heini is menge lalag he nezineg nu, utew venar ne tutuu he egkengetuman. Is Megbevayè tew he Nengazen te langun, imbeg̵ey zin is Wag̵as he Mulin-ulin diyà te ebpemeneuven din ne midsug̵ù din is belinsug̵uen din wey zan ikepaahà diyà te menge sulug̵uen din ke hengkey is meg̵aan en he egkeulaula.”

Impezayag 22:9

Iyan, mibensag̵an e zin, ke sikandin te, “Kenà a kenikew ezapa su siak wey sikew, wey is menge zuma nu he ebpeneuven te Megbevayà wey is langun he edtuman te menge lalag kayi te libru, neked-iiring kiw zà he menge sulug̵uen te Megbevayà. Iyan nu zà ezapa is Megbevayà,” ke sikandin.

Impezayag 6:11

Ne zutun impemeg̵ey ziyà te uman sevaha kandan is meputì he kumbalà. Ne migkeg̵iyan sikandan te Nengazen he medhimeley zan dè pa taman te egkeamin egkevunù is menge zuma zan daan he sulug̵uen te Megbevayà he edhimetayan daan iring kandan.