2 Timoteo 4:8 - Manobo Western Bukidnon

⁸ Ne g̵untaan integ̵ana en kedì te Nengazen is suhul he iyan ibeg̵ey zin diyà te langun he memetazeng he etew. Ibeg̵ey zin heini keuzemà te andew te kedsusiya zin te nengeulaula te tivuuk he menusiyà. Iyan sikandin kes metazeng is kedsusi zin. Ne kenà iyan e zà midteg̵enahan din te suhul, kekenà, midteg̵enahan din daan is langun he utew egkeg̵alew ke ebpekelikù sikandin.

2 Timoteo 4:8 Кръстосани препратки

Mateo 24:36

Is Amey tew he Megbevayà, iyan dà nesayud ke keenu egketuman heini is langun. Ne g̵awas kandin wazè en nesayud te andew wey uras ke keenu heini egkehitavù. Is menge velinsug̵uen te Megbevayà diyà te langit, wazè dan mesayud, wey minsan siak is Anak te Megbevayà, wazà a zaan mesayud.

Mateo 7:22

Ne zutun keuzemà te andew te kedsilut, mezakel is ebpehizuhizu zini te kedìey he egkag̵i te, ‘He Nengazen, pinaag̵i te g̵ehem nu neketagnè key, ne nengeulian dey is ebpenlelungen te mezaat he mulin-ulin, ne mezakel is menge egkein-inuwan he nengehimu zey.’

Lucas 10:12

Egkeg̵iyen ku keniyu,” ke si Jesus, “he lavew pa is idsilut te Megbevayà dutun te inged emun egkeuma keuzemà is andew te kedsilut, kenà te silut din dengan diyà te menge lalung he etew he meg̵inged diyà te inged he Suduma.”

Ruma 2:5

Ne minsan pa zutun, mezesen pa utew is gehinawa nu ne kenè ka egkesuat he ed-iniyug te mezaat he ulaula; ne kada andew ed-iseg ebmeveg̵at is silut he idrasey kenikew keuzemà dutun te andew te kedsilut te Megbevayà. Ne zutun he timpu ibpeehè din kenitew is metazeng he kedhukum din.

Ruma 8:23

Ne kenà duen dà taman, su sikita zaan is nekezawat te Wag̵as he Mulin-ulin he iyan tuus he zuen pa keuzemà ibeg̵ey kenita te Megbevayà, utew egkeheg̵et is kebperetenga ta kayi. Su utew ta egkesuati he meume en haazà is timpu he zutun edhimesazen te Megbevayà is ked-anak-anak din kenita wey edtumanen din is kedtulusa zin te lawa ta.

1 Kurintu 2:9

Ne tenged kayi iyan ibpenurù dey is insurat dengan he Lalag te Megbevayà he edhenduen te, “Is utew meupiya wey egkein-inuwan he wazè pa maahà wey wazè pa mezineg te menusiyà wey wazè pa meisip te minsan hentei he etew, ne iyan heini mid-andam te Megbevayà he ibeg̵ey zin diyà te langun he menge etew he mahal sikandin diyà te g̵ehinawa zan.”

1 Kurintu 3:13

Ne keuzemà dutun te andew te kedsusi te Nengazen te menusiyà, egezaman is baal te kada sevaha he tumutuu su wey metueni ke hustu ve wey ke kenà. Egezaman pinaag̵i te hapuy ne haazà is baal he iring te kayu wey karan wey ventung ne egkeawà. Ne haazà is baal he iring te vulawan, wey selapì, wey menge mahal he vatu, ne kenà mulà egkeawà.

1 Kurintu 9:25

Ne sikan is idlumbà, edhag̵ù sikandin su wey melumbad is lawa zin. Iyan id-ul-ulaha zin kayi su wey zin mezawat is suhul he melemu egkeawà is pulus din. Ne sikitew is tumutuu, edhag̵ù kiw zaan kayi te kedsundan tew te Nengazen su wey tew mezawat is suhul he kenà mulà egkeawà is pulus din te wazà pidtemanan.

2 Kurintu 5:2

Ne g̵eina te utew ki edlised te zini ki pa te kelibutan, utew ta igkesuat he iveg̵ey en pezem kenita haazà is beg̵u he lawa ta he ziyà te langit.

Pilipus 3:11

Umba egkesuatan ku heini su wey mehimu he mevanhew a keuzemà.

Kulusas 1:5

Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

1 Tiselunika 1:10

Su edteg̵azan niw kun is kedlikù te Anak din he ebpuun te langit. Iyan si Jesus he Anak te Megbevayà he mibanhew zin. Iyan si Jesus he midlibri kenitew te silut wey kiw mekeliyu te ebpekeuma he kedlimasa te Megbevayà te menusiyà.

1 Tiselunika 5:4

Ne sikiyu, menge suled, wazè kew mulà diyà te merusirem. Kenè kew mulà egkengetingkemed te andew te kedlimas te Nengazen iring te egkengetingkemed is menge etew te tekawen. Kenè kew iyan iring dutun.

2 Tiselunika 2:8

Ne zutun, human ebpeg̵awag̵awa sikan is utew mesinupaken he etew. Iyan, dutun te kebpekeuma ni Jesus edhimetayan sikandin ni Jesus pinaag̵i te mekeg̵eg̵ehem he anlag din; edhiyupen din dà ne segugunà ebpatey, ne egkeawà is gehem din.

1 Timoteo 6:19

Pinaag̵i kayi egkekuwa zan is hustu he ketig̵eyunan he kenè dan egkesuwey keuzemà. Ne ebpekeangken dan te untung he iyan tutuu he untung.

2 Timoteo 1:10

Ne g̵untaan impeehè en kenita haazà is gag̵ew zin su mibpeetew si Jesu Kristu he iyan Menluluwas tew. Ne si Jesus, in-awè din is gehem te kemetayen ne pinaag̵i te Meupiya he Tudtulanen impesavut din kenita he egkeveg̵ayan ki te untung he wazà pidtemanan.

2 Timoteo 1:12

ne tenged kayi egkeantus ku g̵untaan heini is kemeresayan. Ne minsan pa zutun, netuenan ku ke hentei sikandin is midserig̵an ku, ne netuenan ku zaan he taman te andew keuzemà he edsusiyen din is nengeulaula te menusiyà, metau sikandin he ebantey te langun he insarig din kediey.

2 Timoteo 1:18

Id-ampù ku layun he mehizuwi sikandin te Nengazen keuzemà te andew te kedsusi te Nengazen te langun. Ne netuenan nu en daan he zekelà is kedtevangi zin kedì diyan te Ipisu.

2 Timoteo 2:5

Is sulug̵uen te Megbevayà, ne iring te ibanggà. Ne is ibanggà, kenà ebpekezaag ne kenà ebeg̵ayan te suhul emun kenè din edsunuzen is belaud te kebpekibanggà.

2 Timoteo 4:1

Duen idtelaan ku kenikew, ne is Megbevayà wey si Jesu Kristu, iyan ebpeketistig̵us kayi te menge lalag ku. Netuenan ta he edlikù si Jesus su iyan sikandin hadì ne iyan sikandin edsusi keuzemà te nengeulaula te minsan hentei, se uuyag pa wey is nemematey en.

Tito 2:13

Su zuen edteg̵azan ta he andew he zutun ibpeg̵awag̵awa is lavew he Megbevayà he iyan Menluluwas tew he si Jesu Kristu he utew zekelà is gehem din. Iyan sikandin ebperetengen ta.

Hibriyuhanen 12:11

Ne emun ebmensuwen ki te Megbevayà, kenè ta egkesuatan su merasey is egkeulaula ta. Iyan, emun egkepasad haazà is kebmensuwa zin kenita, ne pinaag̵i kayi nemansu ki en te Megbevayà, ne metazeng en is menge ulaula ta, ne zutun utew melinew is kebpekesavuk ta.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

Santiago 1:12

Utew zeyzey is etew he ebpurung ed-antus te penggezam kandin su emun egkeahà he hustu is kedtuu zin, ebeg̵ayan sikandin te untung he wazà pidtemanan he iyan impenaad te Megbevayà diyà te langun he ebmahalen dan sikandin diyà te g̵ehinawa zan.

1 Pedro 1:4

Ne elin daan egkeperateng tew is utew meupiya he idtuvad din kenitew. Integ̵ana zin en heini ziyà te langit ne zutun kenà egkeredak, kenà egkezeetan, ne kenà daan egkehanew.

1 Pedro 5:4

Ne emun edlikù si Jesus, sikan is lavew he ed-elima te menge kerehidu te Megbevayà, duen idsuhul zin keniyu he iyan is kebpekeambit niw te utew zin kegkelavew he kenà egkehanew.

Impezayag 1:7

Ebpekeuma si Jesu Kristu he ziyà egkeahà te menge g̵apun. Egkeahà sikandin te tivuuk he menusiyà ragkes is menge etew he mibpilak kandin dengan. Ne is langun he kelasi te menusiyà dini te kelibutan, ebpekesineg̵ew zan tenged kandin su egkehandek dan te silut. Metuman heini is langun.

Impezayag 19:11

Ne zutun neehè ku is langit he nepuwasan ne zuen dutun kudà he meputì ne egkeserig̵an wey metinumanen is ed-untud dutun. Metazeng is kedhukum din ne metazeng daan is kebpekidtebek din te menge kuntada zin.

Impezayag 2:10

Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.

Impezayag 22:20

Si Jesus he iyan ebpirma kayi te langun, ke sikandin te, “Benar iyan he meg̵aan e en ebpekeuma!” Ne ke siak te, “Uya, Jesus he Nengazen dey, hendini ke en!”

Impezayag 4:10

keluwaan wey heepat he ebmeg̵urangen diyà te etuvangan din ne ed-ezapen dan is wazè din kemetayen he Megbevayà. Ne haazà is menge kuruna zan, idsavuk dan dutun te etuvangan te pinuuwà su ibeg̵ey zan diyà te Megbevayà. Ne zutun te kedsevuka zan dutun, edhabet dan egkag̵i te,

Impezayag 4:4

Ne zuen daan dutun keluwaan wey heepat he pinuuwà he nekeelingkus dutun te pinuuwà te edhadì. Ne zutun ebpememinuu is keluwaan wey heepat he ebmeg̵urangen. Meputì is bisti zan ne zuen insuup diyà te ulu zan he menge kuruna he vulawan.