2 Timoteo 2:12 - Manobo Western Bukidnon

¹² Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.

2 Timoteo 2:12 Кръстосани препратки

Mateo 10:33

Iyan, sikan is egkag̵i ziyà te menge etew he kenà a iyan egalen din, kenè ku zaan sikandin ed-engkenen diyà te etuvangan te Amey ku he ziyà te langit.

Mateo 26:35

Ne migkag̵i si Pedro te, “Minsan pa ke edhimetayan a zuma kenikew kenà a egkag̵i he wazè ku sikew mekilala!” Ne iring ded daan dutun is menge pesarig dutun te zuma he menge sumusundan ni Jesus.

Mateo 26:75

Ne human metenuzi ni Pedro sikan is migkag̵i kandin ni Jesus he, “Te kenè pe kan ebpengukarà is manuk, ne ketetelu ke en ebpekekag̵i he kenà a kenikew egkekilala.” Ne zutun migawas si Pedro ne nekelelendag.

Marcos 10:33

Ke sikandin te, “Netuenan niw he edhendiyè kiw te Hiruselim ne emun ebpekeuma kiw zutun, siak is Kakey te Menusiyà, ibpalad a ziyà te menge punuan he menge memumuhat wey menge menunudlù te kesug̵uan. Ne egkeuyun dan he ebpehimetayan a ne ibpalad e zan daan diyà te menge etew he kenà menge Hudiyu.

Marcos 8:38

Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà, siak is Kakey te Menusiyà, igkeeled ku zaan sikandin keuzemà ke edlikù a he edumahan a te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà.”

Lucas 12:9

Ne sikan is etew he egkag̵i ziyà te menge etew he kenà a iyan egalen din, ne kenè ku zaan sikandin ed-engkenen diyà te etuvangan te menge velinsug̵uen te Amey ku he ziyà te langit.

Lucas 22:29

Mibeg̵ayan a te Amey ku he Megbevayà te ketenged te kedhadì keuzemà. Ne iring din ded daan ne ebeg̵ayan ku zaan sikiyu te ketenged te kedhadì.

Lucas 22:30

Keuzemà ke edhadì a ne ebpinuu kew zuma kedì su ebpetugtug̵enè kiw is egkaan wey ed-inum. Ne ibpehadì ku sikiyu te menge kevuwazan duen te sepulù wey zezuwa he menge anak ni Israyil.”

Lucas 9:26

Is minsan hentei he igkeeled e zin wey igkeeled din is ibpenurù ku, siak is Kakey te Menusiyà, igkeeled ku zaan sikandin keuzemà ke edlikù a he zekelà is gehem te ked-anlag ku wey edsun-uzan ad te mekeg̵eg̵ehem he anlag te Amey ku he Megbevayà wey te anlag te menge velinsug̵uen te Megbevayà.

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

Ruma 5:17

Ne emun tenged te kedsupak dutun te sevaha zà he etew he si Adan, ebpematey is tivuuk he menusiyà, wey pe be kenà lavew pa he mekeinuinu is nehimu te sevaha zà daan he etew he si Jesu Kristu. Su is minsan hentei he edawat te zekelà he g̵ag̵ew kandin te Megbevayà pinaag̵i ki Jesu Kristu, ne ed-isipen sikandin he metazeng, ne ebeg̵ayan sikandin te untung he wazè din pidtemanan ne ebpekehadì sikandin duma te Megbevayà.

Ruma 8:17

Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

Pilipus 1:28

Ne egketudtulan a zaan he kenè kew egkehandek te menge kuntada niw. Su emun kenè kew egkehandek kandan egkesavut dan he iyan sikandan edsilutan ne iyan kew ebeg̵ayan te untung he wazè din pidtemanan su ibpesavut kandan heini te Megbevayà.

1 Timoteo 5:8

Su ke zuen tumutuu he kenè din ed-elimahan is menge edsarig kandin, lavew en sikandan he ziyà ed-ubpà te valey zin, mid-engkezan din en is kedtumana zin te tuluuwen tew. Meupiya pa sikan is wazà meketuu kenà sikandin.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

Impezayag 1:6

Midhimu zin he iyan kiw edhedian din wey iyan kiw memumuhat he iyan kebpemuhat tew is ked-ezapa tew te Megbevayà he Amey zin. Tehuza sikandin wey medhadì sikandin te wazà pidtemanan!

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.

Impezayag 2:13

Netuenan ku he sakup ni Setanas is inged niw. Ne minsan pa zutun midhemenan niw is kedtuu niw kedì ne wazè niw engkezi is menge penurù ku minsan dutun te kedhimetayi ki Entipas dengan. Metinumanen sikandin he ebpenudtul te menge lalag ku, ne midhimetayan sikandin diyan te inged niw he nesakup ni Setanas.

Impezayag 20:4

Ne zutun neehè ku is menge pinuuwà te edhadì. Ne is ebpememinuu zutun, mibeg̵ayan sikandan te keg̵ehem te kedhukum wey kebeg̵ey te kukuman. Neehè ku zaan is menge g̵imukud te menge etew he midhimetayan tenged te insangyew zan is Lalag te Megbevayà wey is impenurù ni Jesus. Wazè dan med-azap duen te langgam wey te ledawan te langgam, ne wazè dan daan mebpetiyap te tiyap te langgam diyà te vuked dan wey ke ziyè be te velad dan. Nengevanhew sikandan ne impehadì sikandan duma ki Kristu seled te nengkelibu he tuig.

Impezayag 20:6

Utew egkengelipey wey edtuvazan te Megbevayà haazà is egkengevanhew zutun te egkehuna he kegkevanhew. Kenè dan en ebpekeragkes duen te ikezuwa he kemetayen he iyan sikan is ranew he regreg. Menge memumuhat sikandan he ed-azap te Megbevayà wey ki Kristu. Ne ebpekehadì dan duma ki Kristu seled te nengkelibu he tuig.

Impezayag 3:10

Ne tenged te metinumanen kew te sug̵ù ku he med-antus kew, ebentayan ku sikiyu wey kew kenè en ebpekesag̵ad te limas he egkeantus te tivuuk he menusiyà he ibpenggezam kandan.

Impezayag 3:21

Is minsan hentei he ebpekezaag ki Setanas, ibeg̵ey ku kandin is ketenged te kebpinuu he zurug kedì diyà te pinuuwè ku te kedhadì iring te nekezaag a zaan ki Setanas ne mibpinuu a he zurug te Amey ku.

Impezayag 3:8

Netuenan ku is menge ulaula niw. Ne minsan pa te pirapira kew zà he leg̵as, metinumanen kew te menge lalag ku ne wazè niw engkezi is kedtuu niw kediey. Umba, is gemawan he ibayè niw, mibpuwasan ku en ne kenè en egkelekevan te minsan hentei, he ke và dà egkeg̵iya, wazè en ebpekesanggen keniyu te ibpeulaula ku keniyu.

Impezayag 5:10

Midhimu nu he iyan dan edhedian nu; ne midhimu nu zaan he menge memumuhat sikandan he iyan kebpemuhat dan is ked-ezapa zan te Megbevayà tew. Ne ibpahadì nu sikandan diyà te kelibutan.”