2 Timoteo 2:10 - Manobo Western Bukidnon

¹⁰ Ne tenged kayi ed-entusen ku is minsan hengkey he merasey wey ku metevangi is menge etew he pinilì te Megbevayà. Egkesuatan ku he melibri sikandan te silut pinaag̵i te kebpekidsevaha zan ki Jesu Kristu ne mekezawat dan te ketulusan he wazà pidtemanan.

2 Timoteo 2:10 Кръстосани препратки

Mateo 24:22

Iyan, midterinan en te Megbevayà is timpu zutun te kemeresayan su emun wazà, egkelimas dutun is tivuuk he menusiyà. Iyan, tenged te egkehizuwan din is menge pinilì din he etew, midterinan din is timpu zutun te kemeresayan.

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Mateo 24:31

Ne zutun edsug̵uen ku is menge velinsug̵uen ku ziyà te heepat he pesag̵i kayi te kelibutan ne ibpezag̵ing is budyung ne edtig̵umen dan is menge pinilì ku he etew he ebpemuun diyà te minsan hendei kayi te tivuuk he kelibutan.

Lucas 18:7

Su emun nehimu he midtevangan din haazà is bahi, iyan pe be kenà tevangi te Megbevayà sikiyu is menge nengepilì din he etew he ebpenigudu ed-ampù diyà te kandin te mezukilem wey maandew.

Lucas 22:57

Ne midtavak si Pedro te, “Bayi, kenè ku egkekilala heeyan is midakep dan.”

Juan 11:52

Ne kenà tenged te menge Hudiyu zà su netagnè din daan he pinaag̵i te kebpatey ni Jesus egkesevaha is langun he menge etew he egkehimu he menge anak te Megbevayà minsan hendei he inged.

Juan 17:24

Amà, is menge etew he imbeg̵ey nu kediey, egkesuatan ku he ziyè dan mekeamur te kediey diyà te ed-ubpaan ku keuzemà wey zan maahà is mekeg̵eg̵ehem he anlag ku he imbeg̵ey nu kediey zengan te wazè pa tukuza heini is kelibutan. Umba mibeg̵ayan a kenikew te anlag su mahal a ziyan te g̵ehinawa nu.

Juan 17:9

Edhengyuan ku sikew tenged kandan; kenè ku sikew edhengyuan he tevangi nu is menge etew he kenà edtuu kedì, kekenà, edhengyuan ku sikew he tevangi nu is menge etew he imbeg̵ey nu kediey su kenikew zaan sikandan.

Ruma 2:7

Iyan, duen menge etew he edhemenan dan is meupiya he ulaula su iyan ed-isipen dan layun is kedelig̵a wey is kedtulusa kandan keuzemà te Megbevayà wey is kegketehuza zin kandan keuzemà. Ne untung he wazè din pidtemanan is ibeg̵ey zin kandan.

Ruma 9:23

Ne iyan heini mid-ulaula zin su wey sikita is egkehizuwan din, ikepesavut din kenita ke hengkey is utew meupiya he kebpekesavuk din su midteg̵enahan ki zin wey ki zin keuzemà metulus.

1 Kurintu 1:21

Utew metau is Megbevayà; midhimu zin he kenà egketuenan te menge etew ke hentei sikandin pinaag̵i te kandan dà he ketau su midhimu zin he egkelibri sikandan pinaag̵i zà te kedtuu zan te Meupiya he Tudtulanen he ibpenurù ta he kunaan dan ke tarù he wazè din pulus.

1 Kurintu 9:22

Ne haazà is menge tumutuu he wazà sikandan mekesavut te hustu, egkehimu a he iring kandan ne kenè ku idteg̵el is kediey he egkesuatan su wey pinaag̵i kedì meheg̵et is kedtuu zan. Ne zuen te kada sevaha he ebpenudtulan ku te Lalag te Megbevayà, ebpen-ahaan ku is paag̵i he engayan kandin su wey ku maag̵ak sikandin ne ebpeketuu sikandin ki Jesus.

2 Kurintu 1:6

Emun idtug̵ut te Megbevayà he mekeantus key te merasey, umba ibpaantus key zin su wey kew mezeyzey ne wey kew zaan meveg̵ayi te untung he wazà pidtemanan. Ne iring din ded daan emun edtevangan key te Megbevayà ne egkehimu heini he tavang din daan keniyu. Ne pinaag̵i kayi edlig-enan din is kedtuu niw wey niw zaan maantus is merasey he iring te ibpaantus kenami.

2 Kurintu 12:15

Egkelipey a utew ke igkeveg̵ey ku is menge azen ku wey is desen ku wey ku sikiyu metevangi. Iyan, minsan pa te mahal kew zini te g̵ehinawa ku henduen be te kenà a mulà mahal ziyan te g̵ehinawa niw.

2 Kurintu 4:15

Ne umba ed-entusen dey is langun he mereg̵en su wey kew iyan mezeyzey, su emun egketukid en is mezakel he etew te g̵ag̵ew te Megbevayà, ne zutun ed-iseg he ebmezakel is ebpekepeselamat te Megbevayà ne egkevantug is Megbevayà.

2 Kurintu 4:17

Ne heini is menge kemeresayan he egkeantus dey g̵untaan, ne meg̵aan dà utew, iyan, tenged te ked-antus dey kayi zuen egkeperateng dey he utew zekelà he kegkelavew he ibeg̵ey kenitew keuzemà. Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.

Ipisu 3:13

Ne tenged kayi te langun, kinahanglan, menge suled, he kenà igkeawà te kedsarig niw heini is kemereg̵enan he egkeantus ku tenged keniyu, kekenà, lipey kew su iyan ibmeupiya niw.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

1 Tiselunika 5:9

Su is Megbevayà, wazè din ivanglis kenitew is silut, kekenà, midluwas kiw zin pinaag̵i te Nengazen tew he si Jesu Kristu.

2 Tiselunika 2:14

Midhimu kew zin he menge tumutuu kandin pinaag̵i te kebpesevuta zey keniyu te Meupiya he Tudtulanen su wey kew mekeambit te utew kegkelavew te Nengazen tew he si Jesu Kristu.

2 Timoteo 1:1

Sikew, Timoteo he iring te anak ku su utew ku minahal, ebpesuratan ku sikew. Iyan a si Pablo he epustul ni Jesu Kristu, he ke và dà egkeg̵iya, sulug̵uen e zin. Midsug̵ù a te Megbevayà wey ku ipenudtul is untung he wazà pidtemanan. Iyan heini sikan is impenaad din he untung he nekuwa te en pinaag̵i te kebpekidsevaha ta ki Jesu Kristu. Berakat he ikeg̵ag̵ew ka wey kehizuwi ka te Amey tew he Megbevayà wey te Nengazen tew he si Jesu Kristu wey veg̵ayi ke zan te melinawen he kebpekesavuk.

2 Timoteo 2:1

Sikew, Timoteo, is iring te tutuu he anak ku, heg̵eta nu is kedtuu nu su zekelà is tavang te Megbevayà kenita tenged te nekidsevaha ki ki Jesu Kristu.

2 Timoteo 2:3

Ambit ka zaan kayi te ked-entusa ku te kemeresayan tenged te kedtuu su wey ka mehimu he sulug̵uen ni Jesu Kristu he iring te metinumanen he sundaru.

Tito 1:1

Sikew, Tito, ebpesuratan ku sikew. Iring ka te tutuu he anak ku su is kedtuu nu te Nengazen, ne iring daan te kedì he kedtuu kandin. Berakat he ikeg̵ag̵ew ka te Megbevayà wey te Menluluwas tew he si Jesu Kristu wey veg̵ayi ke zan te melinawen he kebpekesavuk. Iyan a si Pablo is sulug̵uen te Megbevayà wey is epustul, he ke và dà egkeg̵iya, sug̵ù ni Jesu Kristu. Iyan insug̵ua zin kedì su wey ku meheg̵et is kedtuu te menge etew he pinilì te Megbevayà, ne wey ku zaan meheg̵et is kedsavut dan te tutuu he tuluuwen he iyan edtuuwan ta. Elin daan insug̵ua zin kedì is wey zan mesavut he ebpekeperateng dan te untung he wazà pidtemanan. Dengan te wazè pa limbag̵a is minsan hengkey, migkag̵i te Megbevayà he ibeg̵ey zin kenitew heini is untung ne netuenan ta he kenà egkehimu he kenè din edtumanen is egkeg̵iyen din. Ne g̵untaan iyan en timpu te kebpetueni zin kayi te untung pinaag̵i te Meupiya he Tudtulanen. Ne heini he tudtulanen, insarig kediey te Megbevayà he menluluwas tew.

1 Pedro 2:10

Su zengan kenè kiw menge sakup te Megbevayà ne g̵untaan menge sakup kiw zin en. Dengan wazè tew hanew zutun te hizu te Megbevayà, iyan, guntaan impezayag din en kenitew.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.