2 Timoteo 1:13 - Manobo Western Bukidnon

¹³ Is tutuu he tuluuwen he impenurù ku kenikew, kinahanglan he iyan layun edsunuzen nu. Hemeni nu is kedtuu nu te Megbevayà wey is kebmahala nu te menge zuma nu su iyan heini tuus te kebpekidsevaha ta ki Jesu Kristu.

2 Timoteo 1:13 Кръстосани препратки

Ruma 2:20

Kunaan niw ke iyan kew ebpekepenurù te menge etew he wazà mesayud te Megbevayà, ne kunaan niw zaan ke iyan kew ebpekepenudlù te menge etew he sikan pa mekeistudyu te hustu. Umba iyan heini ed-isipen niw su insarig keniyu te Megbevayà is kesug̵uan ne utew hustu is ketau wey utew tutuu is tuluuwen he ebpuun dutun.

Ruma 6:17

Dengan iring te nengeuripen kew te mezaat he kebayà, iyan, guntaan utew zekelà is kebpeselemati ku te Megbevayà su mibpurungan niw te edtuman is tutuu he tuluuwen he impenurù keniyu.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Pilipus 4:9

Pen-ul-ulaha niw heini is langun he impenurù ku, wey impesavut ku keniyu pinaag̵i te menge lalag ku wey pinaag̵i zaan te menge ulaula ku. Ne zutun, is Megbevayà he iyan puunà te kelinew tew te wazè din pidtemanan, iyan ed-ulin keniyu.

Kulusas 1:4

su nezineg dey is tudtul he mezesen is kedtuu niw ki Jesu Kristu wey zekelà layun is gag̵ew niw te minsan hentei he etew he g̵aked te Megbevayà.

1 Tiselunika 5:21

kekenà, gezami niw is langun ne tipig̵i niw is meupiya.

1 Timoteo 1:10

menge egkevut te kenè dan esawa, menge maama he egkeerig̵an te iring dan he maama, menge menggeg̵ebpà, menge teruen, menge ebpen-ulug te kewsa wey is minsan hentei he ebpekesupak is ulaula zin te hustu he tuluuwen.

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

1 Timoteo 6:3

Ke zuen ebpenurù te selakew he tuluuwen ne kenè din edewaten is hustu he kebpenurù te Nengazen tew he si Kristu wey is tuluuwen mehitenged te kedtumana tew te egkesuatan te Megbevayà,

2 Timoteo 1:1

Sikew, Timoteo he iring te anak ku su utew ku minahal, ebpesuratan ku sikew. Iyan a si Pablo he epustul ni Jesu Kristu, he ke và dà egkeg̵iya, sulug̵uen e zin. Midsug̵ù a te Megbevayà wey ku ipenudtul is untung he wazà pidtemanan. Iyan heini sikan is impenaad din he untung he nekuwa te en pinaag̵i te kebpekidsevaha ta ki Jesu Kristu. Berakat he ikeg̵ag̵ew ka wey kehizuwi ka te Amey tew he Megbevayà wey te Nengazen tew he si Jesu Kristu wey veg̵ayi ke zan te melinawen he kebpekesavuk.

2 Timoteo 1:14

Pinaag̵i te kedtavang te Wag̵as he Mulin-ulin he zini ed-ubpà te kenita, bentayi nu he kenà mahalin haazà is tutuu he tuluuwen he insarig kenikew te Megbevayà.

2 Timoteo 2:2

Nezineg nu is kebpenurua ku te tutuu he tuluuwen diyà te mezakel he menge tumutuu; ne kinahanglan he ipenurù nu zaan heini diyà te menge etew he egkeserig̵an nu su wey mekepenurù dan daan te zuma.

2 Timoteo 3:14

Ne sikew mulà, hemeni nu is tuluuwen he impenurù kenikew he netuenan nu he tutuu. Netuenan nu ke hentei is nemekepenurù kenikew

2 Timoteo 4:3

Umba idtelaan ku heini kenikew su egkeuma keuzemà is timpu he kenà edewaten te menge etew is tutuu he tuluuwen, kekenà, iyan dan edsunuzen is menge mezaat he kebayè dan. Ebpemepenurù dan te mezakel he menge menenudlù. Ne iyan ibpenurù kayi is tuluuwen he utew zan egkesuati te ebpemineg.

Tito 1:9

Kinahanglan he zutun te kebpenurù din, kenè din suwayi is tutuu he tuluuwen he iyan impenurù ta. Su emun iyan ibpenurù din is tutuu he tuluuwen, egkeheg̵et is kedtuu te ebpememineg kandin ne igkepesavut din he utew nengesayep is edsumpalit te penurù din.

Tito 2:1

Ne sikew mulà, kinahanglan he kenà ebpekesuwey is ibpenurù nu zuen te tutuu he tuluuwen.

Tito 2:8

Is minsan hengkey he ibpenurù nu, ne kinahanglan he zutun ebpuun te hustu he tuluuwen su wey kenà egkekag̵i he sayep ne zutun wazà igkesudii kenita te menge kuntada ta, kekenà, egkeeled dan.

Hibriyuhanen 10:23

Edhemenan tew is meheg̵et he kebperateng te kedtulusa kenitew keuzemà te wazà duwazuwa su netuenan tew he metinumanen is Megbevayà ne edhimuwen din is impenaad din kenitew.

Hibriyuhanen 3:6

Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Hibriyuhanen 4:14

Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

Hudas 1:3

Minahal ku he menge suled, minsan pa te iyan aney he egkesuatan ku is ebaal a te surat he ibpeuwit ku ziyan wey ku ikeseysey ziyan te keniyu is kedlibriya kenitew te Megbevayà, iyan, utew en guntaan epiki he ebpesuratan ku sikiyu wey ku sikiyu mesembag̵i. Kinahanglan, menge suled, he pekezesen kew sukul te menge etew he edhelinen dan pezem is tutuu he tuluuwen he imbeg̵ey te Megbevayà. Haazà is tuluuwen, imbeg̵ey zin kenitew te menge g̵aked din ne kinahanglan he kenè en ed-umanan te minsan hentei.

Impezayag 2:25

Iyan dà is: hemeni niw is netuenan niw en taman te ebpekeuma a.

Impezayag 3:11

Meg̵aan e en ebpekeuma. Hemeni niw is tutuu he tuluuwen he netuenan niw su wey kenà igkeveg̵ey ziyà te zuma is suhul he ibeg̵ey keniyu ke ebpekezaag kew ki Setanas.

Impezayag 3:3

Kenè niw lipati is impenurù keniyu he midawat niw zengan, kekenà, hemeni niw ne ewaa niw ziyà te g̵ehinawa niw is kenè niw kedtuu. Su emun kenè niw ed-iniyug̵an is menge ulaula niw he mezaat, ebeyaan ku sikiyu zutun te timpu he kenà a keniyu ebpeebuten su iring te tekawen is kebpekeuma ku.