2 Timoteo 1:12 - Manobo Western Bukidnon

¹² ne tenged kayi egkeantus ku g̵untaan heini is kemeresayan. Ne minsan pa zutun, netuenan ku ke hentei sikandin is midserig̵an ku, ne netuenan ku zaan he taman te andew keuzemà he edsusiyen din is nengeulaula te menusiyà, metau sikandin he ebantey te langun he insarig din kediey.

2 Timoteo 1:12 Кръстосани препратки

Mateo 12:21

Ne ebpekesarig kandin is menge etew ziyà te langun he menge nasud.”

Mateo 24:36

Is Amey tew he Megbevayà, iyan dà nesayud ke keenu egketuman heini is langun. Ne g̵awas kandin wazè en nesayud te andew wey uras ke keenu heini egkehitavù. Is menge velinsug̵uen te Megbevayà diyà te langit, wazè dan mesayud, wey minsan siak is Anak te Megbevayà, wazà a zaan mesayud.

Mateo 7:22

Ne zutun keuzemà te andew te kedsilut, mezakel is ebpehizuhizu zini te kedìey he egkag̵i te, ‘He Nengazen, pinaag̵i te g̵ehem nu neketagnè key, ne nengeulian dey is ebpenlelungen te mezaat he mulin-ulin, ne mezakel is menge egkein-inuwan he nengehimu zey.’

Lucas 10:12

Egkeg̵iyen ku keniyu,” ke si Jesus, “he lavew pa is idsilut te Megbevayà dutun te inged emun egkeuma keuzemà is andew te kedsilut, kenà te silut din dengan diyà te menge lalung he etew he meg̵inged diyà te inged he Suduma.”

Lucas 23:46

Ne zutun ne migkulahì si Jesus is egkag̵i te, “Amà, ibpeg̵ewezan ku en kenikew is gimukud ku.” Ne iyan dà haazà ne naawà is gehinawa zin.

Juan 17:15

Kenè ku iyan edhengyuen he iawè nu zini te kelibutan heini is menge g̵aked ta he etew, kekenà, iyan edhengyuen ku kenikew he ipata nu sikandan wey kenà sikandan mekeizi ni Setanas.

Juan 6:44

Wazà minsan hentei he ebpekesundan kediey emun wazà sikandin ulini te Amey ku he iyan midsug̵ù kediey. Ne ke zuen edsundan kediey, ebenhawen ku sikandin keuzemà dutun te ketepusan he andew.

Nengeulaula 13:46

Ne minsan pa zutun wazà mahandek si Pablo wey si Bernabe su ke sikandan dutun te menge Hudiyu te, “Kinahanglan he edhunaan dey sikiyu is menge Hudiyu edtudtuli te ibpesavut te Megbevayà, iyan, geina te kenè niw edewaten, ibpeehè niw he kenè kew zait he ebeg̵ayan te untung he wazà pidtemanan. Ne tenged dutun kenè dey en maan ibpesavut is Meupiya he Tudtulanen diyan te keniyu, kekenà, edhendiyè key te kenà menge Hudiyu.

Nengeulaula 13:50

Ne is menge punuan dutun te inged he Entiyukya wey is menge vai he ed-azap te Megbevayà, midhimu sikandan te menge Hudiyu he mengepauk dan ki Pablo wey ki Bernabe. Ne midsegseg dan haazà is dezuwa zutun te inged.

Nengeulaula 21:13

Iyan, midtavak si Pablo te, “Maan is edhimuwen niw he utew a meseeng pinaag̵i te kedsineg̵ew niw? Su emun intug̵ut en te Nengazen tew he si Jesus he iyan heeyan egkehitavù kedì, andam ad, kenà te kebpepirisu zà, kekenà, minsan te kebpehimatey ziyà te Hiruselim.”

Nengeulaula 7:59

Ne zutun te kedtulenga zan ki Esteban, nengumew-umew sikandin te Nengazen. Ke sikandin te, “He Jesus he Nengazen ku, dewata nu is gimukud ku.”

Nengeulaula 9:16

Ne ibpesavut ku kandin he mezakel is menge kemereg̵enan he egkeeg̵iyan din tenged te sulug̵uen ku sikandin.”

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

Ruma 9:33

Su zuen insurat he Lalag te Megbevayà he edhenduen te, “Duen idsavuk ku he vatu ziyà te inged te menge Hudiyu he Siyun. Egkesipà heini te menge etew ne ebpekeurambak dan, iyan, ke zuen edsarig kayi te vatu, kenè en ebkepeel-elezan.”

1 Kurintu 1:8

Iyan sikandin edlig-en keniyu taman te ketepusan he timpu su wey wazà igkesewayi keniyu zutun te andew keuzemà te kedlikù din.

1 Kurintu 3:13

Ne keuzemà dutun te andew te kedsusi te Nengazen te menusiyà, egezaman is baal te kada sevaha he tumutuu su wey metueni ke hustu ve wey ke kenà. Egezaman pinaag̵i te hapuy ne haazà is baal he iring te kayu wey karan wey ventung ne egkeawà. Ne haazà is baal he iring te vulawan, wey selapì, wey menge mahal he vatu, ne kenà mulà egkeawà.

Pilipus 1:20

Ne utew ku egkesuati, wey idsarig ku ziyà te Megbevayà he layun ku metuman is ebpeveelan din kedì su wey a kenà meeled te minsan keenu he timpu lavew en guntaan. Egkesuatan ku he mezalig si Kristu tenged kedì pinaag̵i te kebpaawaa kedì kayi te pirisuwan ne emun kenà, ne mezalig si Kristu pinaag̵i te kebpatey ku.

Pilipus 3:10

Iyan dà guntaan ibmeupiya te g̵ehinawa ku is kegketueni ku te menge ulaula ni Kristu wey is kebulusi kedì te g̵ehem he iyan sikan is gehem he ingkevanhew zin. Egkesuatan ku he mekeambit a zaan duen te kemeresayan he mid-antus din he iyan is ked-engkezi ku te kediey he egkesuatan iring te kandin he kebelevag̵a te untung din.

Pilipus 3:21

Ne zutun te andew, ne edhelinen din en is memeg̵uyà he menge lawa tew ne edhimuwen din he iring te mekeg̵eg̵ehem he lawa zin. Ne kayi te kedhelina zin kenitew, egemiten din is dekelà he g̵ehem din he iyan ingkehimu zin he ebayàbayà te minsan hengkey.

Pilipus 3:8

Ne kenà dutun dà taman is mid-engkezan ku, kekenà, mid-eminan ku engkezi is minsan hengkey he zekelà dini te g̵ehinawa ku su wey ku mekuwa is utew pa lavew he mahal he iyan is kebpekidsevaha ku ki Jesu Kristu te Nengazen ku. Tenged kandin mid-engkezan ku is langun ne mid-isip ku heini he abper zà dini te kelibutan wey a mekepekidsevaha ki Kristu,

1 Tiselunika 2:16

ne iring te egkuntedahan dan is tivuuk he menusiyà, su edsemuken key zan wey zey kenà ikesangyew is Lalag te Megbevayà he igkelibri te silut te menge etew he kenà menge Hudiyu. Ne ebpeniguduwan dan te ebaal is taman te egkehimu zan he salà. Ne g̵untaan in-andam en is silut kandan te Megbevayà.

1 Tiselunika 5:4

Ne sikiyu, menge suled, wazè kew mulà diyà te merusirem. Kenè kew mulà egkengetingkemed te andew te kedlimas te Nengazen iring te egkengetingkemed is menge etew te tekawen. Kenè kew iyan iring dutun.

1 Timoteo 6:20

Sikew Timoteo, purungi nu tumana is tuluuwen he insarig kenikew. Likayi nu is menge etew he supak te Megbevayà is kegkag̵ikag̵i zan. Likayi nu zaan is kunaan te zuma ke tutuu en he ketau.

2 Timoteo 1:14

Pinaag̵i te kedtavang te Wag̵as he Mulin-ulin he zini ed-ubpà te kenita, bentayi nu he kenà mahalin haazà is tutuu he tuluuwen he insarig kenikew te Megbevayà.

2 Timoteo 1:16

Iyan, berakat he mehizuwi te Nengazen si Unisipuru wey pemilya zin. Su layun e zin edtevangi kayi te menge keseengan ku. Wazè din ikeeled is kebpenumbaley zin kedì te pinirisu,

2 Timoteo 1:18

Id-ampù ku layun he mehizuwi sikandin te Nengazen keuzemà te andew te kedsusi te Nengazen te langun. Ne netuenan nu en daan he zekelà is kedtevangi zin kedì diyan te Ipisu.

2 Timoteo 1:8

Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

2 Timoteo 2:9

Ne tenged kayi te kebpenudtul ku te Meupiya he Tudtulanen midrasey a te menge kuntada te Megbevayà ne neeg̵en a te kedina he iring te mesinupaken, iyan, kenà mulà egkeeg̵en is Lalag te Megbevayà.

2 Timoteo 4:8

Ne g̵untaan integ̵ana en kedì te Nengazen is suhul he iyan ibeg̵ey zin diyà te langun he memetazeng he etew. Ibeg̵ey zin heini keuzemà te andew te kedsusiya zin te nengeulaula te tivuuk he menusiyà. Iyan sikandin kes metazeng is kedsusi zin. Ne kenà iyan e zà midteg̵enahan din te suhul, kekenà, midteg̵enahan din daan is langun he utew egkeg̵alew ke ebpekelikù sikandin.

Tito 3:8

Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

Hibriyuhanen 12:2

Edhemenan ta is kedsarig ta ki Jesus su iyan sikandin puunà te kedtuu ta ne pinaag̵i zaan kandin egkeheg̵et is kedtuu ta. Mid-antus din is kedrensanga kandin dutun te krus. Ne wazè din ikeeled haazà is kedhimetayi kandin, kekenà, mid-isip din he utew zin igkelipey is egkeulaula zin emun egkeipus haazà is ked-antus din. Ne g̵untaan mibpinuu en sikandin dutun te utew lavew he pinuuwà su ziyà te zapit te egkekewanan te Megbevayà.

Hibriyuhanen 2:18

Ne egkehimu en he egketevangan din is ebpenulayen ni Setanas su neseg̵azan din en is kemereg̵enan tenged te kebpenulaya kandin.

Hibriyuhanen 7:25

Ne tenged kayi, egkehimu te minsan keenu he timpu he edlibriyen din te silut is minsan hentei he menge etew emun pinaag̵i kandin ed-aput sikandan diyà te Megbevayà su wazà pidtemanan te untung din, ne layun din egkehimu te edtavang sikandan diyà te etuvangan te Megbevayà.

1 Pedro 1:5

Kenitew en haazà is integ̵ana zin. Tenged te nekesarig kiw kandin, nelig-enan kiw te g̵ehem te Megbevayà te kemulu kiw pa edtag̵ad te kedtulusa zin kenitew keuzemà te ketepusan he timpu.

1 Pedro 4:16

Iyan, ke iyan niw ibpekeantus te merasey is tenged te neketuu kew ki Kristu, kenè niw haazà ikeeled, kekenà, utew zekelà is kebpeselemati niw te Megbevayà su neg̵aked kew ni Kristu.

1 Pedro 4:19

Ne tenged dutun, menge suled, ke ebpekeantus kew en te merasey su iyan intuvad keniyu te Megbevayà, isarig niw is gehinawa niw ziyà te kandin he iyan metinumanen he nenlimbag wey hemeni niw is memeupiya he ulaula.

Hudas 1:24

Utew zekelà is kebpeselemati tew te Megbevayà. Iyan metau he edtavang kenitew su wey kenè kiw mekesuwey ziyà te kandin. Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.