2 Pedro 3:11 - Manobo Western Bukidnon

¹¹ Ne g̵eina te zuen andew keuzemà he zutun egkehanew is langun te iring kayi, kinahanglan he ebpurungan tew is kedsunud tew te Megbevayà para wazà igkesewayi kenitew.

2 Pedro 3:11 Кръстосани препратки

Mateo 8:27

Nengeinuinu is langun he menge zuma zin. “Hengkey he etawa heini?” ke sikandan, “su minsan is keramag wey menge vag̵el ne ebpemineg kandin!”

Ruma 13:11

Kinahanglan he iyan heini ed-ul-ulahan ta su netuenan ta ke hengkey is hustu he ed-ul-ulahan kayi te timpu. Su puun guntaan, is timpu keuzemà he zutun edhimesazen te Megbevayà is kedlibriya zin kenitew, uvey en kenà dutun te timpu zengan he neketuu kiw. Ne tenged kayi kinahanglan he kenè kiw iring te etew he nekelipezeng, kekenà, iring te etew he ed-andam.

Ruma 13:12

Su zini te kelibutan, iring te utew merusirem tenged te mezaat he ulaula, iyan, meg̵aan en egketapus is kezukileman su meg̵aan en egkepawà, he ke và dà egkeg̵iya, meg̵aan en edlikù si Kristu. Ne tenged kayi, ed-engkezan tew en is menge mezaat he ulaula he zait te kezukileman ne idsun-ud tew is limbutung he iyan is kerayag, he ke và dà egkeg̵iya, ed-ul-ulahan tew is meupiya he ulaula.

2 Kurintu 1:12

Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Pilipus 3:20

Ne sikitew mulà, ne iyan hustu he inged tew is diyà te langit ne utew zekelà is perateng tew te kedlikù te Menluluwas tew he ebpuun diyà te langit he iyan is Nengazen tew he si Jesu Kristu.

1 Tiselunika 1:5

su impesavut dey keniyu is Meupiya he Tudtulanen, kenà pinaag̵i te lalag dey zà, kekenà, pinaag̵i te g̵ehem te Wag̵as he Mulin-ulin. Midheg̵et te Megbevayà dutun is kedsevuta zey kayi. Ne netuenan niw zaan ke hengkey is menge ulaula zey he meupiya wey kew mezeyzey hein diyan key te keniyu.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

1 Timoteo 4:12

Minsan pa te menguhed ke pa, kinahanglan he mezait ka he edtehuzen te minsan hentei; kinahanglan he iyan ka ed-iringan te menge tumutuu ki Kristu, ne tenged kayi kinahanglan he tegteg̵ami nu is kegkag̵ikag̵i nu, is ulaula nu, is kebmahala nu te langun, is kedsarig nu te Megbevayà, wey is kedlikayi nu te meremerik he ulaula.

1 Timoteo 6:11

Ne sikew mulà, sulug̵uen ka te Megbevayà; likayi nu is langun he iring kayi he menge ulaula. Hemeni nu is metazeng he ulaula, is kedtumana te egkesuatan te Megbevayà, is kedsarig kandin, is kegkeg̵eg̵awi nu te menge zuma nu, is kebmeinentusen te menge supak dan, wey is kelinew te ulaula nu.

1 Timoteo 6:3

Ke zuen ebpenurù te selakew he tuluuwen ne kenè din edewaten is hustu he kebpenurù te Nengazen tew he si Kristu wey is tuluuwen mehitenged te kedtumana tew te egkesuatan te Megbevayà,

1 Timoteo 6:6

Tutuu iyan he zekelà utew is pulus te kebpesakup te Megbevayà, iyan, dutun dà te etew he ibmeupiya en te g̵ehinawa zin is minsan deisey he egketig̵eyunan din.

Hibriyuhanen 13:5

Bantey kew su kela ke utew subra is suat niw te selapì. Kinahanglan he imeupiye en te g̵ehinawa niw is naazen niw, su migkag̵i is Megbevayà te, “Kenè ku sikiyu ed-ewaan ne kenè ku sikiyu ed-engkezan.”

Santiago 1:24

Egkeehè din is dagwey zin, iyan, meg̵aan dà. Ne egkelipatan din dutun ke hengkey is neehè din.

Santiago 3:13

Is minsan hentei keniyu he metau wey zekelà is selevutan, ipeehè din pinaag̵i te meupiya he ulaula zin. Kinahanglan he kenà sikandin mepelevawen dutun te kebpaahaa zin te ketau zin pinaag̵i te menge meupiya he ed-ul-ulahan din.

1 Pedro 1:15

Ne g̵untaan kinahanglan he wazà igkesewayi te menge ulaula tew iring te wazà igkesewayi te menge ulaula te Megbevayà he iyan nengelintau wey kiw meketuu.

1 Pedro 2:12

Kinahanglan he utew metazeng is menge ulaula niw su wey maahà te menge etew he kenà tumutuu. Su minsan ke egkeg̵iyen dan he mezaat is ulaula niw, egketuenan dan gihapun he meupiya is ed-ul-ulahan niw ne ebpekezalig dan te Megbevayà keuzemà te andew te kebulusi zin te menusiyà.

2 Pedro 1:3

Pinaag̵i te g̵ehem te Megbevayà edtevangan kiw zin te mezakel he paag̵i wey kiw meketuman te menge sug̵ù din kayi te ked-ubpè tew zini te kelibutan. Umba egkehimu heini su impekilala en kenitew si Jesu Kristu he iyan mibpetuu kenitew wey kiw mekeambit te ketazeng din wey te utew zin kegkelavew.

2 Pedro 1:6

Ne is kedsavut, edheg̵etan ta te edtengkaan he ed-ul-ulahan. Ne haazà daan, edheg̵etan ta te kebmeinentusen. Ne is kebmeinentusen, edheg̵etan ta te kebpevayàbayè ta te Megbevayà.

2 Pedro 3:10

Ne minsan pa zutun, edtumanen gihapun te Megbevayà is kedlimasa zin te kelibutan. Egketik-awan is menusiyà he iring te kegketik-awi kandan te tekawen. Dutun he andew egkezineg is kerekatak ne egkehanew is langit. Egkeg̵evà ne egkeamin egketutung is minsan hengkey. Egkevinsulan is tivuuk he kelibutan wey is langun he tag̵ù din.

2 Pedro 3:12

Su edteg̵azan ta is andew te kedlimasa te Megbevayà te kelibutan. Edhimuwen ta is taman te egkehimu ta su wey meg̵aan metuman. Dutun he andew egkeamin egketutung is langit, wey egkengetunew is langun te utew meinit.