2 Pedro 2:14 - Manobo Western Bukidnon

¹⁴ Egkeerig̵an dan te minsan hentei he vahi; kenà egkepenù is suat dan te mezaat he ulaula. Ebpeeyatan dan is menge etew he kenè pa ebpekesavut te hustu. Utew zan leg̵ezen, iyan, kenà egkehimu he kenà sikandan egkesilutan te Megbevayà.

2 Pedro 2:14 Кръстосани препратки

Mateo 12:34

Iring din ded daan kayi te keniyu. Wazà meupiya he egkekag̵i niw su memezaat is ulaula niw. Iring kew te menge uled su ebpekekaid kew! Is diyà te g̵ehinawa te etew, iyan edlepew ziyà te vèbè din.

Mateo 23:14

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Edlimbungan niw is menge valu he vahi wey niw maangken is baley zutun te edlimbungan niw. Ne utew melug̵ayad is ked-ampù niw he iyan paag̵i te kedtembuni niw te mezaat he mibeelan niw. Tenged kayi utew zekelà is silut keniyu te Megbevayà.

Mateo 25:41

Ne zutun ekeg̵iyan ku is menge etew he ziyà te zapit te egkeg̵ivang ku te, ‘Sikiyu is midrewakan te Amey ku he Megbevayà, awè kew kayi! Su zutun kew te regreg he wazè din pidtemanan he integ̵ana he zaan ki Setanas he iyan idsilut kandin duma te menge velinsug̵uen din!

Mateo 5:28

Ne iyan kedì he penurù is: ke zuen minsan hentei he maama he edtengteng dà te vahi he kenè din esawa ne egkeerig̵an en dutun, ne haazà is maama, nekesalè en dutun te esawa zin.

Marcos 13:22

Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Juan 5:44

Egkemenumenu is hustu he kebpeketuu niw emun ebpengahaan niw te kada sevaha is kegkezelig̵i keniyu te menge zuma niw, ne is kegkezelig̵i pezem keniyu te sebsevaha zà he Megbevayà, kenè niw egkesuatan?

Ruma 16:18

Su is menge etew he ed-ulaula te iring kayi, kenè dan edtumanen is sug̵ù te Nengazen tew he si Kristu, kekenà, iyan dan edtumanen is kandan he menge suat. Pinaag̵i te ketau zan te kegkag̵i wey pinaag̵i te mekempet he egkeg̵iyen dan, egkeekalan dan is isip te menge paglung he etew.

1 Kurintu 11:19

Kinahanglan buwa he iyan heini egkehitavù keniyu ziyan su wey metueni ke hentei keniyu is egkeserig̵an te Megbevayà.

Ipisu 2:3

Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

Santiago 1:8

su zuwazuwa is ed-isipen din; kenè din edserig̵an is Megbevayà, ne kenà daan egkeserig̵an is minsan hengkey he ulaula zin.

2 Pedro 2:18

Uvag mezalem is menge lalag dan, iyan, wazà pulus te egkeg̵iyen dan. Duen menge etew he ed-engkezan dan pezem is menge zaan he zuma zan he ed-ulaula te sayep, iyan, ebpenulayen sikandan dutun te menge menunudlù pinaag̵i te meremerik he kebayà te lawa zan.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

2 Pedro 3:16

Ibpenurù din layun is andew te kedlimas diyà te langun he menge surat din. Duen daan ibpenurù ni Pablo he mereg̵en he edsevuten ne is menge etew he kenà edsavut te hustu wey wazà meheg̵et is kedtuu zan, edhelinen dan haazà is memereg̵en ne nesayep is kedseysaya zan duen iring te nesayep daan is kedseysaya zan te zuma he insurat he Lalag te Megbevayà. Ne tenged dutun edsilutan sikandan te Megbevayà.

1 Juan 2:16

Su is minsan hengkey he mezaat he ulaula zini te kelibutan, iring te menge mezaat he kebayà, is menge mezaat he vutang he egkeahà wey egkesuatan te menge etew wey is kebpezalig dan tenged te menge azen he nekuwa zan, kenè man heini ebpuun te Amey tew he Megbevayà, kekenà, dini zà ebpuun te kelibutan.

Hudas 1:11

Kehizu zan! Mid-iringan dan is mid-ulaula zengan ni Kain. Mid-iringan dan is paag̵i ni Belaam he utew sayep su minsan netuenan dan he mezaat is ed-ul-ulahan dan, ed-ul-ulahan dan gihapun su susuaten sikandan te selapì. Iring te midsukul si Kuri te Mebevayà, midsukul zan daan ne edsilutan sikandan iring te midsilutan daan si Kuri.

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.