2 Pedro 2:1 - Manobo Western Bukidnon

¹ Duen dengan menge teruen he etew he uvag kun ebpeneuven te Megbevayà ne iring din ded daan, duen menge etew he edlepew g̵untaan he ebpenurù te tarù diyan te keniyu. Sayep is ibpenurù dan te meeles ne ebpekezezaat heini te upakat niw te menge tumutuu. Ibpenurù dan he kenà Nengazen tew si Jesus he iyan pezem mibelukas kandan ne tenged dutun egketik-awan sikandan ke edsilutan dan.

2 Pedro 2:1 Кръстосани препратки

Mateo 10:33

Iyan, sikan is egkag̵i ziyà te menge etew he kenà a iyan egalen din, kenè ku zaan sikandin ed-engkenen diyà te etuvangan te Amey ku he ziyà te langit.

Mateo 24:11

Ne zutun ebpemenlepew is mezakel he teruen he etew he egkag̵i is uman sevaha kandan he ebpeneuven sikandin te Megbevayà. Ne mezakel is egkelimbungan dan.

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Mateo 24:5

Su mezakel is ebpenlepew he egamit te ngazan ku ne egkag̵i is kada sevaha zutun he iyan sikandin sikan is mibpilì te Megbevayà he ibpahadì! Ne mezakel is ebpeketuu te menge tarù dan.

Mateo 7:15

Likayi niw is menge ebpeneuven kun te Megbevayà he tarù is ibpenurù dan. Henduen be te hustu sikandan he tumutuu te Megbevayà, iyan, ebpekezezaat is ibpenurù dan.

Marcos 13:22

Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Lucas 12:9

Ne sikan is etew he egkag̵i ziyà te menge etew he kenà a iyan egalen din, ne kenè ku zaan sikandin ed-engkenen diyà te etuvangan te menge velinsug̵uen te Amey ku he ziyà te langit.

Lucas 21:8

Ne midtavak si Jesus te, “Mebpekevantey kew wey kew kenà mekesundan te teruen he etew su mezakel is ebpemenlepew he egamit te ngazan ku he egkag̵i is kada sevaha zutun he iyan sikandin sikan is mibpilì te Megbevayà he ibpahadì. Ne egkag̵i zaan te, ‘Iyan en heini timpu te kedlimasa te Megbevayà te menusiyà,’ ke sikandan. Iyan, kenè niw tuuwi su tarù.

Lucas 6:26

Kehizu niw te edtehuzen guntaan te langun he menge etew su iyan heeyan mid-ulaula zengan te menge kepuun dan diyà te menge kenà tutuu he ebpeneuven te Megbevayà. Umba edtehuzen kew te menge etew su iring kew zutun te menge kenà tutuu he ebpeneuven ne edsilutan kew zaan te Megbevayà.

Ruma 16:18

Su is menge etew he ed-ulaula te iring kayi, kenè dan edtumanen is sug̵ù te Nengazen tew he si Kristu, kekenà, iyan dan edtumanen is kandan he menge suat. Pinaag̵i te ketau zan te kegkag̵i wey pinaag̵i te mekempet he egkeg̵iyen dan, egkeekalan dan is isip te menge paglung he etew.

1 Kurintu 11:19

Kinahanglan buwa he iyan heini egkehitavù keniyu ziyan su wey metueni ke hentei keniyu is egkeserig̵an te Megbevayà.

1 Kurintu 6:20

iyan teg̵ig̵aked kenita is Megbevayà su utew mahal is imbelukas din kenita. Umba, gemita niw is lawa niw te paag̵i he mevantug is Megbevayà.

1 Kurintu 7:23

Utew mahal is imbelukas kenitew te Megbevayà ne tenged kayi kinahanglan he kenè niw iyan sundani is etew zà duen, kekenà, iyan is Nengazen.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Gelasya 3:13

Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

Gelasya 4:17

Haazà is menge etew he kenà tutuu is ibpenurù dan keniyu, ebpurungan kew zan, iyan, kenà meupiya is tuyù dan diyan te keniyu. Egkesuatan dan he maawà is upakat niw kediey su wey iyan niw zà sikandan mepurungi.

Gelasya 5:20

is ked-ezapa te kenà hustu he ed-ezapen, wey is kegemita te g̵ehem he ibeg̵ey ni Setanas. Ebpekigkuntada is menge etew; ebpekidtebek dan; egkesina zan; egkengepauk dan; iyan dà ed-isipen dan is kandan dà he egkesuatan. Ne ed-engkezan dan is kebpekidsevaha zan te menge zuma zan.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Pilipus 3:19

Siguradu egkeimpirnu sikandan su iyan ebayàbayà kandan is menge mezaat he kebayà te lawa zan. Ibmeupiya te g̵ehinawa zan is menge mezaat he ulaula, iyan, meupiya pezem ke igkeeled dan; ne iyan dan dà egkeisip is menge vutang he zini te kelibutan.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

Kulusas 2:8

Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

1 Timoteo 5:8

Su ke zuen tumutuu he kenè din ed-elimahan is menge edsarig kandin, lavew en sikandan he ziyà ed-ubpà te valey zin, mid-engkezan din en is kedtumana zin te tuluuwen tew. Meupiya pa sikan is wazà meketuu kenà sikandin.

2 Timoteo 4:3

Umba idtelaan ku heini kenikew su egkeuma keuzemà is timpu he kenà edewaten te menge etew is tutuu he tuluuwen, kekenà, iyan dan edsunuzen is menge mezaat he kebayè dan. Ebpemepenurù dan te mezakel he menge menenudlù. Ne iyan ibpenurù kayi is tuluuwen he utew zan egkesuati te ebpemineg.

Tito 1:11

Kinahanglan he ibpeengkezan nu kandan is kebpenurù dan su ke zuen sevaha he egketazin is isip din pinaag̵i te kedtuuwi zin kayi he penurù egkesemukan is kebpekid-upakat din te menge zuma zin dutun te pemilya zin. Iyan dà ibpenurua zan dutun te kenà hustu he ibpenurù is wey zan mekepenapì.

Tito 3:10

Ke zuen duma niw he edsemuken din is upakat te menge tumutuu, dewaya nu, ne emun kenà ebpemineg, umani nu zewaya. Ne emun kenè pa zutun ebpemineg engkezi nu sikandin.

Hibriyuhanen 10:29

Ne emun iyan haazà, wey pe be kenà utew meveg̵at is idsilut dutun te etew g̵untaan he edsumpeliten din is hizu kandin te Anak te Megbevayà. Utew meveg̵at is idsilut kandin su igkepesavut din pinaag̵i zutun te mid-ulaula zin he wazà pulus dutun te lengesa ni Jesus he ibpalis pezem kandin he iyan tuus te veg̵u en he paag̵i te kebpekidsevaha te Megbevayà te menusiyà. Meveg̵at is silut kandin su edsumpeliten din is belig̵eg̵awen he Wag̵as he Mulin-ulin.

1 Pedro 1:8

Utew mahal sikandin diyan te g̵ehinawa niw minsan wazè niw pa maahà. Ne edsarig kew kandin minsan pa te kenè niw en sikandin egkeahà guntaan. Ne utew man dekelà is kelipey niw he kenà igkeseysey

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

1 Juan 2:26

Ebpesuratan ku sikiyu wey kew med-andam su zuen menge etew he tarù is ibpetuuwan dan pezem keniyu.

1 Juan 4:1

Menge minahal ku he suled, kenè niw petuluy tuuwi is etew he egkag̵i he mid-ulinan sikandin te Wag̵as he Mulin-ulin. Gezami niw zè pa wey niw metueni ke ebpuun be te Megbevayà is ed-ulin kandin. Umba egkeg̵iyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.

Hudas 1:18

Ke sikandan te, “Keuzemà te ketepusan he menge andew ebpenlepew is menge etew he edsumpalit keniyu. Iyan edtumanen dan is menge kebayè dan he supak te Megbevayà.”

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

Impezayag 13:14

Ne pinaag̵i te menge egkein-inuwan he intug̵ut kandin he ibpeulaula ziyà te etuvangan dutun te nehuna he langgam, ed-ekalan din is tivuuk he menusiyà dini te kelibutan. Ne zutun edsug̵uen din is menge etew he veeli zan is ledawan dutun te nehuna he langgam ne ezapa zan. Haazà is nehuna he langgam, midtibas duen te sundang, iyan, wazà mebpatey.

Impezayag 2:13

Netuenan ku he sakup ni Setanas is inged niw. Ne minsan pa zutun midhemenan niw is kedtuu niw kedì ne wazè niw engkezi is menge penurù ku minsan dutun te kedhimetayi ki Entipas dengan. Metinumanen sikandin he ebpenudtul te menge lalag ku, ne midhimetayan sikandin diyan te inged niw he nesakup ni Setanas.

Impezayag 2:9

Netuenan ku is kegkeantus niw te kemeresayan; netuenan ku he egkengeayuayu kew. Ne minsan pa zutun sepian kew utew pinaag̵i te kedtuu niw. Netuenan ku he kenà benar is id-ituk keniyu te menge etew he egkag̵i he menge Hudiyu zan, iyan, kenà sikandan tutuu he Hudiyu su mibpekid-upakat dan ki Setanas.

Impezayag 3:8

Netuenan ku is menge ulaula niw. Ne minsan pa te pirapira kew zà he leg̵as, metinumanen kew te menge lalag ku ne wazè niw engkezi is kedtuu niw kediey. Umba, is gemawan he ibayè niw, mibpuwasan ku en ne kenè en egkelekevan te minsan hentei, he ke và dà egkeg̵iya, wazè en ebpekesanggen keniyu te ibpeulaula ku keniyu.

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.

Impezayag 6:10

Ne mibpekezag̵ing dan is edhangyù, ke sikandan te, “Sikew is mekeg̵eg̵ehem he Nengazen, wag̵as ka wey metinumanen ka! Sengemenu kelug̵ayad is kebpeketag̵ad dey taman te kenè nu pa ebelesan te silut is menge etew ziyà te kelibutan tenged te kedhimetayi zan kenami?”