2 Pedro 1:3 - Manobo Western Bukidnon

³ Pinaag̵i te g̵ehem te Megbevayà edtevangan kiw zin te mezakel he paag̵i wey kiw meketuman te menge sug̵ù din kayi te ked-ubpè tew zini te kelibutan. Umba egkehimu heini su impekilala en kenitew si Jesu Kristu he iyan mibpetuu kenitew wey kiw mekeambit te ketazeng din wey te utew zin kegkelavew.

2 Pedro 1:3 Кръстосани препратки

Mateo 28:18

Ne mid-uvayan sikandan ni Jesus, ne ke sikandin te, “Imbeg̵ey kedì is ke g̵ehem te kebayàbayà diyà te langit wey zini te tanà.

Ruma 8:32

Su minsan is Anak din he si Jesus, wazè din menug̵uni, kekenà, midsug̵ù din wey mekepehimatey he elili kenita. Ne emun iyan haazà gag̵ew zin kenita, kenà egkehimu he kenè din daan ibeg̵ey kenita is langun he impenaad din kenita.

Ruma 9:24

Iyan ki impetuu zin, iyan, is menge etew he impetuu zin, ne kenà menge Hudiyu zà, kekenà, elin daan is menge etew he kenà menge Hudiyu.

1 Kurintu 1:9

Is Megbevayà, egkeserig̵an tew is lalag din, ne iyan sikandin mibpetuu kenitew wey kiw mebpekid-upakat ki Jesu Kristu he iyan Anak din wey iyan Nengazen tew.

2 Kurintu 12:9

iyan, iyan tavak din kediey is, “Edtevangan ku sikew wey nu maantus ne hustu en. Su zekelà is egkehimu te g̵ehem ku ziyan te kenikew emun wazè nu en egkehimu,” ke sikandin. Ne tenged kayi utew ku egkesuati he idantal ku is kurang ku te ketau su wey a melig-eni te g̵ehem ni Kristu.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Ipisu 4:4

Su sikitew is langun he menge tumutuu, sevaha kiw zà he lawa, ne sevaha zà is Wag̵as he Mulin-ulin he ed-ulin kenitew, ne sevaha zà daan is ebperetengen tew he ketulusan tenged te midhimu kiw he menge tumutuu.

Pilipus 3:8

Ne kenà dutun dà taman is mid-engkezan ku, kekenà, mid-eminan ku engkezi is minsan hengkey he zekelà dini te g̵ehinawa ku su wey ku mekuwa is utew pa lavew he mahal he iyan is kebpekidsevaha ku ki Jesu Kristu te Nengazen ku. Tenged kandin mid-engkezan ku is langun ne mid-isip ku heini he abper zà dini te kelibutan wey a mekepekidsevaha ki Kristu,

Pilipus 4:8

Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

Kulusas 1:16

su pinaag̵i kandin te Anak te Megbevayà midlimbag te Megbevayà is minsan hengkey ziyà te langit wey zini te tanà, sikan is egkeahà te etew wey is kenà egkengeahà he kedesenan he zuen dan keg̵ehem, wey kebayàbayà, wey kedhadì. Is Anak, mibpeveelan kandin te Amey zin he Megbevayà is minsan hengkey su wey zin meg̵amit heini is minsan hengkey he linimbag din.

1 Tiselunika 2:12

Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

1 Tiselunika 4:7

Su nehimu kiw te Megbevayà he menge tumutuu kandin su wey mehimu is menge ulaula tew he zait te etew he g̵aked din. Kenà iyan din egkesuatan he meremerik is menge ulaula tew.

2 Tiselunika 2:14

Midhimu kew zin he menge tumutuu kandin pinaag̵i te kebpesevuta zey keniyu te Meupiya he Tudtulanen su wey kew mekeambit te utew kegkelavew te Nengazen tew he si Jesu Kristu.

1 Timoteo 4:8

Duen deisek he pulus te kedlumbaza te lawa, iyan, utew zekelà is pulus te kedlumbaza te kedtuu ta su iyan ibmeupiya te kebpekesavuk tew minsan guntaan wey lavew en keuzemà ke ziyà ki en te langit.

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

Hibriyuhanen 1:3

Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.

1 Pedro 1:15

Ne g̵untaan kinahanglan he wazà igkesewayi te menge ulaula tew iring te wazà igkesewayi te menge ulaula te Megbevayà he iyan nengelintau wey kiw meketuu.

1 Pedro 1:5

Kenitew en haazà is integ̵ana zin. Tenged te nekesarig kiw kandin, nelig-enan kiw te g̵ehem te Megbevayà te kemulu kiw pa edtag̵ad te kedtulusa zin kenitew keuzemà te ketepusan he timpu.

1 Pedro 2:21

Nekeantus si Kristu te merasey wey ki melibri te silut. Ne nehimu sikandin he petug-iringan he kinahanglan he edsunuzen ta. Umba mibpetuu kenitew is Megbevayà su wey tew si Kristu meiringi.

1 Pedro 2:9

Iyan, sikitew mulà, pinilì kiw zin. Menge memumuhat kiw te mibpilì he hadì he iyan si Kristu. Iyan kiw menge sakup din; iyan kiw menge g̵aked din he etew. Umba mibpilì kiw zin su wey tew mesangyew is tudtul te utew egkein-inuwan he menge vaal zin. Iyan sikandin nengelintau wey kiw meketuu wey kiw maawà dutun te kerusireman. Ne g̵untaan edteyawan kiw zin, he ke và dà egkeg̵iya, utew en meupiya is kedtuvazi zin kenitew.

1 Pedro 3:9

Ke zuen ebpesipala keniyu kenè niw velesi te mezaat. Ke zuen edrawak keniyu kenè niw zaan penrewaki, kekenà, belesi niw te meupiya. Su umba midhimu kew te Megbevayà he menge tumutuu su wey kew zin metuvazi te meupiya.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

2 Pedro 1:10

Menge suled, geina te mibpilì kiw ne midhimu kiw te Megbevayà he menge tumutuu kandin, edhimuwen tew is taman te egkehimu tew wey maahà he tutuu iyan is kebpilia zin kenitew wey is kedhimuwa zin kenitew he menge tumutuu zin. Su emun iyan heini ed-ul-ulahan tew kenè kiw ebpekesuwey te hustu he ibayà,

2 Pedro 1:2

Berakat he ikeg̵ag̵ew kew utew te Megbevayà wey mebmelinawen is gehinawa niw pinaag̵i te kegkesevuta niw te Megbevayà wey te Nengazen tew he si Jesus.

2 Pedro 1:5

Ne g̵eina te iyan heini intavang din kenitew kinahanglan he edhimuwen ta is taman te egkehimu ta su wey meheg̵eti is kedtuu ta kandin te menge meupiya he ulaula. Ne is menge meupiya he ulaula, kinahanglan he edheg̵etan ta te kegkesevuta te hustu.

2 Pedro 1:6

Ne is kedsavut, edheg̵etan ta te edtengkaan he ed-ul-ulahan. Ne haazà daan, edheg̵etan ta te kebmeinentusen. Ne is kebmeinentusen, edheg̵etan ta te kebpevayàbayè ta te Megbevayà.

2 Pedro 1:8

Ne emun ed-iseg layun is ked-ul-ulaha niw kayi te langun, kenà egkehimu he kenà utew zekelà is pulus te kedtuuwi niw te Nengazen tew he si Jesu Kristu.

2 Pedro 2:20

Ke zuen menge etew he nekesavut en mehitenged te Nengazen tew he si Jesu Kristu, egkelibri zan en pezem te mezaat he ulaula zini te kelibutan he ebpekezezaat kandan. Iyan, ke egkepenulayan sikandan ne edlikuan dan en maan haazà is daan he kegkeuripena kandan te mezaat he ulaula, tuwas pa he merasey is egketemanan dan.

2 Pedro 3:18

Kinahanglan he pinaag̵i te kegkeg̵eg̵awi keniyu te Nengazen tew wey Menluluwas tew he si Jesu Kristu, med-iseg is kedsevuta niw te ibpesavut din. Berakat he iyan sikandin edelig̵en guntaan wey te wazà pidtemanan.