2 Kurintu 7:11 - Manobo Western Bukidnon

¹¹ Iyan, sikiyu, susiya niw is meupiya he nehimu te Megbevayà pinaag̵i te kegkeseeng niw. Su pinaag̵i kayi mid-iseg en is kebpurungi niw te ulaula niw. Dekelà diyà te g̵ehinawa niw he metueni te menge etew he wazè dey igkesawey te menge ulaula niw. Utew niw ingkeepes haazà is mid-ulaula zuen te nekesalà. Utew niw ingkehandek haazà su kela ke mekeragkes kew ke edsilutan sikandin te Megbevayà. Ne utew kew zaan mibulung kediey, ne mid-iseg is kedtumana niw te menge sug̵ù ku keniyu. Ne kenà dutun dà taman su segugunè niw midsiluti sikan is etew he mid-ulaula te mezaat. Ne ingkepeehè niw he wazà keniyu he salà dutun te neulaula zin.

2 Kurintu 7:11 Кръстосани препратки

Marcos 3:5

Ne te ebpenlangulangu si Jesus dutun te mezakel he menge etew, utew zin egkepeuki sikandan ne utew zaan mibmesakit is gehinawa zin su haazà is menge etew, wazè dan kehizu. Ne zutun migkeg̵iyan din haazà is etew he nezeetan is belad din te, “Ketenga nu, Mama, is belad nu.” Ne migketeng dutun te etew haazà is belad din ne segugunà neulii.

Juan 2:17

Ne zutun netenuzan te menge sumusundan din is ingkesurat dengan he tagnà he edhenduen te, “Utew zekelà is kegkenug̵uni ku te valey nu te Megbevayà umba egkehimu he ibmesakit utew te g̵ehinawa ku.”

Nengeulaula 17:16

Ne zutun te kedteg̵azi ni Pablo ki Silas wey ki Timoteo ziyà te Etinas, utew neseeng sikandin su neehè din he utew mezakel is menge ledawan he edsimbahan te menge meg̵inged dutun.

Ruma 11:20

Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw.

Ruma 14:18

Ne ke pinaag̵i kayi edsundanan ta si Kristu, igkesuat ki utew te Megbevayà, ne egkesuatan daan te menge etew is menge ulaula ta.

Ruma 3:5

Ne zuen menge pilusupu he etew he egkag̵i te, “Emun ed-ulaula ki te mezaat, meupiya zaan haazà su emun egkeisip te menge etew is menge ulaula ta he mezaat, wey is menge ulaula te Megbevayà, siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà, ne utew haazà meupiya. Ne emun,” ke sikandan, “nehimu is meupiya tenged te mezaat he mid-ulaula ta, kenà metazeng is kedsiluti kenita te Megbevayà tenged te mid-ulaula ta he mezaat.” Ne pilusupu is menge lalag he iring kayi.

1 Kurintu 12:25

Midhimu te Megbevayà is menge parti te lawa ta su wey zan mesevaha ne pinaag̵i zutun ebpekedtetevangè dan.

1 Kurintu 5:2

Ne minsan pa zutun kemulu kew pa ebpegalbu. Kunaan niw vuwa ke utew meupiya is ulaula niw! Deyzey pezem ke egkeseeng kew. Kinahanglan pezem he wazè niw tug̵uti heeyan is maama he mebpekiduma keniyu.

2 Kurintu 13:7

Id-ampù dey ziyà te Megbevayà he wazà ulaula niw he mezaat. Ne kenè dey iyan id-empua keniyu su wey metueni te menge etew he edtumanen niw is impenurù dey keniyu su maambe ke kenè niw ed-isipen he epustul key ni Kristu, asal, ed-ul-ulahan niw is hustu.

2 Kurintu 2:6

Netengkaan en, menge suled, is kedsiluti niw kandin.

2 Kurintu 6:4

Ne umba ebpurungan dey is ulaula zey su wey zey ikepaahà he menge sulug̵uen key te Megbevayà te minsan hengkey he paag̵i. Ne tenged kayi ed-antus key te minsan hengkey he kemereg̵enan, kemeresayan, wey menge samuk.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

2 Kurintu 7:7

Ne kenà iyan dà ingkelipey zey is keg̵alew zey ki Tito, kekenà, elin daan is tudtul zin he utew sikandin nelipey mehitenged keniyu. Netudtul zin he egkesuatan niw utew he mekepenumbaley a ziyan. Netudtul zin daan he ebuyù kew te pesaylu zini te kediey. Ne elin daan tudtul zin is: dekelà te g̵ehinawa niw is kedtumana niw te egkesuatan ku. Ne tenged kayi utew zekelà is kelipey ku.

2 Kurintu 7:9

Ne g̵untaan nelipey ad, kenà tenged te neseeng kew, kekenà, tenged te mibpurungan niw is menge ulaula niw pinaag̵i zutun te kegkeseeng niw. Ne haazà is kegkeseeng niw, himan te Megbevayà umba inmeupiya niw haazà is surat dey.

2 Kurintu 9:2

su netuenan ku he zekelà is gustu niw te kedtavang. Migkeg̵iyan ku is menge tumutuu he tigMesidunya he layun dekelà is gustu niw te kedtavang. Migkag̵i ku kandan he puun pa zutun te nehuna he tuig daan naandam is gehinawa niw te menge tigGerisya te kebeg̵ey. Ne is kezekelan kandan, hein nezineg dan heini, mid-iseg is gustu zan te kedtavang daan.

Ipisu 4:26

Emun duen igkepauk niw tigkera niw is gehinawa niw su kela ke ibpekesalè niw. Ne kinahanglan he te kenè pa edsanlep is andew iawè niw en is pauk te isip niw.

Ipisu 5:11

Is menge etew he kemulu pa ziyà te kerusireman, kenè kew medtampu kandan te ed-ulaula te menge vaal he wazè din pulus, kekenà, ipeehè niw he mezaat is menge vaal zan.

Pilipus 2:12

Ne umba, menge suled, iring te layun kew ebpememineg te menge sug̵ù ku, ne kenà dutun dà te kebpekiduma ku keniyu, kekenà, minsan te wazà a ziyan te keniyu, ne iring din ded daan guntaan kinahanglan is uman sevaha keniyu, ne himuwa zin is taman te egkehimu zin he edumahan te kegkehandek te Megbevayà su wey mepasad haazà is nepuunan en te Megbevayà te kedlibriya zin keniyu te silut.

1 Tiselunika 4:6

Kinahanglan he wazà minsan hentei he ebpekesalà wey ed-akal te zuma zin pinaag̵i te menge ulaula he iring kayi. Su edsilutan te Megbevayà is ed-ulaula te iring dutun. Heini impurung dey ipenurù keniyu.

1 Timoteo 5:20

Is ebmeg̵urangen he layun ebpekesalà, sewaya nu ziyà te etuvangan te menge tumutuu su wey mahandek is menge zuma he ebmeg̵urangen.

2 Timoteo 2:15

Himuwa nu is taman te egkehimu nu su wey mesuati te Megbevayà ne wey kenè nu ikeeled is baal nu. Kinahanglan he utew hustu is kebpenurua nu te tutuu he tuluuwen.

Tito 3:8

Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

Hibriyuhanen 4:1

Ne minsan pa zutun, wazà iawà te Megbevayà is daan he penaad din he zuen menge etew he ebpekeseled dutun te inged din wey zan mekehimeley zuma kandin. Ne tenged kayi kinahanglan he ebpekeandam kiw su wey wazà minsan sevaha kenitew he kenà edtug̵utan te Megbevayà he mekeseled dutun.

Santiago 3:17

Is etew he ziyà ebpuun te Megbevayà is ketau zin, wazà igkesewayi kandin. Melinew is kedepitè din te zuma he etew, ebpurungan din is menge zuma zin; kenà sikandin mevurut, kekenà, mepezumdumahan. Hihizuwen wey metulanged sikandin; wazè din ibpelavi he minsan hentei ne kenà uvag dà is kedtuu zin.

1 Pedro 1:17

Ne g̵eina te mibpetavang ki te Amey ta he Megbevayà kinahanglan he utew meheg̵et is kedtehuza ta kandin te zini ki pa ed-ubpà te kelibutan. Iyan sikandin edsusi te menge ulaula te menusiyà sumalà is mid-ulaula te kada sevaha ne wazè din ibpelavi he minsan hentei.

1 Pedro 2:2

Ed-iring ki zuen te vatà he kemulu pa edsusu he layun egkesuat te g̵atas. Kinahanglan he layun ki ed-inum te g̵atas he iyan is wag̵as he Lalag te Megbevayà su wey layun mebmezesen is kedtuu ta taman te timpu keuzemà he edtulusen ki te Megbevayà.

Hudas 1:23

Tevangi niw sikandan wey zan melibri te silut, iring te kedsekelawa niw ziyà te hapuy te egketutung. Is menge zuma he utew zekelà is salè dan, ipeehè niw zaan kandan is hizu niw, iyan, andam kew su kela ke mepenulayi kew zaan pinaag̵i te meremerik he ulaula zan.

Impezayag 3:19

Is langun he menge etew he mahal zini te g̵ehinawa ku, edsewayan ku wey edsilutan ku su wey mepenurù sikandan. Ne tenged dutun purungi niw is ulaula niw wey iniyug̵i niw is ulaula niw he mezaat.