2 Kurintu 7:10 - Manobo Western Bukidnon

¹⁰ Su is kegkeseeng he egemiten te Megbevayà, egkehimu he igkehalin te g̵ehinawa te etew su wey melibri sikandin te silut. Ne kenà heini engayan he ibpekedsendit ta, iyan, is kegkeseeng te menge etew he kenà edsundan te Megbevayà, kenà igkehalin te g̵ehinawa zan ne tenged kayi kenà sikandan egkeveg̵ayan te untung he wazè din pidtemanan.

2 Kurintu 7:10 Кръстосани препратки

Mateo 26:75

Ne human metenuzi ni Pedro sikan is migkag̵i kandin ni Jesus he, “Te kenè pe kan ebpengukarà is manuk, ne ketetelu ke en ebpekekag̵i he kenà a kenikew egkekilala.” Ne zutun migawas si Pedro ne nekelelendag.

Lucas 15:10

Ne migkag̵i si Jesus med-uman te, “Egkeg̵iyen ku keniyu he iring kayi is kedlipey ziyà te langit te menge velinsug̵uen te Megbevayà emun duen sevaha he mesinupaken he ed-iniyug̵an din is memezaat he ulaula zin.”

Lucas 18:13

Iyan, haazà is sevaha he etew he menunukut te vuhis, ne mibpekeziyù sikandin is ebpekezuzungul ne egkepenempaling din is kumeng din su utew neseeng. Ne mid-ampù sikandin diyà te Megbevayà he egkag̵i te, ‘Megbevayà, ikehizu a utew kenikew is sevaha he etew he mekesesalà!’ ”

Nengeulaula 11:18

Ne hein nezineg te menge tumutuu he Hudiyu haazà is ketezengan ni Pedro, mid-engkezan dan is kedsewaya zan kandin ne midalig dan is Megbevayà su ke sikandan te, “Mibulusan en bes te Megbevayà is menge kenà Hudiyu wey zan daan meiniyug̵i is mezaat he ulaula wey zan mezawat is untung he wazà pidtemanan.”

Nengeulaula 3:19

Ne g̵untaan kinahanglan he ed-iniyug̵an tew en is memezaat he ulaula. Ed-empuan tew is Nengazen ne ebpeseyluwen kiw zin te menge salè tew. Ne zutun duen timpu he ebeg̵ayan is gehinawa tew te zesen he ziyà ebpuun te kandin.

2 Kurintu 12:21

Egkesemukan a su kela ke zutun te kebpekeuma ku ziyan ne igkeeled ku sikiyu ziyà te Megbevayà ne kela ke utew a egkeseeng tenged te mezakel he netuenan ku zengan he nekevaal te mezaat ne wazè dan pa engkezi is menge mahawag he ulaula zan iring te kedhilavet te kenè dan esawa wey is kedtumana zan te mezaat he kebayè dan.

2 Kurintu 7:9

Ne g̵untaan nelipey ad, kenà tenged te neseeng kew, kekenà, tenged te mibpurungan niw is menge ulaula niw pinaag̵i zutun te kegkeseeng niw. Ne haazà is kegkeseeng niw, himan te Megbevayà umba inmeupiya niw haazà is surat dey.

Hibriyuhanen 12:17

Ne neug̵et dutun neisip din he meupiya ke iyan sikandin is kakey penubtuvazi te amey zin wey metuvazi sikandin te Megbevayà, iyan, wazà mehimu su kenè en egkehimu he edhewien din pa maan is inliwè din en, minsan pa te nekesineg̵ew sikandin is edhangyù.