2 Kurintu 6:7 - Manobo Western Bukidnon

⁷ ibpenurù dey is tutuu he Lalag te Megbevayà ne edtevangan key te g̵ehem te Megbevayà. Pinaag̵i kayi te langun egketuusan he menge sulug̵uen key te Megbevayà. Iyan kelasag dey wey lembitan dey is metazeng he ulaula.

2 Kurintu 6:7 Кръстосани препратки

Marcos 16:20

Ne zutun nemenhipanew is menge sumusundan te Nengazen he si Jesus ne impesavut dan is Meupiya he Tudtulanen diyà te minsan hendei. Ne is gehem te Megbevayà, mid-ug̵up kandan su nemekehimu zan te menge egkengein-inuwan su wey memeketuu is menge etew zutun te ibpesavut dan.

Nengeulaula 11:21

Ne midtevangan te Megbevayà sikandan is mibpenudtul su utew mezakel he etew is neketuu te Nengazen tew he si Jesus ne midtuman dan is menge sug̵ù din.

1 Kurintu 1:24

Iyan, is minsan hentei, Hudiyu se Gerisyahanen, emun ebpemineg dan te Megbevayà dutun te kebpetuuwa zin kandan, netuenan dan he pinaag̵i te kedrensanga ki Kristu impezayag te Megbevayà is gehem din wey ketau zin.

2 Kurintu 13:4

Su minsan ke henduen be te wazà egkehimu ni Kristu zutun te kedrensanga kandin diyà te krus, nevanhew zed sikandin ne zuen din en beg̵u en he untung pinaag̵i te g̵ehem te Megbevayà. Ne sikami zaan, henduen be te wazè dey egkehimu su layun key zaan ebpekeantus te kemeresayan, iyan, pinaag̵i te g̵ehem te Megbevayà he edtavang kenami, duen dey zaan beg̵u en he untung ne ebpeketavang key pa keniyu.

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

2 Kurintu 7:14

Indantal ku sikiyu ziyà te ki Tito ne wazà mebperis is kedentala ku keniyu. Layun tutuu is egkeg̵iyen dey keniyu ne iring din ded daan, benar is migkag̵i ku ziyà te ki Tito mehitenged keniyu.

Ipisu 1:13

Ne iring din ded daan diyan te keniyu su hein impesavut keniyu is tutuu he tuluuwen he iyan kes Meupiya he Tudtulanen mehitenged te kedlibriya kenitew te silut, nemeketuu kew ki Kristu, ne midhimu kew zaan te Megbevayà he menge sakup din pinaag̵i te kebeg̵aya zin keniyu te Wag̵as he Mulin-ulin he zaan he impenaad din.

Ipisu 3:20

Edelig̵en tew is Megbevayà su, pinaag̵i te zekelà he g̵ehem din he impelumun din dini te kenitew, utew zekelà is egkehimu zin su lavew pa is egkehimu zin, kenà te minsan hengkey he egkeisip ta he ebuyuen.

Ipisu 4:21

Tutuu iyan he impesavut keniyu is keag̵i ni Kristu ne impesavut daan keniyu is tutuu he tuluuwen he impenurù din.

Kulusas 1:5

Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

2 Timoteo 2:15

Himuwa nu is taman te egkehimu nu su wey mesuati te Megbevayà ne wey kenè nu ikeeled is baal nu. Kinahanglan he utew hustu is kebpenurua nu te tutuu he tuluuwen.

2 Timoteo 4:7

Nepasad ku en is kebenggaa kedì te Megbevayà; nekeuma ad te edungguan te edlumbà. Hustu is ked-ikula ku te tutuu he tuluuwen.

Hibriyuhanen 2:4

Ne is Megbevayà, midtistig̵usan din daan haazà is impenurù dan su mibeg̵ayan din sikandan te g̵ehem wey zan ikepaahà is menge singyal, wey menge egkein-inuwan he kenà ed-iring-iring. Ne zuen daan menge ketau he imbeg̵ey zin diyà te menge tumutuu pinaag̵i te ked-ulini kandan te Wag̵as he Mulin-ulin sumalà is egkesuatan din he ebeg̵ayan.

Santiago 1:18

Tenged te iyan egkesuatan din midhimu kiw zin he menge anak din pinaag̵i te kebpesevuta zin kenitew te tutuu he tuluuwen. Egkesuatan din he iyan kiw edhimuwen din he lavew te langun he menge linimbag.