2 Kurintu 6:5 - Manobo Western Bukidnon

⁵ Mibug̵el key, mibpirisu key, mibpesipelahan key te edsinamuk. Duen timpu he utew subra is terebahu zey ne nepurang key ne nevitil key zaan.

2 Kurintu 6:5 Кръстосани препратки

Mateo 14:10

Ne mibpepungelan din si Juan te ulu ziyà te pirisuwan.

Mateo 14:3

Ne iyan hinungdan te kegkehimetayi ki Juan, su midsawey zin si Hirudis he migkag̵i te, “Nekesupak ka te kesug̵uan su mid-esawa nu si Hirudyas,” ke sikandin. Ipag ni Hirudis si Hirudyas, su esawa te hazi zin he si Felipe. Ne tenged dutun te kedsewaya kandin ni Juan impezakep ni Hirudis si Juan ne mibpirisu zin. Edhimetayan din pezem si Juan, iyan, egkehandek te menge Hudiyu su netuenan dan he ebpeneuven si Juan te Megbevayà.

Mateo 9:15

Ne migkag̵i si Jesus diyà te kandan te, “Penenglitan, ke zuen eseweey kenà egkehimu he kenà edlipey is menge zuma te ebpengesawa ke kemulu zan pa zuma haazà is ebpengesawa. Ne zutun te timpu he ibpaawè en diyà te kandan sikan is ebpengesawa, human sikandan edsalang egkaan. Iring din ded daan is menge sumusundan ku su te kemulu e pa zini te kandan, kenè dan edsalang egkaan.”

Nengeulaula 13:3

Ne mid-uman dan medsalang te egkaan ne mid-ampù dan diyà te Megbevayà, ne zutun indepenet dan is belad dan ki Bernabe wey ki Seulu ne impeg̵enat dan sikandan.

Nengeulaula 14:19

Ne nekeuma is menge Hudiyu he tig-Entiyukya ziyà te prubinsya he Pisidya wey elin dutun is menge Hudiyu he tig-Ikunya. Midhimu zan he mengepauk engki Pablo haazà is menge etew. Midtuleng dan si Pablo te vatu ne miguyud dan in-awà dutun te inged su kunaan dan ke minatey en.

Nengeulaula 14:23

Diyà te kada iglisya, he ke và dà egkeg̵iya, gurupu te menge tumutuu, midtezù ensi Pablo te menge ebmeg̵urangen. Midsalang dan egkaan is ed-ampù; ne is menge sumusundan dutun, insarig ni Pablo wey si Bernabe ziyà te Nengazen he midtuuwan dan.

Nengeulaula 17:5

Ne zutun, nengesina engki Pablo is menge Hudiyu ne midtig̵um dan is mezakel he menge tepulan he wazà menge pulus he etew. Ne mid-eneb dan is tivuuk he inged te edsinamuk. Midhendiyè dan te valey ni Jason su edteg̵elen dan egkuwaa si Pablo wey si Silas su wey zan meuwit diyà te menge etew.

Nengeulaula 20:31

Ne tenged kayi mebpekevantey kew; kenè niw lipati he seled te tetelu he tuig, andew se mezukilem, mid-em-eminan ku sikiyu te penurù. Mibpenig̵is is menge luhè ku tenged te hizu ku keniyu.

Nengeulaula 23:10

Ne mid-iseg dutun is kegkesumpakì dan ne tenged dutun insug̵ù te kepitan diyà te menge sundaru zin he eg̵awa zan si Pablo zutun te menge etew wey iulì diyà te kutà. Su nahandek sikandin su kela ke pitaspitasa zan si Pablo.

Nengeulaula 23:35

migkag̵i haazà is gubirnedur te, “Wey ku en edsusiya is insumbunga kenikew ke ebpemekeuma is midsumbung.” Ne zutun, impeventayan din te sundaru si Pablo ne ziyè din isavuk te turug̵an ni Hadì Hirudis.

Nengeulaula 24:27

Ne hein dezuwa en he tuig dutun nekeilis si Pursyu Pistu ki Felix he gubirnedur. Ne si Felix, geina te egkesuatan din he wazà ibmezaat te g̵ehinawa te menge Hudiyu kandin, wazè din libriya si Pablo.

Nengeulaula 26:10

Iyan heini mid-ulaula ku ziyà te Hiruselim. Mibeg̵ayan a te menge punuan te menge memumuhat te keg̵ehem ne mibpirisu ku is mezakel he menge tumutuu te Nengazen. Ne hein neisip te menge ebmeg̵urangen dey he zait sikandan he edhimetayan, mid-uyun a zutun.

Nengeulaula 26:29

Ne ke si Pablo te, “Sikew wey is langun he ebpemineg kedì guntaan kayi, id-ampù ku te Megbevayà he menaney se meg̵aan, himuwa kew zin he iring kedì, iyan, kenè kew mulà mepirisu!”

Nengeulaula 28:30

Ne seled te zezuwa pa he tuig dutun, diyà med-ubpà si Pablo te valey he mibpilitiyan din ne impepemenahik din is minsan hentei he ebpenumbaley ziyà te kandin.

Nengeulaula 5:18

ne midakep dan is menge epustul ne mibpirisu zan.

1 Kurintu 15:10

Iyan, utew zekelà is hizu kediey te Megbevayà. Umba nehimu a he epustul su zuen pulus te kegkehizuwi zin kediey. Tenged kayi, dekelà is nehimu ku kenà te nehimu te langun he menge zuma ku he epustul, asal, kenà a iyan is nekehimu kayi, kekenà, nehimu heini is langun pinaag̵i te tavang te Megbevayà.

1 Kurintu 4:11

Sikami, minsan guntaan, egkealang-alang key te egkeenen dey wey ed-inumen dey; ebpemug̵elen key ne minsan is hustu he ugelingen dey, ne wazà. Ne minsan is ed-ubpaan dey ne wazà daan.

1 Kurintu 7:5

Kenè niw iengked is lawa niw ziyà te esawa niw. Iyan, para kenà mesamuk is ked-ampù niw egkehimu he iengked niw emun neuyunan niw, asal taman dà te egkepipira he andew. Ne emun egketapus haazà is neuyunan niw, ne kinahanglan he ebpehulizè kew en maan su kela ke kenè niw meeg̵en is suat niw ne egkepenulayan kew ni Setanas.

2 Kurintu 11:27

Midhag̵ù a is edterebahu; layun a egkepurang; layun a egkevitil; ne layun a egkemezahi. Layun a kurang te egkeenen wey layun a egkealang-alang te egkeubpaan wey ugelingen.

Ipisu 3:1

Ne tenged kayi te langun, siak si Pablo, is pirisu tenged te kedsundan ku ki Jesu Kristu, layun ku sikiyu id-ampù diyà te Megbevayà. Umba nepirisu a su insangyew ku is Lalag te Megbevayà diyan te keniyu te kenà menge Hudiyu.

Pilipus 1:13

Su is langun he menge sundaru he guwardya zini te turug̵an te hadì wey is minsan hentei pa kayi, ne netuenan dan he mibpirisu a tenged dà te sulug̵uen a ni Kristu.

1 Tiselunika 2:9

Menge suled, kenè niw vuwa egkelipatan is kedhag̵ù dey ziyan te kebaal. Su hein impesavut dey keniyu is Meupiya he Tudtulanen he ebpuun te Megbevayà, mibpenigudu key zaan medhag̵ù te maandew se mezukilem wey key mekekuwa te keuyag̵an dey wey key kenà mekesamuk keniyu.

1 Timoteo 4:10

Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

2 Timoteo 1:8

Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

2 Timoteo 2:9

Ne tenged kayi te kebpenudtul ku te Meupiya he Tudtulanen midrasey a te menge kuntada te Megbevayà ne neeg̵en a te kedina he iring te mesinupaken, iyan, kenà mulà egkeeg̵en is Lalag te Megbevayà.

2 Timoteo 4:5

Iyan, sikew mulà, tengkai nu is ed-ul-ulahan nu te minsan keenu he timpu. Entusa nu is kemereg̵enan. Peniguduwi nu te edsangyew is Meupiya he Tudtulanen. Purungi nu tumana is langun he ebpeveelan kenikew te Megbevayà.

Hibriyuhanen 11:36

Duen pa tumutuu zengan he utew mid-eled-eled ne mibug̵el, ne is duma pa ne midhiketan ne mibpirisu.

Hibriyuhanen 13:17

Tumana niw is sug̵ù te menge egalen niw te menge tumutuu ne ipeehè niw is kedtehuza niw kandan su iyan sikandan ed-elima keniyu te edtuu, ne zuen timpu keuzemà he edsusiyen te Megbevayà ke metinumanen dan be is ed-elima keniyu. Emun ebpemineg̵en niw is sug̵ù dan, utew ibmeupiya te g̵ehinawa zan is baal zan. Ne emun kenè kew ebpemineg, utew mereg̵en is baal zan ne egkehimu zaan heini he idlised niw.

Hibriyuhanen 13:23

Iyan daan tudtul ku keniyu is: impeg̵awas en te pirisuwan is suled tew he si Timoteo. Emun petuluy ebpekeuma sikandin dini edumahan ku ke ebpekehendiyan a.

Impezayag 2:10

Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.