2 Kurintu 6:4 - Manobo Western Bukidnon

⁴ Ne umba ebpurungan dey is ulaula zey su wey zey ikepaahà he menge sulug̵uen key te Megbevayà te minsan hengkey he paag̵i. Ne tenged kayi ed-antus key te minsan hengkey he kemereg̵enan, kemeresayan, wey menge samuk.

2 Kurintu 6:4 Кръстосани препратки

Lucas 21:19

Hamen kew is edsarig kediey su pinaag̵i kayi egkeangken niw is untung he wazà pidtemanan.”

Juan 16:33

Umba migkag̵i ku keniyu heini is langun su wey mebmelinawen layun is gehinawa niw tenged kediey. Dini te kelibutan ebpesipelahan kew te menge etew he kuntada ku, iyan, kenè kew mahandek su nezaag ku en sikan is egalen te menge kuntada ku!”

Nengeulaula 2:22

Ne mid-uman megkag̵i si Pedro te, “Sikiyu is menge zuma ku he kevuwazan ni Israyil, pemineg̵a niw is egkeg̵iyen ku. Si Jesus, kes tigNeserit, sug̵ù sikandin te Megbevayà. Impesavut kenitew te Megbevayà he sug̵ù din si Jesus pinaag̵i te g̵ehem din wey menge egkein-inuwan wey menge singyal he mibpeveelan kandin te Megbevayà. Netuenan niw en heini is egkeg̵iyen ku su neulaula heini is langun dini te inged niw.

Nengeulaula 20:34

Netuenan niw he mibpenigudu a medterebahu wey ku mekuwa is menge kinahanglan dey te menge zuma ku.

Nengeulaula 9:16

Ne ibpesavut ku kandin he mezakel is menge kemereg̵enan he egkeeg̵iyan din tenged te sulug̵uen ku sikandin.”

Ruma 14:18

Ne ke pinaag̵i kayi edsundanan ta si Kristu, igkesuat ki utew te Megbevayà, ne egkesuatan daan te menge etew is menge ulaula ta.

Ruma 16:10

Ipengemusta a ki Epilis. Netuenan te langun he metinumanen sikandin te menge sug̵ù ni Kristu. Ipengemusta a te pemilya ni Eristubulu.

Ruma 3:5

Ne zuen menge pilusupu he etew he egkag̵i te, “Emun ed-ulaula ki te mezaat, meupiya zaan haazà su emun egkeisip te menge etew is menge ulaula ta he mezaat, wey is menge ulaula te Megbevayà, siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà, ne utew haazà meupiya. Ne emun,” ke sikandan, “nehimu is meupiya tenged te mezaat he mid-ulaula ta, kenà metazeng is kedsiluti kenita te Megbevayà tenged te mid-ulaula ta he mezaat.” Ne pilusupu is menge lalag he iring kayi.

Ruma 5:8

Iyan, is Megbevayà mulà, impeehè din is gag̵ew zin kenitew su mibpehimatey si Kristu he elili kenitew zutun te timpu zengan te kemulu kiw pa ed-ulaula te mezaat.

1 Kurintu 3:5

Isipa niw man heini. Siak si Pablo, hentei a? Ne hentei zaan si Epulus? Sulug̵uen key zà te Megbevayà. Pinaag̵i kenami midhimu zin he meketuu kew. Edtumanen dey zà is ebpeveelan din kenami. Ne iyan dà ed-ul-ulahan dey.

1 Kurintu 4:1

Ne sikami is ebpenurù, kinahanglan he isipa key keniyu he menge sulug̵uen dà ni Kristu. Insarig te Megbevayà kenami is kedseysaya te langun he menge in-eles din dengan he tuluuwen.

1 Kurintu 9:11

Ne iring din daan, is impemula zey ziyan te keniyu, ne zuen pulus din te wazà pidtemanan. Ne kenè be egkehimu he zuen ebpeebuten dey ziyan te keniyu he igkeuyag dey he kayi zà te kelibutan is pulus din?

2 Kurintu 11:23

Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

2 Kurintu 11:27

Midhag̵ù a is edterebahu; layun a egkepurang; layun a egkevitil; ne layun a egkemezahi. Layun a kurang te egkeenen wey layun a egkealang-alang te egkeubpaan wey ugelingen.

2 Kurintu 11:9

Ne hein diyan a te keniyu ke zuen kinahanglan ku he selapì, wazè ku vuyua ziyan te keniyu su is menge suled tew he ebpuun diyà te prubinsya he Mesidunya, imbeg̵ey zan kedì is minsan hengkey he egkinehenglanen ku. Sikiyu is tigGerisya, wazè ku pa sikiyu vuyui te igkeuyag ku, ne kenà daan egkehimu he ebuyù a ziyan te keniyu te minsan keenu he timpu.

2 Kurintu 12:10

Ne meupiya en utew te g̵ehinawa ku is kurang ku te ketau, is kedsumpelita wey is pesipala kediey te menge etew, wey is menge kemereg̵enan wey is kemeresayan tenged te kedtuu ku ki Kristu. Su netuenan ku he emun wazè en kediey he ketau, dekelà is ibeg̵ey kediey ni Kristu he ketau.

2 Kurintu 12:12

Ne hein diyan a te keniyu impeehè ku keniyu he tutuu a he epustul ni Kristu su minsan nereg̵enan a, mid-antus a su wey ku ikepaahà is menge singyal wey menge egkengein-inuwan he iyan tuus te tutuu he epustul.

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 3:6

Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

2 Kurintu 4:17

Ne heini is menge kemeresayan he egkeantus dey g̵untaan, ne meg̵aan dà utew, iyan, tenged te ked-antus dey kayi zuen egkeperateng dey he utew zekelà he kegkelavew he ibeg̵ey kenitew keuzemà. Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

2 Kurintu 4:8

Layun key ebpekeag̵i te kemereg̵enan, iyan, kenà egkeawà is kedsarig dey. Henduen be te wazè dey en layun paag̵i, iyan, edsarig key g̵ihapun te tavang te Megbevayà.

2 Kurintu 7:11

Iyan, sikiyu, susiya niw is meupiya he nehimu te Megbevayà pinaag̵i te kegkeseeng niw. Su pinaag̵i kayi mid-iseg en is kebpurungi niw te ulaula niw. Dekelà diyà te g̵ehinawa niw he metueni te menge etew he wazè dey igkesawey te menge ulaula niw. Utew niw ingkeepes haazà is mid-ulaula zuen te nekesalà. Utew niw ingkehandek haazà su kela ke mekeragkes kew ke edsilutan sikandin te Megbevayà. Ne utew kew zaan mibulung kediey, ne mid-iseg is kedtumana niw te menge sug̵ù ku keniyu. Ne kenà dutun dà taman su segugunè niw midsiluti sikan is etew he mid-ulaula te mezaat. Ne ingkepeehè niw he wazà keniyu he salà dutun te neulaula zin.

Kulusas 1:11

Ne ibeg̵ey zin keniyu is dekelà he g̵ehem he ebpuun te zekelà he g̵ehem din, ne tenged kayi te g̵ehem layun niw egkeantus is kemereg̵enan he zekelà is kelipey niw.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

1 Tiselunika 3:7

Ne tenged kayi, menge suled, minsan neseeng key wey nemereg̵enan key, utew key nelipey tenged keniyu wey tenged te kedtuu niw.

1 Tiselunika 5:14

Ne iyan daan idhangyù dey keniyu, menge suled, is: keg̵iyi niw is menge peg̵ulen he medterebahu zan. Sembag̵i niw is egkengehandek, lig-eni niw is menge meg̵uyà is kedtuu, ne kinahanglan he mebmepelevayen kew te langun kandan.

1 Timoteo 2:15

Ne minsan pa te iyan haazà, egkelibri g̵ihapun is menge vahi te silut pinaag̵i te ked-anak te vatà ke kenè dan edlekaan is kedtuu zan, wey is kebmahala zan te menge zuma zan wey is menge ulaula zan he igkesuat te Megbevayà wey is ked-erengana zan te langun he ed-ul-ulahan dan.

1 Timoteo 4:6

Emun ibpenurù nu heini ziyà te menge zuma he tumutuu egkehimu ka he metinumanen he sulug̵uen ni Jesu Kristu. Ne egkeheg̵et is kedtuu nu pinaag̵i te ked-istudyu nu te tuluuwen tew wey pinaag̵i te kedhamen nu te hustu he impenurù kenikew.

1 Timoteo 6:11

Ne sikew mulà, sulug̵uen ka te Megbevayà; likayi nu is langun he iring kayi he menge ulaula. Hemeni nu is metazeng he ulaula, is kedtumana te egkesuatan te Megbevayà, is kedsarig kandin, is kegkeg̵eg̵awi nu te menge zuma nu, is kebmeinentusen te menge supak dan, wey is kelinew te ulaula nu.

2 Timoteo 1:8

Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

2 Timoteo 2:24

Ne netuenan nu zaan he kinahanglan he kenà mebpekid-eg̵et is sulug̵uen te Nengazen, kekenà, purungi zin layun is minsan hentei he etew. Kinahanglan he metau he ebpenurù ne mepelevayen daan sikandin.

2 Timoteo 4:5

Iyan, sikew mulà, tengkai nu is ed-ul-ulahan nu te minsan keenu he timpu. Entusa nu is kemereg̵enan. Peniguduwi nu te edsangyew is Meupiya he Tudtulanen. Purungi nu tumana is langun he ebpeveelan kenikew te Megbevayà.

Hibriyuhanen 12:1

Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.

Impezayag 3:10

Ne tenged te metinumanen kew te sug̵ù ku he med-antus kew, ebentayan ku sikiyu wey kew kenè en ebpekesag̵ad te limas he egkeantus te tivuuk he menusiyà he ibpenggezam kandan.