2 Kurintu 6:16 - Manobo Western Bukidnon

¹⁶ Ne is simbahan he Valey te Megbevayà he zutun ed-ezapa sikandin, kenà egkehimu he zutun daan ed-ezapa is menge tarù he ed-ezapen. Ne iring din ded daan sikitew is tumutuu su iyan kiw iring te valey he ed-ubpaan te wazè din kemetayen he Megbevayà. Su migkag̵i is Megbevayà te, “Edlumunan ku sikandan ne ebpekiduma a kandan ne egkehimu he iyan a edsimbahan dan he Megbevayà ne iyan sikandan menge g̵aked ku he etew.”

2 Kurintu 6:16 Кръстосани препратки

Mateo 16:16

Ne zutun midtavak si Simon Pedro te, “Iyan ka sikan is mibpilì te Megbevayà he ibpahadì din te menusiyà; iyan ka sikan is Anak te wazè din kemetayen he Megbevayà.”

Mateo 6:24

Is uripen, kenà egkehimu he zezuwa is teg̵iuripen kandin. Su emun dezuwa is ebayàbayà kandin, edtehuzen din is sevaha ne egkepeukan din is sevaha. Ne emun kenà, ne egkeepesan din is sevaha, ne ebmahalen din is sevaha. Ne iring din ded daan emun iyan mahal ziyà te g̵ehinawa nu is ketig̵eyunan, su kenà egkehimu he mahal zaan diyà te g̵ehinawa nu is Megbevayà.

Lucas 5:36

Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen te menge Hudiyu, ke sikandin te, “Wazà etew he ebindas te veg̵u pa he kumbalà su idapi zin te kumbalà he tug̵ak en. Su emun ebeelan din is iring kayi, ne nezezeetan din dà is beg̵u, ne haazà is daan he kumbalà, kenà ed-engayan te veg̵u he indapi zutun.

Juan 14:23

Ne midtavak si Jesus te, “Ke zuen etew he mahal a ziyà te g̵ehinawa zin, edtumanen din is menge sug̵ù ku, ne zutun mahal sikandin diyà te g̵ehinawa te Amey ku. Ne siak wey is Amey ku, edhendiyè key te kandin ne ziyà key ed-ubpà te kandin.

Juan 6:56

Is egkaan te lawa ku wey ed-inum te lengesa ku, kenà ed-awà dini te kediey ne siak, kenà a zaan ed-awà diyà te kandin.

Ruma 8:11

Is Megbevayà, ne iyan mibanhew ki Jesu Kristu. Ne emun dini ed-ubpà te kenita is Wag̵as he Mulin-ulin he midsug̵ù din, ne ebenhawen ki zin daan pinaag̵i te Mulin-ulin he zini ed-ubpà te kenita.

Ruma 8:9

Ne sikita mulà, kenè ki en ebeyveyaan te mezaat he suat te lawa ta su emun dini ed-ubpà te kenita is Wag̵as he Mulin-ulin ebeyveyaan ki te Wag̵as he Mulin-ulin. Ne ke zuen etew he wazà diyà te kandin is Wag̵as he Mulin-ulin he midsug̵ù ni Kristu, kenà sikandin sakup ni Kristu.

Ruma 9:26

Ne zuen daan Lalag te Megbevayà, he edhenduen te, “Ne heini is menge etew he kenà Hudiyu, egkehimu he zutun te inged he migkeg̵iyan ku sikandan he kenè dan menge sakup ku, egngezanan ku sikandan gihapun he menge anak ku te wazè din kemetayen he Megbevayà.”

1 Kurintu 10:21

Sikitew is tumutuu, emun edtuman ki en duen te intelaan he Idlavung te Nengazen, ne kenà egkehimu he ed-inum ki wey egkaan ki zaan duen te impemuhat te kenà menge tumutuu ziyà te menge mezaat he mulin-ulin su ebpekeiring te zuen tew kebpekid-upakat te menge mezaat he mulin-ulin.

1 Kurintu 6:19

Siguradu netuenan niw he is lawa niw, ne iyan ed-ubpaan te Wag̵as he Mulin-ulin he imbeg̵ey keniyu te Megbevayà. Kenè ki en maan teg̵ig̵aked te lawa ta, kekenà,

Ipisu 2:20

Ne sikitew is menge tumutuu, iring kiw te valey he ibpehitindeg te Megbevayà diyà te vatu. Iyan si Kristu kes batu he edtukuzan kayi te valey. Is menge epustul wey ebpemeneuven te Megbevayà, ne iyan menge tukud. Ne iyan kew menge zuma he himan kayi te valey.

Ipisu 2:22

Ne sikiyu zaan is kenà menge Hudiyu, ragkes kew kayi, ne nehimu kew en daan he menge himan kayi te valey he zutun ed-ubpà is Megbevayà pinaag̵i te Wag̵as he Mulin-ulin.

Ipisu 3:17

su wey, pinaag̵i te kedtuu niw, melumuni is gehinawa niw ni Jesu Kristu. Ne idhangyù ku zaan he heg̵eti zin wey lig-eni zin is kebmahala niw te minsan hentei. Umba idhangyù ku heini su wey sikiyu,

1 Timoteo 3:15

Umba ebpesuratan ku sikew su kela ke mesanggen a. Ne emun egkesanggen a egketuenan nu g̵ihapun ke hengkey is hustu he ed-ul-ulahan he zait tew te menge anak te Megbevayà. Iyan kiw iglisya, he ke và dà egkeg̵iya, menge tumutuu te wazè din kemetayen he Megbevayà. Iyan kiw kes menge tukud wey vangel he zutun mekesavuk is tutuu he tuluuwen.

2 Timoteo 1:14

Pinaag̵i te kedtavang te Wag̵as he Mulin-ulin he zini ed-ubpà te kenita, bentayi nu he kenà mahalin haazà is tutuu he tuluuwen he insarig kenikew te Megbevayà.

Hibriyuhanen 3:6

Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Hibriyuhanen 8:10

Ne mid-uman megkag̵i is Nengazen te, “Is beg̵u he paag̵i he edtukuzen ku wey ku mezawat is menge kevuwazan ni Israyil, ne iyan heini: is menge sug̵ù ku, ne idsurat ku ziyà te g̵ehinawa zan wey ziyà te isip dan ne egkesuatan dan human te edtuman heini. Ne human a egkehimu he Megbevayà dan ne egkehimu sikandan he menge g̵aked ku.

Santiago 4:5

Kenè niw isipa he kenà tutuu sikan is insurat he Lalag te Megbevayà he edhenduen te, “Is gehinawa he imbeg̵ey kenita te Megbevayà, nehimu he mezesen is kegkesuati zin te mezaat he ulaula,

1 Pedro 2:5

Ne sikitew zaan is mibeg̵ayan te untung he wazà pidtemanan, ebpevayàbayè kiw kandin wey kiw zaan mehimu he iring te menge vatu he pengawid te valey he zutun ed-ezapa is Megbevayà. Ne zutun te valey zin edhimuwen kiw zin en he menge memumuhat he mibpilì din. Ne zutun, pinaag̵i te kedtavang ni Jesu Kristu, ebpekepemuhat kiw ne iyan pemuhat he egkesuatan din is: ed-ezapen tew sikandin pinaag̵i te Wag̵as he Mulin-ulin.

1 Juan 4:12

Wazè pa etew he nekeahà te Megbevayà, iyan, emun egig̵ineg̵awè kiw, ed-ubpà dini te kenitew is Megbevayà, ne egkeheg̵et is kebmahala ta te Megbevayà dini te g̵ehinawa ta.

1 Juan 4:15

Ne ke zuen minsan hentei he egkag̵i he edtuuwan din he Anak te Megbevayà si Jesus, diyà ed-ubpà te kandin is Megbevayà ne nekidsevaha sikandin te Megbevayà.

Impezayag 2:1

Ne impelaus din is lalag din te, “Pesurati nu is belinsug̵uen te Megbevayà he ebantey te menge tumutuu he ziyà te inged he Ipisu, ne isurat nu is menge lalag ku ziyà, ke sikew te, ‘Siak si Jesus is egawed te pitu he vituen diyà te kewanan ku he velad ne iyan a zaan edhipanew kayi te teliwazà te pitu he sulù.

Impezayag 21:3

Ne nezineg ku is egkag̵i he utew mezag̵ing diyà te pinuuwà te edhadì, ne ke sikandin te, “Mid-amur en human is Megbevayà diyà te menusiyà. Ed-amur sikandin kandan ne egkehimu sikandan he menge gin-etawan din. Iyan sikandin duma zan wey ed-ezapen dan he Megbevayà.

Impezayag 21:7

Ke zuen minsan hentei he ebpekezaag ki Setanas, ne edhimuwen ku sikandin he anak ku ne egkehimu a zaan he Megbevayè din.