2 Kurintu 6:10 - Manobo Western Bukidnon

¹⁰ Mezakel is menge seeng dey, iyan, layun key egkelipey. Henduen be te utew key egkeayuayu, iyan, pinaag̵i kenami, edsepian te wazà pidtemanan is mezakel he menge etew. Henduen be te wazè dey azen, iyan, naangken dey is langun he ibeg̵ey te Megbevayà.

2 Kurintu 6:10 Кръстосани препратки

Mateo 5:12

Iyan daan heini kes mid-ulaula te menge etew zengan diyà te menge ebpeneuven te Megbevayà. Medlipey kew utew su utew zekelà is idsuhul keniyu keuzemà diyà te langit.

Mateo 5:4

Utew zeyzey sikandan is ibmesakit te g̵ehinawa zan is mezaat he ulaula su edlenganen sikandan te Megbevayà.

Lucas 6:21

Utew kew zeyzey is egkengevitil g̵untaan su ebpekehentayen kew keuzemà te Megbevayà! Utew kew zeyzey is egkengeseeng guntaan su egkengelipey kew keuzemà.

Juan 16:22

Iring din ded daan, egkeseeng kew g̵untaan, iyan, dutun te kebpeked-uman tew kebpeked-aahà, utew kew zutun egkelipey, ne wazà minsan hentei he egkeawè din is kelipey niw.

Nengeulaula 16:25

Ne hein metaneb en is kezukileman, mid-ampù si Pablo wey si Silas wey migkanta zan is edalig te Megbevayà, ne ebpememineg kandan is menge zuma zan he pirisu.

Nengeulaula 3:6

Ne migkag̵i si Pedro te, “Wazè ku naazen he vulawan wey selapì, iyan, is naazen ku, ibeg̵ey ku kenikew. Tenged te g̵ehem te ngazan ni Jesu Kristu he tigNeserit, ebpekehipanew ka!”

Nengeulaula 5:41

Ne is menge epustul, migenat dan ne utew zan nelipey su mid-isip sikandan te Megbevayà he meinentusen te ked-el-eleza kandan tenged te kedtuu zan ki Jesus.

Ruma 11:12

Ne pinaag̵i te supak te menge Hudiyu he iyan is kenè dan kedtuu, midtuvazan te Megbevayà te utew meupiya is tivuuk he menusiyà. Ne pinaag̵i zaan te naawà diyà te menge Hudiyu is kedtuvazi kandan te Megbevayà, utew zekelà is kebpaahaa te Megbevayà te menge etew he kenà Hudiyu te g̵ag̵ew zin. Ne emun iyan heini, wey pe be kenà utew pa zekelà is meupiya he egkezawat te menge etew he kenà menge Hudiyu zutun te timpu keuzemà ke edlikuan te menge Hudiyu is kedtuu zan.

Ruma 12:15

Ke zuen etew he zuen din igkelipey, melipey kew zaan tenged dutun te kelipey zin. Ne ke zuen etew he zuen igkeseeng din, keseeng kew zaan tenged dutun te igkeseeng din.

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

Ruma 8:32

Su minsan is Anak din he si Jesus, wazè din menug̵uni, kekenà, midsug̵ù din wey mekepehimatey he elili kenita. Ne emun iyan haazà gag̵ew zin kenita, kenà egkehimu he kenè din daan ibeg̵ey kenita is langun he impenaad din kenita.

Ruma 9:2

Iyan is: utew a egkeseeng ne kenà egkeawà is kesakit te g̵ehinawa ku tenged te menge zuma ku he menge Hudiyu he kenà edtuu ki Kristu.

1 Kurintu 1:5

Su pinaagi kandin utew zekelà is kedtuvazi keniyu te Megbevayà ne zekelè en is kedsavut niw, ne metau kew en he ebpenurù.

2 Kurintu 2:4

Dutun te kebpeuwiti ku keniyu te surat, utew ad neseeng. Mibmesakit is gehinawa ku ne mibpenig̵is is luhè ku. Iyan, kenè ku pezem dutun tuyù is wey kew meseeng, kekenà, egkesuatan ku he metueni niw he utew kew mahal zini te g̵ehinawa ku.

2 Kurintu 4:15

Ne umba ed-entusen dey is langun he mereg̵en su wey kew iyan mezeyzey, su emun egketukid en is mezakel he etew te g̵ag̵ew te Megbevayà, ne zutun ed-iseg he ebmezakel is ebpekepeselamat te Megbevayà ne egkevantug is Megbevayà.

2 Kurintu 4:7

Ne sikami, iring key zà te kuzen he ziniyun he neteg̵uan te utew mahal. Ne pinaag̵i kayi egkesavut te menge etew he is utew zekelà he gehem he egemiten dey te utew meg̵uyà is lawa, ne in-ulin kenami te Megbevayà ne kenà dini ebpuun te kenami.

2 Kurintu 8:9

Netuenan ta ke hengkey is kezekelà te g̵ag̵ew kenita te Nengazen tew he si Jesu Kristu. Su tenged te hizu zin kenita, minsan te utew sikandin sepian diyà te langit, midhimu zin he utew sikandin ayuayu pinaag̵i te kebpeetew zin wey kebpehimatey zin. Ne tenged kayi te kegkeayuayu zin egkehimu ki he utew sepian.

Ipisu 3:16

Ne edhengyuan ku sikandin he puun te utew zekelà he g̵ehem din, beg̵ayi kew zin te utew melig-en he kedtuu pinaag̵i te ked-ulini keniyu te Wag̵as he Mulin-ulin,

Ipisu 3:8

Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

Pilipus 2:17

Is kedtuu niw te Megbevayà, ne iring te pemuhat he edewaten din. Ne emun egkesuatan din pa he id-uman is kebpatey ku kayi te pemuhat, igkelipey ku pa. Ne igkelipey ku zaan is kedtuu niw iring te nelipey kew.

Pilipus 4:4

Egkeg̵iyan ku sikiyu he sigudu kew lipey tenged te kebpekidsevaha niw te Nengazen, su meupiya ke zekelà layun is kelipey niw.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

Kulusas 3:16

Menge suled, layun niw zewata is impesavut ni Kristu. Pepempenuruey kew wey mebpesemsembag̵è kew sumalà is ketau te kada sevaha. Kanta kew te menge idalig te Megbevayà, wey menge Salmo, wey elin daan is menge kentahan he ibpinted keniyu te Wag̵as he Mulin-ulin. Kentahi niw is Megbevayà he utew zekelà is kebpeselemati niw kandin.

1 Tiselunika 1:6

Ne sikiyu zaan, mid-iringan niw is mid-ulaula zey wey is mid-ulaula zengan te Nengazen tew he si Jesus su midawat niw is Lalag te Megbevayà minsan nekeag̵i kew te kemeresayan tenged te kedawat niw. Ne minsan pa te nerasey kew, nelipey kew zed tenged te ked-ulini keniyu te Wag̵as he Mulin-ulin.

1 Tiselunika 5:16

Ne g̵eina te nekidsevaha kew ki Jesu Kristu, iyan ebpeveelan keniyu te Megbevayà is: layun kew medlipey, layun kew med-ampù, wey layun kew mebpeselamat te Megbevayà minsan hengkey is egkeulaula niw.

1 Timoteo 4:8

Duen deisek he pulus te kedlumbaza te lawa, iyan, utew zekelà is pulus te kedlumbaza te kedtuu ta su iyan ibmeupiya te kebpekesavuk tew minsan guntaan wey lavew en keuzemà ke ziyà ki en te langit.

1 Timoteo 6:18

Keg̵iyi nu is menge sepian he tumutuu he hemeni zan ul-ulaha is meupiya su iyan heini hustu he ketig̵eyunan. Mebmetulanged dan wey mebmetinevangen.

Hibriyuhanen 10:34

Ne nehizuwan niw, ne midtevangan niw is menge tumutuu he nengepirisu. Ne minsan pa te mibpen-ileg te menge etew is langun he menge azen niw, midlipey kew gihapun su netuenan niw he zuen azen niw he utew pa meupiya ziyà te langit he kenà egkeileg diyà te keniyu te wazè din pidtemanan.

Santiago 2:5

Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

1 Pedro 4:13

Kenè kew meinuinu, kekenà, lipey kew utew su pinaag̵i kayi ebpekeambit kew te menge kemeresayan he naantus ni Kristu ne tenged dutun utew kew zaan egkelipey keuzemà ke ibpezayag din kenitew haazà is bulawan he ed-ulian.

Impezayag 2:9

Netuenan ku is kegkeantus niw te kemeresayan; netuenan ku he egkengeayuayu kew. Ne minsan pa zutun sepian kew utew pinaag̵i te kedtuu niw. Netuenan ku he kenà benar is id-ituk keniyu te menge etew he egkag̵i he menge Hudiyu zan, iyan, kenà sikandan tutuu he Hudiyu su mibpekid-upakat dan ki Setanas.

Impezayag 21:7

Ke zuen minsan hentei he ebpekezaag ki Setanas, ne edhimuwen ku sikandin he anak ku ne egkehimu a zaan he Megbevayè din.